Surat: પાટીદાર યુવકે વોટ્સએપ પર સોરી મમ્મી લખી ગળાફાંસો ખાઇ જીવન ટૂંકાવ્યું, 4 દિવસ પહેલા જ ઉજવ્યો હતો બર્થ ડે

Surat News: યુવકના મોતના પગલે પરિવારમાં શોકનો માહોલ છવાઈ ગયો છે. ખટોદરા પોલીસે અકસ્માતે મોતનો ગુનો નોંધી તપાસ હાથ ધરી છે.

મૃતક હાર્દિક ઝડફીયાની ફાઇલ તસવીર

Surat: ડાયમંડ નગરી સુરતમાં આપઘાતના બનાવમાં સતત વધારો થઈ રહ્યો છે. સુરતમાં રહેતા 18 વર્ષીય યુવકે ગળાફાંસો ખાઇ જીવન ટૂંકાવી દીધું હતું. આપઘાત કરતાં પહેલા હાર્દિક ઝડફીયાએ તેની માતાને વોટ્સએપ પર સોરી મમ્મી એવો મેસેજ કર્યો  હતો.  ચાર દિવસ પહેલા જ યુવકે બર્થ ડે ઉજવ્યો હતો. યુવકના મોતના પગલે પરિવારમાં શોકનો માહોલ છવાઈ ગયો છે. ખટોદરા પોલીસે અકસ્માતે મોતનો ગુનો નોંધી તપાસ હાથ ધરી છે.

સારોલીમાં BHMSના વિદ્યાર્થીએ 10મા માળેથી ઝંપલાવ્યું

સુરતના સારોલીના નેચરવેલી હોમ્સના દસમા માળેથી બીએચએમએસના વિદ્યાર્થીએ કૂદીને આપઘાત કરી લીધો હતો. બે વર્ષ અગાઉ અકસ્માતની ઘટનામાં મોટાભાઈનું મોત થયા બાદ વિદ્યાર્થી માનસિક તાણ અનુભવતો હતો. મૂળ અમરેલીના રાજુલાના વતની આશિષ મહેશભાઈ કળસરિયાએ તાજેતરમાં ભટાર રોડની કોલેજમાં બીએચએમએસમાં એડમિશન લીધું હતું.જેથી લોજે અને હોસ્ટેલની વ્યવસ્થા થાય તે માટે આશિષ છેલ્લા પાંચેક દિવસથી સારોલી ખાતે નેચરવેલી હોમ્સમાં સંબંધીના ઘરે રોકાયો હતો. બે દિવસ પહેલા તેણે દસમા માળેથી ઝંપલાવી મોતને વહાલું કરી લીધું હતું. યુવકના અકાળે મોતથી પરિવારમાં શોકની કાલિમાં છવાઈ ગઈ હતી.

લીંબડી - અમદાવાદ નેશનલ હાઇવે રોડ ઉપર ઇક્કો અને આઇસર વચ્ચે સર્જાયો ગંભીર અકસ્માત, 3 લોકોનાં મોત

લીબંડી-અમદાવાદ હાઇવે ઉપર સર્જાયેલા અકસ્માતમાં ત્રણ લોકોનાં મોત થયા છે. અકસ્માતમાં બે પુરૂષોના ઘટના સ્થળે અને એક મહિલાને વધુ સારવાર માટે રાજકોટ લઈ જતા હતા ત્યારે મોત થયું છે. અકસ્માતમાં એક મહિલા અને એક પુરૂષ ગંભીર રીતે ઈજાગ્રસ્ત થતાં 108 દ્વારા લીંબડી તેમજ પાણશીણા સારવાર માટે ખસેડવામાં આવ્યા હતા. વધુ સારવાર માટે એક મહિલાને રાજકોટ લઈ જતા હતા ત્યારે રસ્તામાં જ મહિલા નું મોત પણ નીપજ્યું હતું. ઇક્કો ગાડીમાં કુલ 5 લોકો સવાર હતા. રાજસ્થાનથી રાજકોટ પરત ફરી રહ્યાં ત્યારે વહેલી સવારે અકસ્માત સર્જાયો હતો. ઇક્કોના ડ્રાઇવરે સ્ટીયરિંગ પર કાબુ ગુમાવતાં રોડની સાઇડ પર ઉભેલી આઇસર સાથે અથડાઇ હતી. આ ઘટના આજે વહેલી સવારે નેશનલ હાઇવે લીંબડીનાં ચોરણીયા 66 કેવી સબ સ્ટેશન પાસે બની હતી.

મુંબઈ -અમદાવાદ હાઈવે પર લકઝરી બસ અને કાર વચ્ચે અકસ્માત, ડ્રાઇવર સહિત ચાર લોકોનાં મોત

મુંબઈ -અમદાવાદ હાઈવે પર લકઝરી બસ અને કાર વચ્ચે અકસ્માત થયો છે. જેમાં ડ્રાઇવર સહિત ચાર લોકોના મોત થયા છે. પાલઘર જિલ્લાના દહાણુ વિસ્તારમાં મુંબઈ-અમદાવાદ હાઈવે પર કાર અને બસ વચ્ચેની અથડામણમાં ચાર લોકોના ઘટનાસ્થળે જ મોત થયા છે. કાર ગુજરાતથી મુંબઈ જઈ રહી હતી અને કાર ચાલકે વાહન પરનો કાબૂ ગુમાવતાં બસ સાથે અથડાઈ હતી. કાર ગુજરાતથી મુંબઈ જઈ રહી હતી અને કારે કાબુ ગુમાવ્યો અને બસ સાથે અથડાઈ. જેના કારણે કારમાં સવાર ચાર લોકોના મોત થયા હતા. પાલઘર પોલીસે અકસ્માતની જાણકારી આપી હતી. અકસ્માતની માહિતી મળતાં જ સ્થાનિક પોલીસ ઘટનાસ્થળે પહોંચી હતી અને કારને બસની નીચેથી બહાર કાઢી હતી. મૃતદેહોનો કબજો લઈ પોસ્ટમોર્ટમ માટે મોકલી આપવામાં આવ્યો છે. માર્ગ અકસ્માત અંગે મૃતકના પરિજનોને જાણ કરવામાં આવી છે.