Bihar Politics: બિહારમાં CM કોણ બનશે? ઉપેન્દ્ર કુશવાહાએ સસ્પેન્સનો અંત લાવતા કર્યો મોટો ખુલાસો
Nitish Kumar Bihar CM: ગાંધી મેદાનમાં શપથ ગ્રહણની તૈયારીઓ તેજ, 'નીતિશ જ મુખ્યમંત્રી'ના દાવા સાથે કુશવાહાનો વિપક્ષ અને લાલુ પરિવાર પર આકરો પ્રહાર.
Nitish Kumar Bihar CM: બિહારમાં NDA ની નવી સરકારની રચનાની હલચલ વચ્ચે મુખ્યમંત્રી પદને લઈને અટકળોનો દોર ચાલી રહ્યો હતો. જોકે, હવે રાષ્ટ્રીય લોક મોરચાના વડા અને રાજ્યસભા સાંસદ ઉપેન્દ્ર કુશવાહાએ આ તમામ ચર્ચાઓ પર પૂર્ણવિરામ મૂકી દીધું છે. પટણામાં મીડિયા સાથે વાતચીત દરમિયાન તેમણે સ્પષ્ટ શબ્દોમાં જણાવ્યું છે કે નીતિશ કુમાર જ બિહારના આગામી મુખ્યમંત્રી બનશે. આ સાથે જ તેમણે લાલુ યાદવના પરિવારમાં ચાલી રહેલા વિખવાદ અને અખિલેશ યાદવના 'વોટ ચોરી'ના નિવેદન પર પણ આકરી પ્રતિક્રિયા આપી છે, જેનાથી બિહારનું રાજકારણ ફરી ગરમાયું છે.
"મુખ્યમંત્રી પદ માટે પ્રશ્ન પૂછવો જ વ્યર્થ છે"
પટણાના ઐતિહાસિક ગાંધી મેદાનમાં નવી સરકારના ભવ્ય શપથ ગ્રહણ સમારોહની તૈયારીઓ જોરશોરથી ચાલી રહી છે. આ માહોલ વચ્ચે ઉપેન્દ્ર કુશવાહાએ મુખ્યમંત્રી પદને લઈને ચાલી રહેલી અફવાઓને ફગાવી દીધી છે. તેમણે ભારપૂર્વક કહ્યું હતું કે, "અમે સતત કહેતા આવ્યા છીએ કે નીતિશ કુમાર જ બિહારનું નેતૃત્વ કરશે." તેમણે ઉમેર્યું કે આ અંગે વારંવાર પ્રશ્નો પૂછવા કે શંકા કરવી 'અર્થહીન' છે. NDA ગઠબંધનમાં નીતિશ કુમારનું મુખ્યમંત્રી બનવું એ અંતિમ અને સર્વસંમત નિર્ણય છે.
અખિલેશ યાદવને આડે હાથ લીધા: "વોટ ચોરીનો મુદ્દો નકામો"
સમાજવાદી પાર્ટીના વડા અખિલેશ યાદવ દ્વારા લગાવવામાં આવેલા 'વોટ ચોરી'ના આરોપો પર કુશવાહાએ વળતો પ્રહાર કર્યો હતો. તેમણે કટાક્ષ કરતા કહ્યું કે, "જેમનું ઘર લૂંટાયું હોય તે પોતે કંઈ બોલતા નથી (જનતા), તો બીજા લોકો બૂમો કેમ પાડે છે?" તેમનો સ્પષ્ટ ઈશારો હતો કે બિહારની જનતાએ જનાદેશ આપ્યો છે અને લોકો શાંત છે. જો ખરેખર વોટ ચોરાયા હોત તો જનતા રસ્તા પર ઉતરી હોત. તેમણે અખિલેશ યાદવને સલાહ આપતા કહ્યું કે આવા પાયાવિહોણા મુદ્દાઓ ઉઠાવવાથી કોઈ ફાયદો નથી, અને જો તેઓ વાસ્તવિકતા નહીં સ્વીકારે તો 'ભગવાન જ તેમના માલિક છે'.
#WATCH | Patna, Bihar: Rashtriya Lok Morcha chief Upendra Kushwaha says, "...This final... Nitish Kumar is going to be the Chief Minister again..."
— ANI (@ANI) November 17, 2025
On Akhilesh Yadav's statement regarding vote theft, he says, "...The people they are talking about aren't saying anything at all...… pic.twitter.com/vDsyifDjmm
લાલુ પરિવારના વિખવાદ પર પ્રતિક્રિયા
લાલુ પ્રસાદ યાદવના પરિવારમાં ચાલી રહેલા આંતરિક ઘર્ષણ વિશે પૂછવામાં આવતા કુશવાહાએ કહ્યું કે આ તેમનો અંગત મામલો છે, પરંતુ તેની જવાબદારી પણ તેમની પોતાની જ છે. તેમણે વેધક સવાલ કર્યો કે, "જે લોકો પોતાના પરિવારની આંતરિક પરિસ્થિતિને સંભાળી શકતા નથી, તેઓ સમગ્ર બિહાર રાજ્યની સેવા કેવી રીતે કરશે?" તેમણે દાવો કર્યો કે જનતા આ બધું જોઈ રહી છે અને આજ કારણસર મતદારોએ તેમને ચૂંટણીમાં જાકારો આપ્યો છે. પરિવારનો આંતરિક ડખો તેમની હારનું એક મોટું કારણ બન્યો છે.
રાષ્ટ્રીય લોક મોરચાનું શાનદાર પ્રદર્શન
ઉલ્લેખનીય છે કે, આ વિધાનસભા ચૂંટણીમાં ઉપેન્દ્ર કુશવાહાની પાર્ટી 'રાષ્ટ્રીય લોક મોરચા' (RLM) નું પ્રદર્શન પ્રશંસનીય રહ્યું છે. પાર્ટીએ કુલ 4 બેઠકો પર વિજય મેળવ્યો છે. જેમાં સાસારામ બેઠક પરથી કુશવાહાના પત્ની સ્નેહલતાનો વિજય થયો છે. આ ઉપરાંત બાજપટ્ટીથી રામેશ્વર કુમાર મહતો, મધુબનીથી માધવ આનંદ અને દિનારાથી આલોક કુમાર સિંહે જીત હાંસલ કરીને ધારાસભ્ય તરીકે ચૂંટાયા છે.
ટોપ સ્ટોરી
ટ્રેન્ડિંગ સમાચાર
