Bihar Election 2025: 'જો સત્તામાં આવીશું, તો વકફ એક્ટને કચરાપેટીમાં ફેંકી દઈશું,' તેજસ્વી યાદવની ચૂંટણી રેલીમાં મોટી જાહેરાત
Bihar Election 2025: બિહારની ચૂંટણીના માહોલમાં મહાગઠબંધન તરફથી મુખ્યમંત્રી પદના ઉમેદવાર તેજસ્વી યાદવે મુસ્લિમ બહુમતી ધરાવતા વિસ્તારોમાં આક્રમક પ્રચાર શરૂ કર્યો છે.
Bihar Election 2025: બિહાર વિધાનસભા ચૂંટણી 2025 માં મહાગઠબંધનના મુખ્યમંત્રી પદના ઉમેદવાર તેજસ્વી યાદવે એક ચૂંટણી રેલીમાં મોટી અને વિવાદાસ્પદ જાહેરાત કરી છે. રવિવારે (26 ઓક્ટોબર) મુસ્લિમ બહુમતી ધરાવતા કટિહાર, કિશનગંજ અને અરરિયા જિલ્લાઓમાં સભાઓ સંબોધતા તેમણે વચન આપ્યું કે, જો ઈન્ડિયા બ્લોક બિહારમાં સત્તામાં આવશે, તો અમે વકફ (સુધારો) કાયદો કચરાપેટીમાં ફેંકી દઈશું. આ પહેલા આરજેડી એમએલસી મોહમ્મદ કારી સોહેબે પણ વકફ બિલ ફાડી નાખવાની વાત કહી હતી, જેના પર વિપક્ષે પ્રશ્નો ઉઠાવ્યા હતા કે રાજ્યના મુખ્યમંત્રી કેન્દ્રીય કાયદામાં કેવી રીતે ફેરફાર કરી શકે છે. તેજસ્વીએ નીતિશ કુમાર પર સાંપ્રદાયિક શક્તિઓ ને ટેકો આપવાનો આક્ષેપ પણ લગાવ્યો હતો.
તેજસ્વી યાદવનું વચન: સત્તામાં આવ્યા તો વકફ એક્ટ રદ થશે
બિહારની ચૂંટણીના માહોલમાં મહાગઠબંધન તરફથી મુખ્યમંત્રી પદના ઉમેદવાર તેજસ્વી યાદવે મુસ્લિમ બહુમતી ધરાવતા વિસ્તારોમાં આક્રમક પ્રચાર શરૂ કર્યો છે. રવિવારે (26 ઓક્ટોબર) કટિહાર, કિશનગંજ અને અરરિયા જિલ્લામાં યોજાયેલી જાહેર રેલીઓને સંબોધતા તેમણે સ્પષ્ટપણે જાહેરાત કરી હતી કે, "જો ઇન્ડિયા બ્લોક રાજ્યમાં સત્તામાં આવશે, તો અમે વકફ એક્ટને કચરાપેટીમાં ફેંકી દઈશું."
આ પહેલા શનિવારે (25 ઓક્ટોબર) આરજેડીના એમએલસી મોહમ્મદ કારી સોહેબે પણ વિવાદ ઊભો કરતા કહ્યું હતું કે, જો તેજસ્વી યાદવ મુખ્યમંત્રી બનશે, તો વકફ બિલ સહિતના તમામ બિલ ફાડી નાખવામાં આવશે. જોકે, વિપક્ષ તરફથી આના પર પ્રહારો શરૂ થયા હતા, કારણ કે કેન્દ્રીય કાયદામાં રાજ્યના મુખ્યમંત્રી દ્વારા ફેરફાર કરવો શક્ય નથી. તેમ છતાં, તેજસ્વી યાદવે આ મુદ્દા પર પોતાનું વલણ સ્પષ્ટ કરીને મુસ્લિમ મતદારોને આકર્ષવાનો પ્રયાસ કર્યો છે.
સાંપ્રદાયિક શક્તિઓ પર આકરા પ્રહાર
તેજસ્વી યાદવે પોતાના ભાષણમાં સાંપ્રદાયિક રાજનીતિ અને શાસક પક્ષો પર આકરા પ્રહાર કર્યા હતા. તેમણે દાવો કર્યો કે તેમના પિતા, આરજેડીના વડા લાલુ પ્રસાદ યાદવે, દેશમાં સાંપ્રદાયિક શક્તિઓ સાથે ક્યારેય સમાધાન કર્યું નથી. બીજી તરફ, તેમણે મુખ્યમંત્રી નીતિશ કુમાર પર આક્ષેપ લગાવ્યો કે તેમણે હંમેશા આવી શક્તિઓને ટેકો આપ્યો છે. તેજસ્વીના મતે, નીતિશ કુમારના કારણે જ આરએસએસ અને તેના સાથી પક્ષો રાજ્ય તેમજ દેશમાં સાંપ્રદાયિક નફરત ફેલાવી રહ્યા છે. આક્રમક રીતે તેમણે ભાજપને 'ભારત જલાઓ પાર્ટી' કહેવા જોઈએ, તેવો પણ પ્રહાર કર્યો હતો.
વકફ કાયદા પર શાસક અને વિપક્ષનો વિરોધાભાસી મત
રાજ્યમાં વકફ (સુધારો) કાયદો એક મોટો ચૂંટણી મુદ્દો બની રહ્યો છે. શાસક ભાજપ ની આગેવાની હેઠળના NDA એ આ કાયદાને પારદર્શિતા લાવવા અને મુસ્લિમ સમુદાયમાં પછાત મુસ્લિમો અને મહિલાઓના સશક્તિકરણ તરફનું એક મહત્ત્વનું પગલું ગણાવ્યું છે.
જ્યારે વિપક્ષે આ કાયદાની સખત ટીકા કરી છે. વિપક્ષનો આરોપ છે કે આ કાયદો મુસ્લિમોના અધિકારોનું ઉલ્લંઘન કરે છે અને તે સમુદાય માટે હાનિકારક છે. તેજસ્વી યાદવનું આ નિવેદન સ્પષ્ટ સંકેત આપે છે કે ઈન્ડિયા બ્લોક મુસ્લિમ મતદારોને તેમની તરફ ખેંચવા માટે આ કાયદાને મુખ્ય હથિયાર બનાવી રહ્યું છે.
ટોપ સ્ટોરી
ટ્રેન્ડિંગ સમાચાર
