કોંગ્રેસે જયશંકર પર લગાવ્યા આરોપ, વિદેશ મંત્રાલયે કરી સ્પષ્ટતા, કહ્યું – ઓપરેશન સિંદૂરની જાણકારી....
રાહુલ ગાંધીએ સરકાર પર 'હુમલા પહેલા પાકિસ્તાનને જાણ કરી' હોવાનો આરોપ લગાવ્યો; જયરામ રમેશે જયશંકરના રાજીનામાની માંગ કરી.
MEA clarification on Jaishankar remark: પાકિસ્તાનમાં હાથ ધરવામાં આવેલા 'ઓપરેશન સિંદૂર' અંગે ભારતના વિદેશ મંત્રી ડૉ. એસ. જયશંકરના એક નિવેદનને ટાંકીને કોંગ્રેસ દ્વારા કેન્દ્ર સરકાર પર ગંભીર આરોપો લગાવવામાં આવ્યા છે, જેના પગલે રાજકીય વિવાદ સર્જાયો છે. વિદેશ મંત્રાલયે આ સમગ્ર મામલે સ્પષ્ટતા કરીને કોંગ્રેસના આરોપોને પાયાવિહોણા ગણાવ્યા છે.
લોકસભામાં વિપક્ષના નેતા અને કોંગ્રેસના સાંસદ રાહુલ ગાંધીએ શનિવારે (૧૭ મે, ૨૦૨૫) એક ખાનગી ન્યૂઝ ચેનલના વીડિયોનો ઉલ્લેખ કરીને વિદેશ મંત્રી એસ. જયશંકરના કથિત નિવેદનના આધારે કેન્દ્ર સરકાર પર નિશાન સાધ્યું હતું. રાહુલ ગાંધીએ આરોપ લગાવ્યો કે, "આપણા હુમલાની શરૂઆતમાં પાકિસ્તાનને જાણ કરવી એ ગુનો હતો. વિદેશ મંત્રીએ જાહેરમાં સ્વીકાર્યું છે કે ભારત સરકારે આ કર્યું હતું." તેમણે એમ પણ પૂછ્યું કે આને કોણે અધિકૃત કર્યું અને આના પરિણામે આપણી વાયુસેનાએ કેટલા વિમાન ગુમાવ્યા.
આ દરમિયાન, કોંગ્રેસના અન્ય એક સાંસદ જયરામ રમેશે X પર પોસ્ટ કરીને વિદેશ મંત્રી એસ. જયશંકરના રાજીનામાની માંગ કરી. તેમણે આરોપ લગાવ્યો કે, વિદેશ મંત્રીએ તેમના નિવેદન દ્વારા ભારત સાથે દગો કર્યો છે. કોંગ્રેસના નેતાઓનો મુખ્ય આરોપ એ હતો કે ભારતે 'ઓપરેશન સિંદૂર' શરૂ થાય તે પહેલાં પાકિસ્તાનને તેની જાણકારી આપી દીધી હતી.
વિદેશ મંત્રાલયની સ્પષ્ટતા:
કોંગ્રેસ દ્વારા લગાવવામાં આવેલા આ ગંભીર આરોપો બાદ વિદેશ મંત્રાલયનું સત્તાવાર નિવેદન સામે આવ્યું છે. વિદેશ મંત્રાલયે ડૉ. એસ. જયશંકરના નિવેદન પર સ્પષ્ટતા કરતા જણાવ્યું કે, વિદેશ મંત્રીએ કહ્યું હતું કે 'અમે શરૂઆતમાં જ પાકિસ્તાનને ચેતવણી આપી દીધી હતી, જે સ્પષ્ટપણે ઓપરેશન સિંદૂર શરૂ થયા પછીનો પ્રારંભિક તબક્કો હતો'.
સમાચાર એજન્સી ANI ને ટાંકીને વિદેશ મંત્રાલયે વધુમાં સ્પષ્ટતા કરી કે, "વિદેશ મંત્રીનું જે નિવેદન પ્રસારિત થઈ રહ્યું છે તેને ઓપરેશન સિંદૂર શરૂ થાય તે પહેલાનું ખોટું વર્ણન કરવામાં આવી રહ્યું છે. હકીકતોને સંપૂર્ણપણે ખોટી રીતે રજૂ કરવામાં આવી રહી છે."
આમ, વિદેશ મંત્રાલયે સ્પષ્ટ કર્યું છે કે ડૉ. એસ. જયશંકરે પાકિસ્તાનને હુમલાની અગાઉથી જાણ કરી હોવાનું સ્વીકાર્યું નથી. જે ચેતવણી આપવામાં આવી હતી તે ઓપરેશન શરૂ થયા પછીના પ્રારંભિક તબક્કામાં હતી, પહેલા નહીં. વિદેશ મંત્રાલયે કોંગ્રેસના નેતાઓ દ્વારા કરવામાં આવેલા દાવાઓને તથ્યોની ખોટી રજૂઆત ગણાવ્યા છે, જે આ સમગ્ર વિવાદનું મુખ્ય કારણ છે.
ટોપ સ્ટોરી
ટ્રેન્ડિંગ સમાચાર
