ગુજરાતમાં મેઘ મહેર: આજથી બે દિવસ સૌરાષ્ટ્ર અને ઉત્તર ગુજરાતમાં અતિભારે વરસાદની આગાહી

Gujarat Rain Update: રાજ્યમાં મેઘરાજા ફરી એકવાર સક્રિય થયા છે, જેના પગલે આજથી આગામી બે દિવસ સૌરાષ્ટ્ર અને ઉત્તર ગુજરાતને મેઘરાજા ધમરોળશે તેવી હવામાન વિભાગ દ્વારા આગાહી કરવામાં આવી છે.

હવામાન વિભાગની આગાહી

Source : chatgpt

Show Quick Read

Key points generated by AI, verified by newsroom

• રાજ્યમાં આગામી બે દિવસ સૌરાષ્ટ્ર, ઉત્તર ગુજરાતમાં ભારે વરસાદની આગાહી.
• રાજકોટ, બોટાદ, ભાવનગર, સુરેન્દ્રનગર માટે રેડ એલર્ટ જાહેર કરાયું.
• છેલ્લા ૨૪ કલાકમાં ૨૫૫ તાલુકાઓમાં ભારેથી અતિભારે વરસાદ વરસ્યો.
• સુરતના અંબિકામાં ૨૪ ઇંચ વરસાદ; નવસારીમાં પૂરની સ્થિતિ યથાવત.

Gujarat Rain Update: રાજ્યમાં મેઘરાજા ફરી એકવાર સક્રિય થયા છે, જેના પગલે આજથી આગામી બે દિવસ સૌરાષ્ટ્ર અને ઉત્તર ગુજરાતને મેઘરાજા ધમરોળશે તેવી હવામાન વિભાગ દ્વારા આગાહી કરવામાં આવી છે. આજે સવારથી જ રાજકોટ, જામનગર, દ્વારકા અને સુરેન્દ્રનગર સહિત સૌરાષ્ટ્રના મોટાભાગના જિલ્લાઓમાં વરસાદી માહોલ જામ્યો છે. આગામી કલાકોમાં આ જિલ્લાઓમાં વરસાદની તીવ્રતામાં વધુ વધારો થવાની શક્યતા છે, જ્યારે ઉત્તર ગુજરાતમાં પણ બપોર પછી વરસાદી એક્ટિવિટી જોર પકડશે.

 

સ્થિતિની ગંભીરતાને ધ્યાનમાં રાખીને હવામાન વિભાગ દ્વારા વિવિધ જિલ્લાઓ માટે અલર્ટ જાહેર કરવામાં આવ્યા છે:

રેડ અલર્ટ (અતિભારે વરસાદ): રાજકોટ શહેર, બોટાદ, ભાવનગર અને સુરેન્દ્રનગર જિલ્લામાં આજે અતિભારે વરસાદનું 'રેડ અલર્ટ' આપવામાં આવ્યું છે. તેથી રાજકોટ સહિત સૌરાષ્ટ્ર તરફ પ્રવાસ કરવાનું વિચારતા લોકોએ ખાસ સાવચેતી રાખવી.

ઓરેંજ અલર્ટ (ભારેથી અતિભારે વરસાદ): કચ્છ, મોરબી અને અમરેલી જિલ્લામાં વરસાદનું 'ઓરેંજ અલર્ટ' જાહેર કરાયું છે.

યલો અલર્ટ (મધ્યમથી ભારે વરસાદ): જામનગર, પોરબંદર, જૂનાગઢ, દેવભૂમિ દ્વારકા અને ગીર સોમનાથ જિલ્લામાં વરસાદનું 'યલો અલર્ટ' આપવામાં આવ્યું છે.

તંત્ર દ્વારા નાગરિકોને કામ વગર બહાર ન નીકળવા અને નીચાણવાળા વિસ્તારોમાં સાવચેત રહેવાની અપીલ કરવામાં આવી છે.

રાજ્યમાં છેલ્લા 24 કલાકમાં 255 તાલુકામાં મુશળધાર વરસાદ

ગુજરાતમાં છેલ્લા 24 કલાક દરમિયાન સાર્વત્રિક વરસાદી માહોલ જોવા મળ્યો છે. દક્ષિણ અને મધ્ય ગુજરાતમાં મેઘરાજાએ સૌથી વધુ તોફાની બેટિંગ કરતા અનેક શહેરો અને ગ્રામ્ય વિસ્તારોમાં જનજીવન પ્રભાવિત બન્યું છે. રાજ્યના 255 તાલુકામાં નોંધપાત્ર વરસાદ નોંધાયો છે, જ્યારે 30 તાલુકામાં 7 ઇંચથી વધુ અને 145 તાલુકામાં 2 ઇંચથી વધુ વરસાદ વરસતા અનેક રસ્તાઓ, નીચાણવાળા વિસ્તારો અને ખેતીના ખેતરો પાણીમાં ગરકાવ થયા છે.

