આવતીકાલનું હવામાન: વાવાઝોડું, વરસાદ અને કરા! 7 એપ્રિલે દેશભરમાં હવામાન પલટાશે, દિલ્હી ગુજરાત માટે મોટી આગાહી

સક્રિય વેસ્ટર્ન ડિસ્ટર્બન્સના કારણે આવતીકાલે ઉત્તર ભારતમાં ગાજવીજ સાથે વરસાદ ખાબકશે, તો દક્ષિણ અને મધ્ય ભારતમાં ગરમી અને વરસાદનો મિશ્ર માહોલ જોવા મળશે.

weather forecast north india delhi ncr rajasthan heavy rain thunderstorms hail

Source : ai

Show Quick Read

Key points generated by AI, verified by newsroom

• વેસ્ટર્ન ડિસ્ટર્બન્સને કારણે અનેક રાજ્યોમાં પવન, વરસાદ, કરાની આગાહી.
• ગુજરાત, મુંબઈમાં વાતાવરણ ઠંડુ, આંશિક વાદળછાયું રહેશે.
• દિલ્હી, રાજસ્થાન, ઉત્તર ભારતમાં વરસાદ, ઠંડી રાહત આપશે.
• દક્ષિણ ભારતમાં વરસાદ અને હીટવેવનો મિશ્ર અનુભવ થશે.

આવતીકાલે એટલે કે 7 એપ્રિલ, 2026 ના રોજ દેશના મોટાભાગના રાજ્યોમાં હવામાનનો મિજાજ સંપૂર્ણપણે બદલાયેલો જોવા મળશે. હવામાન વિભાગ (IMD) ની લેટેસ્ટ આગાહી મુજબ, એક સક્રિય વેસ્ટર્ન ડિસ્ટર્બન્સના કારણે ઉત્તર પશ્ચિમ ભારતમાં તેની સૌથી વધુ અસર જોવા મળશે. જેના પરિણામે દિલ્હી NCR, ઉત્તર ભારત અને રાજસ્થાન સહિતના રાજ્યોમાં ભારે પવન, ગાજવીજ સાથે વરસાદ અને કરા પડવાની પૂરી શક્યતા છે. જ્યારે આપણા ગુજરાત અને મુંબઈમાં પણ વાતાવરણમાં ઠંડક અને આંશિક વાદળછાયો માહોલ રહેશે. બીજી તરફ, દક્ષિણ ભારતમાં ક્યાંક વરસાદ તો ક્યાંક હીટવેવનો ડબલ એટેક જોવા મળશે. ચાલો વિગતે જાણીએ દેશભરમાં આવતીકાલે કેવું રહેશે હવામાન.

ગુજરાત અને અમદાવાદનું હવામાન

આપણા ગુજરાતમાં આવતીકાલે 7 એપ્રિલની આસપાસ વાતાવરણમાં થોડી ઠંડક અનુભવાશે અને આકાશમાં આંશિક વાદળો છવાયેલા રહેશે. અમદાવાદ સહિત રાજ્યના ઘણા શહેરોમાં તાપમાન સામાન્ય કરતા નીચું રહેવાની ધારણા છે. કેટલાક વિસ્તારોમાં છૂટોછવાયો હળવો વરસાદ પણ પડી શકે છે, જેનાથી લોકોને કાળઝાળ બફારામાંથી થોડી રાહત મળશે.

