ગુજરાતમાં વધુ એક પેપર થયું લીક, 55 હજાર વિદ્યાર્થીઓની મહેનત ગઇ પાણીમાં

હેડ ક્લાર્કની પરીક્ષાનું પેપર ફુટવાને લઈને રાજ્યમાં વિપક્ષો સરકાર પર પ્રહાર કરી રહ્યા છે. ત્યારે રાજ્યમાં વધુ એક પેપર લીક થયું છે.

રાજકોટઃ હેડ ક્લાર્કની પરીક્ષાનું પેપર ફુટવાને લઈને રાજ્યમાં વિપક્ષો સરકાર પર પ્રહાર કરી રહ્યા છે. ત્યારે સૌરાષ્ટ્ર યુનિવર્સિટીના સત્તાધીશોની બેદરકારીના પાપે 58 હજાર વિદ્યાર્થીઓની મહેનત પર પાણી ફરી વળ્યું છે. રાજકોટ આમ આદમી પાર્ટીએ બી.કોમનું અર્થશાસ્ત્રનુ પેપર લીક થયા હોવાના પૂરાવા સાથે આરોપ લગાવ્યો હતો.

આમ આદમી પાર્ટીના આરોપોને તો પહેલા સૌરાષ્ટ્ર યુનિવર્સિટીના સત્તાધીશો નકારતા રહ્યા પરંતુ બાદમાં પુરાવાનો અભ્યાસ કરતા સૌરાષ્ટ્ર યુનિવર્સિટીના સત્તાધીશો પોતાની બેદરકારીનો અહેસાસ થયો હતો અને આખરે પેપર લીક થયાનું સ્વીકાર્યું હતું. અને આ મામલે પોલીસ ફરિયાદ નોંધાવી હતી.

સૌરાષ્ટ્ર યુનિવર્સિટીના સત્તાધીશોની ફરિયાદના આધારે પોલીસે ફુટેલુ પેપર મેળવનાર ત્રણ શંકાસ્પદો વિદ્યાર્થીઓની અટકાયત કરી છે. સાથે જ ગીતાંજલી કોલેજના એક 88 વિદ્યાર્થીઓના બનેલા વોટ્સએપ ગ્રુપમાં જે નંબર પરથી પેપર મુકાયુ હતુ તેની પણ પોલીસે અટકાયત કરી છે. હાલ તો પોલીસે તમામની પૂછપરછની કાર્યવાહી હાથ ધરીને પેપર લીક કાંડના અસલી આરોપીઓ સુધી પહોંચવા મથામણ કરી રહી છે.

પેપર ફૂટતા સૌરાષ્ટ્ર યુનિવર્સિટીના પરીક્ષા વિભાગે અર્થશાસ્ત્રનું પેપર રદ કરવાની જાહેરાત કરી હતી. સૌરાષ્ટ્ર યુનિવર્સિટીમાં કુલપતિ ડો.નીતિન પેથાણીએ જણાવ્યું હતું કે અર્થશાસ્ત્રનું પેપર આગામી 3 જાન્યુઆરીએ ફરીથી લેવામાં આવશે.આ મામલે પોલીસે આઠ યુવાનોની અટકાયત કરી છે. પેપર લીક કાંડના મુખ્ય સૂત્રધાર સહિત 8 લોકોની પૂછપરછ હાથ ધરવામાં આવી છે. એલિશ નામના યુવાનની પોલીસે પૂછપરછ હાથ ધરી છે.