ત્રીજા વિશ્વયુદ્ધના ભણકારા? ટ્રમ્પે આ દેશના પ્રમુખને ફોન પર આપી ધમકી, કહ્યું - ‘જીવ બચાવવો હોય તો દેશ છોડી દો...’
ડ્રગ્સ માફિયાઓ સામે અમેરિકાનું રૌદ્ર સ્વરૂપ: કેરેબિયન સમુદ્રમાં યુદ્ધજહાજો ખડકાયા, 15,000 સૈનિકો તૈયાર – ટ્રમ્પે એરસ્પેસ લોકડાઉન સાથે જમીની યુદ્ધના સંકેત આપ્યા.
Donald Trump threat: અમેરિકા અને વેનેઝુએલા વચ્ચેનો તણાવ હવે યુદ્ધના આરે પહોંચી ગયો છે. યુએસ પ્રેસિડેન્ટ ડોનાલ્ડ ટ્રમ્પે વેનેઝુએલાના રાષ્ટ્રપતિ નિકોલસ માદુરોને ટેલિફોનિક વાતચીતમાં સ્પષ્ટ શબ્દોમાં ચેતવણી આપી છે કે તેઓ પરિવાર સહિત તાત્કાલિક દેશ છોડી દે, અન્યથા પરિણામ ભોગવવા તૈયાર રહે. જોકે, માદુરોએ આ પ્રસ્તાવ ફગાવી દેતાં વાતચીત પડી ભાંગી છે. ડ્રગ્સની હેરાફેરીના આક્ષેપો સાથે અમેરિકાએ વેનેઝુએલાની એરસ્પેસ સીલ કરી દીધી છે અને USS Gerald Ford જેવા મહાકાય યુદ્ધજહાજો તૈનાત કરી દીધા છે, જે એક મોટા લશ્કરી સંઘર્ષનો ઈશારો કરે છે.
વ્હાઇટ હાઉસથી સીધી ધમકી: "માદુરો, તમારો સમય પૂરો થયો છે" દક્ષિણ અમેરિકાના રાજકારણમાં ભારે ઉથલપાથલ મચી છે. વધતા જતા તણાવ વચ્ચે, યુએસ રાષ્ટ્રપતિ ડોનાલ્ડ ટ્રમ્પે રવિવારે (30 નવેમ્બર, 2025) પુષ્ટિ કરી હતી કે તેમણે વેનેઝુએલાના રાષ્ટ્રપતિ નિકોલસ માદુરો સાથે ફોન પર વાત કરી છે. મિયામી હેરાલ્ડના વિશેષ અહેવાલ મુજબ, આ કોઈ સામાન્ય કૂટનીતિક વાતચીત નહોતી પરંતુ એક ખુલ્લી ચેતવણી હતી.
ટ્રમ્પે માદુરોને સ્પષ્ટ શબ્દોમાં કહ્યું હતું કે, "જો તમે તમારી અને તમારા પરિવારની સલામતી ઈચ્છતા હોવ, તો તાત્કાલિક વેનેઝુએલા છોડીને ચાલ્યા જાઓ." ટ્રમ્પે માદુરો, તેમના પત્ની સિલિયા ફ્લોરેસ અને પુત્રને દેશમાંથી સુરક્ષિત બહાર નીકળવાનો માર્ગ (Safe Passage) આપવાની ઓફર કરી હતી. શરત માત્ર એટલી હતી કે તેઓ સત્તા છોડીને દેશત્યાગ કરે. જોકે, વેનેઝુએલા સરકારે આને શરણાગતિ ગણીને પ્રસ્તાવનો અસ્વીકાર કર્યો હતો, જેના પરિણામે બંને દેશો વચ્ચેની સંભવિત શાંતિ વાટાઘાટો નિષ્ફળ ગઈ છે.
આકાશમાં નાકાબંધી: ડ્રગ્સ સામે ઝીરો ટોલરન્સ અમેરિકા લાંબા સમયથી વેનેઝુએલા પર "નાર્કો-ટેરરિઝમ" અને ડ્રગ્સ સપ્લાયનો આરોપ લગાવતું આવ્યું છે. આ લડાઈને વધુ ઉગ્ર બનાવતા, ટ્રમ્પે વેનેઝુએલાના હવાઈ ક્ષેત્ર (Airspace) ને સંપૂર્ણપણે બંધ કરવાની ઘોષણા કરી છે. ટ્રુથ સોશિયલ પ્લેટફોર્મ પર તેમણે લખ્યું કે, "તમામ એરલાઇન્સ, પાઇલટ્સ અને ડ્રગ કાર્ટેલ્સને ચેતવણી આપવામાં આવે છે કે વેનેઝુએલાની આસપાસના હવાઈ માર્ગો બંધ કરવામાં આવી રહ્યા છે." સામે પક્ષે, માદુરો સરકારે આ પગલાંને આંતરરાષ્ટ્રીય કાયદાનું ઉલ્લંઘન અને રાષ્ટ્રની સાર્વભૌમત્વ પરનો હુમલો ગણાવ્યો છે.
શું કેરેબિયન સમુદ્ર રણમેદાન બનશે? હવાઈ માર્ગો બંધ કર્યા બાદ હવે સૌથી મોટો પ્રશ્ન એ છે કે શું અમેરિકા જમીની આક્રમણ (Ground Invasion) કરશે? આશંકાઓ પ્રબળ બની રહી છે કારણ કે અમેરિકાએ કેરેબિયન સમુદ્રમાં લશ્કરી ગતિવિધિઓ અત્યંત તેજ કરી દીધી છે. તાજેતરના આંકડાઓ દર્શાવે છે કે:
અમેરિકાએ કેરેબિયનમાં ડ્રગ્સ વિરોધી ઓપરેશન હેઠળ 20 થી વધુ શંકાસ્પદ જહાજો પર હુમલા કર્યા છે.
આ કાર્યવાહીમાં અત્યાર સુધીમાં 80 થી વધુ લોકો માર્યા ગયા હોવાના અહેવાલ છે.
થેંક્સગિવીંગ ડે પર યુદ્ધના ભણકારા ગુરુવારે (27 નવેમ્બર, 2025), થેંક્સગિવીંગ ડેના રોજ સૈનિકોને સંબોધતા રાષ્ટ્રપતિ ટ્રમ્પે જે સંકેતો આપ્યા હતા તે ગંભીર હતા. તેમણે કહ્યું હતું કે, "અમે હવે તેમને જમીન પરથી જ રોકવાનું શરૂ કરીશું. ગ્રાઉન્ડ ઓપરેશન વધુ સરળ રહેશે અને તે બહુ જલ્દી શરૂ થશે."
આ માત્ર નિવેદન નથી, પરંતુ અમેરિકાએ તૈયારીઓ પણ કરી લીધી છે. આ વિસ્તારમાં અમેરિકન નેવીનું અત્યાધુનિક એરક્રાફ્ટ કેરિયર 'USS Gerald Ford' તૈનાત કરી દેવામાં આવ્યું છે. તેની સાથે જ અંદાજે 15,000 જેટલા સશસ્ત્ર અમેરિકન સૈનિકો સ્ટેન્ડબાય પર છે. આ તૈયારીઓ જોઈને લાગે છે કે આગામી દિવસોમાં લેટિન અમેરિકામાં એક મોટો લોહિયાળ સંઘર્ષ ફાટી નીકળી શકે છે.
ટોપ સ્ટોરી
ટ્રેન્ડિંગ સમાચાર
