સુરત માટે આજની રાત ભારે! અતિભારે વરસાદનું રેડ એલર્ટ, રાત્રે 9 વાગ્યા પછી બહાર ન નીકળવા અપીલ

શહેરમાં બારેમેઘ ખાંગા થતા જળબંબાકાર; પાલિકા કમિશનર ગ્રાઉન્ડ પર, NDRF-SDRF તૈનાત અને શાળાઓમાં રજા જાહેર.

Surat Heavy Rain Red Alert Tonight City Advisory NDRF SDRF Deployed

Source : ai

Show Quick Read

Key points generated by AI, verified by newsroom

• હવામાન વિભાગે સુરત માટે 'રેડ એલર્ટ' જાહેર કર્યું; NDRF/SDRF તૈનાત.
• ભારે વરસાદથી શહેર જળબંબાકાર; શૈક્ષણિક સંસ્થાઓમાં રજા અપાઈ.
• ખાડીઓ ભયજનક સપાટી વટાવતા, નીચાણવાળા વિસ્તારો ખાલી કરાવાયા.
• ટ્રાફિક જામ, કેમિકલ લીક, ભુવો પડ્યો; બસ રૂટ બંધ.

Surat heavy rain alert: સુરત શહેર માટે આજની રાત ભારે રહેવાની છે. હવામાન વિભાગે આજે રાત્રે સુરતમાં અત્યંત ભારે વરસાદ ખાબકવાની શક્યતા સાથે 'રેડ એલર્ટ' જાહેર કર્યું છે, ખાસ કરીને રાત્રે 11 વાગ્યાથી સવારે 4 વાગ્યા સુધી મેઘરાજા રૌદ્ર સ્વરૂપ બતાવી શકે છે. પરિસ્થિતિની ગંભીરતાને જોતા મહાનગરપાલિકા કમિશનરે તમામ નાગરિકોને રાત્રે 9 વાગ્યા સુધીમાં પોતાના ઘરે પરત ફરી જવા અને ત્યારબાદ કામ વગર બહાર ન નીકળવા ખાસ અપીલ કરી છે. હાલ શહેરમાં સુરક્ષા માટે અલગ-અલગ વિસ્તારોમાં NDRF અને SDRF ની ટીમોને તૈનાત કરી દેવામાં આવી છે.

છેલ્લા કેટલાક દિવસોથી વરસી રહેલા અનરાધાર વરસાદને કારણે સુરતની હાલત ફરીથી બેહાલ થઈ ગઈ છે. અનેક નીચાણવાળા વિસ્તારોમાં જળબંબાકારની સ્થિતિ સર્જાઈ છે, જેને પગલે તકેદારીના ભાગરૂપે જિલ્લા શિક્ષણાધિકારીએ તમામ શૈક્ષણિક સંસ્થાઓમાં રજા જાહેર કરી દીધી છે. ખુદ મનપા કમિશનર એમ. નાગરાજન રસ્તા પર ઉતરીને પરિસ્થિતિનું મોનિટરિંગ કરી રહ્યા છે. જ્યાં પણ પાણી ભરાયાની ફરિયાદ મળે છે, ત્યાં તેઓ જાતે પહોંચીને પાણીના નિકાલ માટે કર્મચારીઓને જરૂરી સૂચનાઓ આપી રહ્યા છે.

ભારે વરસાદને લીધે શહેરની મુખ્ય 5 ખાડીઓનું જળસ્તર સતત વધી રહ્યું છે. ખાસ કરીને ભેદવાડ ખાડીએ ભયજનક સપાટી વટાવી દેતા પાલિકા તંત્ર દોડતું થયું છે. ઉધનાના સંજયનગર સહિતના ખાડીકાંઠાના નીચાણવાળા વિસ્તારોમાં માઇક દ્વારા એનાઉન્સમેન્ટ કરીને લોકોને સુરક્ષિત સ્થળે ખસવા ચેતવણી અપાઈ છે. ખાડી નજીકના અને જળમગ્ન વિસ્તારોમાં પાલિકાની ટીમ દ્વારા બેરિકેટિંગની કામગીરી પણ યુદ્ધના ધોરણે ચાલી રહી છે.

નાગસેનનગરમાં ખાડીકાંઠે આવેલા ઝૂંપડાઓમાં પાણી ઘૂસી જતાં લોકોની ઘરવખરી પલળી ગઈ છે અને ભારે હાલાકી સર્જાઈ છે. સલામતીના ભાગરૂપે આ તમામ લોકોને અને પાંડેસરાના પ્રેમનગર, કૃષ્ણનગર તેમજ લક્ષ્મીનારાયણનગરના અસરગ્રસ્તોને સુરક્ષિત સ્થળે ખસેડવામાં આવ્યા છે. ભેદવાડ અને મીઠીખાડી વિસ્તારમાં મશીનો (પંપ) મૂકીને પાણી ઉલેચવાની કામગીરી શરૂ કરી દેવામાં આવી છે.

આ પણ વાંચોઃ ગુજરાતમાં 4 સિસ્ટમ સક્રિય: આગામી 2 દિવસ અત્યંત ભારે વરસાદની આગાહી, જાણો તમારા જિલ્લાનું એલર્ટ

શહેરમાં ઠેર-ઠેર પાણી ભરાતા ટ્રાફિક જામ અને હાલાકીના દ્રશ્યો સર્જાયા છે. પાસોદરાની એસ્ટ્રોન હાઈટ્સ બહાર ઘૂંટણસમા પાણીમાં ફસાયેલા એક વિદ્યાર્થીએ મદદ માંગતા, લસકાણા પોલીસના પીઆઈ મીનાબા ઝાલાએ તાત્કાલિક પહોંચી તેને હેમખેમ ઘરે પહોંચાડ્યો હતો. બીજી તરફ ભેસ્તાન નવીન ફ્લોરિંગ રોડ અને ભેસ્તાન-નવસારી રોડ પર 500 મીટર સુધી પાણી ભરાઈ જતા વાહનચાલકો ફસાયા હતા. પાણીના નિકાલની યોગ્ય વ્યવસ્થા ન હોવાથી ફસાયેલા લોકોએ મહાનગરપાલિકા સામે ભારે રોષ ઠાલવ્યો હતો.

વરસાદ વચ્ચે ઉધના મેઈન રોડ પર કેમિકલ માફિયાઓનું પાપ સામે આવ્યું છે; મીલોનું કેમિકલયુક્ત પાણી ગટર મારફતે રસ્તા પર ફરી વળતા સ્થાનિકોમાં રોગચાળાની દહેશત ફેલાઈ છે. વેસુ વીઆઈપી રોડ પર ભગવાન મહાવીર કોલેજ પાસેનું ફૂડ પ્લાઝા પાણીમાં ગરકાવ થયું છે, જ્યારે ગોડાદરામાં માનસરોવર પાસે કોન્ટ્રાક્ટરની બેદરકારીથી પડેલા ભુવામાં એક ડમ્પર ફસાયું હતું. હાલ ફાયર વિભાગની બોટ સાથે તમામ બચાવ ટીમો સ્ટેન્ડબાય છે અને સાવચેતી રૂપે BRTS તથા સિટી બસના 5 જેટલા રૂટ બંધ કરી દેવાયા છે.

આ પણ વાંચોઃ ગુજરાતમાં કાલથી 7 દિવસ ભારે વરસાદનું એલર્ટ: 24 કલાકમાં 173 તાલુકામાં વરસાદ, કપરાડામાં સૌથી વધુ 15.63 ઈંચ