દિલ્હી NCR અને ઉત્તર ભારત: માવઠાની શક્યતા

મંગળવારે દિલ્હી NCR માં વાદળછાયું વાતાવરણ રહેશે. છેલ્લા કેટલાક દિવસોથી ચાલી રહેલી ધૂળની ડમરીઓ અને વાદળછાયો માહોલ હવે હળવા થી મધ્યમ વરસાદમાં ફેરવાઈ શકે છે. વરસાદના કારણે તાપમાન ઘટશે અને ગરમીથી રાહત મળશે. આ ઉપરાંત, વેસ્ટર્ન ડિસ્ટર્બન્સની અસર પંજાબ અને હરિયાણા જેવા રાજ્યોમાં પણ દેખાશે. ત્યાં હળવો વરસાદ, જોરદાર પવન અને છૂટાછવાયા કરા પડવાની શક્યતા છે. ભલે આનાથી હવામાન ખુશનુમા બને, પરંતુ ખેડૂતોના ઊભા પાક માટે આ માવઠું મોટું જોખમ ઊભું કરી શકે છે.

રાજસ્થાનમાં કરા અને વરસાદનો કહેર યથાવત

રાજસ્થાનમાં હાલમાં ચાલી રહેલું તોફાન, વરસાદ અને કરા પડવાનો સિલસિલો 7 એપ્રિલ સુધી ચાલુ જ રહેવાની ધારણા છે. ખાસ કરીને જયપુર, બિકાનેર અને નાગૌર જેવા વિસ્તારોમાં જોરદાર પવન સાથે વરસાદ ખાબકી શકે છે. આનાથી તાપમાન સામાન્ય કરતા નીચે જશે અને હાલ પૂરતો હીટવેવ (લૂ) નો ખતરો ટળી ગયો છે.

પહાડી રાજ્યોમાં બરફવર્ષા અને વરસાદ

ઉત્તરાખંડ અને હિમાચલ પ્રદેશમાં પણ આ સિસ્ટમની સ્પષ્ટ અસર જોવા મળશે. બંને રાજ્યોમાં વાદળો ગોરંભાશે અને હળવાથી મધ્યમ વરસાદની સાથે ગાજવીજ થવાની શક્યતા છે. પહાડોની ઊંચાઈવાળા વિસ્તારોમાં હળવી બરફવર્ષા થવાથી ઠંડી પાછી ફરશે. પહાડી રસ્તાઓ લપસણા બની શકે છે અને ભારે પવન ફૂંકાઈ શકે છે, તેથી પ્રવાસીઓએ અત્યારે ખાસ સાવચેતી રાખવી.

મુંબઈ અને મધ્ય ભારત

મધ્ય ભારતના રાજ્યોમાં મોટાભાગે હવામાન સામાન્ય રહેશે, પરંતુ અમુક જગ્યાએ વાદળછાયું આકાશ અને હળવો વરસાદ પડી શકે છે. જ્યારે કેટલાક વિસ્તારોમાં હીટવેવ એટલે કે ગરમીનું મોજું ચાલુ રહેશે. મુંબઈ અને તેની આસપાસના વિસ્તારોની વાત કરીએ તો, ત્યાં પણ તાપમાન સામાન્ય કરતા થોડું નીચું રહેશે અને આંશિક વાદળછાયું વાતાવરણ રહેશે. IMD અનુસાર, મુંબઈમાં આ એપ્રિલ મહિનામાં કાળઝાળ ગરમી પડવાની શક્યતા બહુ ઓછી છે.

દક્ષિણ ભારતમાં પવન સાથે વરસાદ

દક્ષિણ ભારતના ઘણા ભાગોમાં, ખાસ કરીને આંધ્રપ્રદેશ અને દરિયાકાંઠાના વિસ્તારોમાં ગાજવીજ સાથે 30 થી 40 કિમી પ્રતિ કલાકની ઝડપે ભારે પવન ફૂંકાવાની શક્યતા છે. સાથે જ કેટલાક વિસ્તારોમાં ગરમીનું મોજું પણ યથાવત રહી શકે છે. એટલે કે, દક્ષિણ ભારતમાં લોકોને વરસાદ અને ગરમી બંનેનો મિશ્ર અનુભવ થશે.

આ પણ વાંચો

આવતીકાલથી હવામાન બગડશે: 9 રાજ્યોમાં ભારે વરસાદ અને વાવાઝોડાની હવામાન વિભાગની આગાહી