દોસ્ત દોસ્ત ન રહા....: ‘એલોન મસ્ક પાગલ થઈ ગયો છે, હું વાત કરવા માંગતો નથી‘ - ડોનાલ્ડ ટ્રમ્પના ટેસ્લાના CEO પર આકરા પ્રહાર
US ચૂંટણી દરમિયાન વખાણ કરનારા બંને દિગ્ગજો હવે ખુલ્લેઆમ સામસામે, EV ટેક્સ પ્રોત્સાહન અને સબસિડી વિવાદનું મૂળ.
Donald Trump slams Elon Musk: અમેરિકાના (America) પૂર્વ રાષ્ટ્રપતિ ડોનાલ્ડ ટ્રમ્પ અને ટેસ્લા તેમજ X (અગાઉ ટ્વિટર) ના સીઈઓ એલોન મસ્ક વચ્ચેનો શાબ્દિક સંઘર્ષ હવે ચરમસીમાએ પહોંચી ગયો છે. જે બંને દિગ્ગજો યુએસ રાષ્ટ્રપતિની ચૂંટણી દરમિયાન એકબીજાના ભારોભાર વખાણ કરતા હતા, તેઓ હવે ખુલ્લેઆમ સામસામે આવી ગયા છે. ટ્રમ્પે શુક્રવારે જણાવ્યું હતું કે એલોન મસ્ક તેમની સાથે વાત કરવા માંગે છે, પરંતુ તેઓ વાતચીત માટે બિલકુલ તૈયાર નથી.
ટ્રમ્પની મસ્ક પર 'પાગલ' ટિપ્પણી:
એબીસી ન્યૂઝ (ABC News) ચેનલને આપેલા એક ઇન્ટરવ્યુમાં ડોનાલ્ડ ટ્રમ્પે એલોન મસ્ક વિશે કહ્યું હતું કે, "તે પાગલ થઈ ગયો છે." અગાઉ એવા અહેવાલ હતા કે વ્હાઇટ હાઉસના (White House) અધિકારીઓએ આ વિવાદનો અંત લાવવા માટે ૬ જૂને ટ્રમ્પ અને એલોન મસ્ક વચ્ચે મુલાકાતનું આયોજન કર્યું છે. જોકે, જ્યારે ટ્રમ્પને આ મુલાકાતના સમયપત્રક વિશે પૂછવામાં આવ્યું, ત્યારે તેમણે એલોન મસ્કને મળવાનો સ્પષ્ટ ઇનકાર કરી દીધો.
વિવાદનું મૂળ: EV ટેક્સ પ્રોત્સાહનો અને સબસિડી:
ટ્રમ્પે ગુરુવારે દાવો કર્યો હતો કે તેમણે એલોન મસ્કને ભૂતકાળમાં ઘણી મદદ કરી હતી, પરંતુ હવે તેઓ મસ્કથી ખૂબ નિરાશ છે. ટ્રમ્પે આરોપ લગાવ્યો કે ઇલેક્ટ્રિક વાહનો (Electric Vehicles EV) સંબંધિત ટેક્સ પ્રોત્સાહનો (Tax Incentives) દૂર કરવાથી મસ્ક ગુસ્સે થયા છે. આના જવાબમાં, મસ્કે દાવો કર્યો હતો કે તેમને આ બિલ વિશે એકવાર પણ કહેવામાં આવ્યું ન હતું અને તે મધ્યરાત્રિએ પસાર થઈ ગયું હતું. મસ્કે તો ત્યાં સુધી કહી દીધું હતું કે, "ટ્રમ્પ મારા કારણે ચૂંટણી જીત્યા હતા. જો હું ત્યાં ન હોત તો ટ્રમ્પની હાર નિશ્ચિત હતી."
ટ્રમ્પે જણાવ્યું હતું કે જ્યારે તેમણે ઇલેક્ટ્રિક વાહનો સંબંધિત મસ્કના કાનૂની આદેશને પાછો ખેંચી લીધો, ત્યારે મસ્ક ગુસ્સે થયા હતા. ટ્રમ્પે મસ્કની કંપનીઓને આપવામાં આવતી સબસિડી (Subsidy) સમાપ્ત કરવાની પણ ધમકી આપી હતી. આ ધમકી બાદ એલોન મસ્ક પણ ખુલ્લેઆમ મેદાનમાં કૂદી પડ્યા હતા અને તેમણે અવકાશયાત્રીઓ (Astronauts) અને અન્ય વસ્તુઓને આંતરરાષ્ટ્રીય અવકાશ મથક (International Space Station) પર લઈ જવા માટે ઉપયોગમાં લેવાતા સ્પેસ કેપ્સ્યુલ્સની (Space Capsules) સેવાઓ સ્થગિત કરવાની ધમકી આપી હતી.
ટોપ સ્ટોરી
ટ્રેન્ડિંગ સમાચાર
