General Knowledge: ફ્લાઇટમાં ઇયરફોન લગાવ્યા વિના સંગીત વગાડવા પર કેટલી મળે છે સજા? સરકારે કર્યો ખુલાસો
General Knowledge: લોકસભા સાંસદ વી.એસ. માથેશ્વરને સરકારને ફ્લાઇટમાં સંગીત વગાડતા મુસાફરો સામે શું કાર્યવાહી કરવામાં આવી રહી છે તે અંગે પૂછ્યું. નાગરિક ઉડ્ડયન રાજ્યમંત્રી મુરલીધર મોહોલે આ બાબતે માહિતી આપી.
General Knowledge: ઘણા લોકોને મુસાફરી દરમિયાન મોબાઈલમાં ગીતો સાંભળવાની આદત હોય છે પરંતુ જો તમે ઈયરફોન વિના સંગીત સાંભળો છો તો આજુબાજુના લોકોને સમસ્યા થઈ શકે છે. એવામાં ચાલો જાણી કે જો કોઈ મુસાફર ફ્લાઈટમાં ઈયરફોન વિના મોબાઈલમાં સંગીત વગાડે છે તો શું તેની સામે કોઈ કાર્યવાહી થઈ શકે છે?
લોકસભામાં સાંસદ વી. એસ. માથેસ્વરન દ્વારા ફ્લાઇટમાં ઇયરફોન વગર મ્યુઝિક વગાડતા મુસાફરો સામેની કાર્યવાહી અંગે સરકારને સવાલ પૂછવામાં આવ્યો હતો. તેમણે પૂછ્યું કે શું સરકાર પાસે ઇયરફોન વગર વિમાનની અંદર મ્યુઝિક વગાડતા મુસાફરો સામે લેવામાં આવેલી કાર્યવાહીની કોઈ વિગતો છે?
આ ઉપરાંત, તેમણે એ પણ પૂછ્યું કે શું સરકાર વિમાનમાં ઇયરફોન વગર મ્યુઝિક વગાડતા મુસાફરો સામે કોઈ દંડાત્મક જોગવાઈ ઉમેરવાનો પ્રસ્તાવ ધરાવે છે? જો હા, તો તેની વિગતો શું છે? વિમાનમાં સંગીત વગાડવા અંગે નાગરિક ઉડ્ડયન મહાનિદેશાલય (DGCA) દ્વારા એરલાઇન ઓપરેટરોને જાહેર કરાયેલા દિશાનિર્દેશો શું છે અને શું બ્લોગર્સ કે સોશિયલ મીડિયા ઇન્ફ્લુએન્સર્સને વિમાનની અંદર વીડિયો બ્લોગ બનાવવાની મંજૂરી છે?
કેન્દ્રીય મંત્રી મુરલીધર મોહોલે શું જણાવ્યું?
સાંસદ વી.એસ. માથેસ્વરનના આ તમામ સવાલોના જવાબ આપતા નાગરિક ઉડ્ડયન રાજ્ય મંત્રી મુરલીધર મોહોલે જણાવ્યું હતું કે, DGCA એ 1937ના વિમાન નિયમોના નિયમ 22, 23 અને 29 હેઠળ 'અસભ્ય મુસાફરો' (Unruly Passengers) ના સંચાલન અંગે સિવિલ એવિએશન રિક્વાયરમેન્ટ્સ (CAR), સેક્શન 3, એર ટ્રાન્સપોર્ટ, સિરીઝ M, પાર્ટ VI જાહેર કર્યું છે.
આ CAR મુજબ, વિમાનમાં કોઈ પણ ગેરકાયદેસર કે અવરોધક વર્તન, જે ક્રૂ મેમ્બરોની ફરજમાં અડચણ ઊભી કરે છે, વિમાન, વ્યક્તિઓ કે મિલકતની સુરક્ષાને જોખમમાં મૂકે છે અથવા અન્ય મુસાફરો અને ક્રૂ મેમ્બરોને અસુવિધા પહોંચાડે છે, તે દંડાત્મક કાર્યવાહીને પાત્ર છે. આ ઉપરાંત, મંત્રીએ એ પણ જણાવ્યું કે આ એરલાઇન્સની પોતાની ઓપરેશનલ પ્રેક્ટિસ છે કે તેઓ ઇન-ફ્લાઇટ એન્ટરટેઈનમેન્ટ (IFE) સિસ્ટમ દ્વારા બોર્ડિંગ અને લેન્ડિંગ દરમિયાન સોફ્ટ ઇન્સ્ટ્રુમેન્ટલ મ્યુઝિક અને ઉડાન દરમિયાન અન્ય પ્રી-લોડેડ સામગ્રી મુસાફરોને પૂરી પાડે છે. તેમણે વધુમાં સ્પષ્ટતા કરી કે 1937ના વિમાન નિયમોનો નિયમ 13, DGCA-લાઇસન્સ પ્રાપ્ત એરોડ્રોમ (એરપોર્ટ) પર અને વિમાનમાં ઉડાન દરમિયાન પૂર્વ લેખિત પરવાનગી વગર ફોટોગ્રાફી કે વીડિયોગ્રાફી પર પ્રતિબંધ મૂકે છે.
ટોપ સ્ટોરી
ટ્રેન્ડિંગ સમાચાર