સુરતના અંબિકામાં સૌથી વધુ 24.06 ઇંચ વરસાદ

રાજ્યમાં સૌથી વધુ વરસાદ સુરત જિલ્લાના અંબિકા વિસ્તારમાં 24.06 ઇંચ નોંધાયો છે. આ ઉપરાંત તાપીના ડોલવણમાં 16.73 ઇંચ, વસોમાં 16.38 ઇંચ, નવસારીના વાંસદામાં 16.26 ઇંચ અને સુરતના ઉમરપાડામાં 14.69 ઇંચ વરસાદ નોંધાયો છે. ભરૂચના નેત્રંગમાં 13.03 ઇંચ, વલસાડના ધરમપુરમાં 11.02 ઇંચ, ડાંગના વઘઈમાં 10.94 ઇંચ અને સુરતના માંગરોળમાં 10.71 ઇંચ વરસાદ નોંધાતા અનેક વિસ્તારોમાં પાણી ભરાઈ ગયા છે.

રાજકોટમાં તમામ તાલુકામાં વરસાદ

ભારે વરસાદની આગાહી વચ્ચે રાજકોટ શહેર અને જિલ્લામાં ગત રાતથી વરસાદી વાતાવરણ રહ્યું હતું. જિલ્લાના તમામ તાલુકાઓમાં હળવાથી મધ્યમ વરસાદ નોંધાયો છે. છેલ્લા 24 કલાકમાં જસદણમાં સૌથી વધુ 38 મીમી, જ્યારે ઉપલેટામાં સૌથી ઓછો 7 મીમી વરસાદ નોંધાયો છે. રાજકોટ શહેરમાં 18 મીમી વરસાદ નોંધાયો છે. ઉપરાંત લોધિકા 25 મીમી, કોટડા સાંગાણી અને વિંછીયામાં 31-31 મીમી, ગોંડલમાં 29 મીમી અને જામકંડોરણામાં 26 મીમી વરસાદ નોંધાયો છે.

મહીસાગરમાં બાલાસિનોરમાં 7 ઇંચ વરસાદ

મહીસાગર જિલ્લામાં પણ છેલ્લા 24 કલાક દરમિયાન સાર્વત્રિક વરસાદ નોંધાયો છે. બાલાસિનોરમાં 7 ઇંચ વરસાદ, જ્યારે વીરપુર અને લુણાવાડામાં 4-4 ઇંચ વરસાદ વરસ્યો છે. ખાનપુર, કોઠંબા અને સંતરામપુરમાં 2 ઇંચથી વધુ વરસાદ નોંધાયો છે, જ્યારે ગોધરા અને કડાણા તાલુકામાં પણ નોંધપાત્ર વરસાદ પડ્યો છે.

નવસારીમાં પૂર જેવી સ્થિતિ, હવે મળી રહી છે રાહત

નવસારી અને ઉપરવાસના વિસ્તારોમાં છેલ્લા ચાર કલાકથી વરસાદ ધીમો પડતા લોકોને થોડી રાહત મળી છે. જોકે ગત મોડી રાત સુધીના ભારે વરસાદના કારણે જિલ્લાની નદીઓમાં ઘોડાપૂર આવ્યું હતું. અંબિકા નદી 38 ફૂટ સુધી પહોંચ્યા બાદ 2.62 ફૂટ ઘટી છે, જ્યારે કાવેરી નદીમાં 5 ફૂટ પાણી ઉતર્યું છે. બીજી તરફ પૂર્ણા નદી છેલ્લા છ કલાકથી 28 ફૂટની સપાટીએ સ્થિર છે, જે હજુ પણ ભયજનક સપાટીથી ઉપર છે.

પૂરના કારણે નવસારી શહેરના ગધેવાન મહોલ્લો, ભેંસતખાડા, રંગુનનગર, મહમદી બંગલો, કાશીવાડી, બંદર રોડ, કાલીયાવાડી, કાછિયાવાડી, રામલામોરા અને શાંતાદેવી રોડ સહિતના વિસ્તારોમાં પાણી ભરાઈ ગયા છે. શહેરનો અંદાજે 30 ટકાથી વધુ વિસ્તાર પાણીમાં ગરકાવ થયો હતો. જોકે વરસાદ ધીમો પડતાં પૂરની સ્થિતિમાં ધીમે ધીમે સુધારો જોવા મળી રહ્યો છે.

નવસારી જિલ્લાના વરસાદના આંકડા

સવારે 6 વાગ્યા સુધીના આંકડા મુજબ વાંસદામાં 413 મીમી (17.20 ઇંચ) વરસાદ નોંધાયો છે. જ્યારે નવસારીમાં 221 મીમી, ખેરગામમાં 220 મીમી, જલાલપોરમાં 177 મીમી, ગણદેવીમાં 148 મીમી અને ચીખલીમાં 134 મીમી વરસાદ નોંધાયો છે.

હાલ રાજ્યના અનેક વિસ્તારોમાં વરસાદી માહોલ યથાવત્ છે અને હવામાન વિભાગે આગામી કલાકોમાં પણ કેટલાક વિસ્તારોમાં ભારે વરસાદની શક્યતા વ્યક્ત કરી છે. લોકોને સાવચેત રહેવા અને સ્થાનિક તંત્રની સૂચનાઓનું પાલન કરવાની અપીલ કરવામાં આવી છે.

આ પણ વાંચો

Ambalal Patel: અંબાલાલ પટેલની મોટી આગાહી, ગુજરાતના આ જિલ્લાઓમાં વરસાદ ભૂક્કા બોલાવશે

Gujarat Rain Forecast: રાજ્યમાં આજે ભારે વરસાદની આગાહી, 6 જિલ્લામાં અતિભારે વરસાદનું રેડ એલર્ટ જાહેર