ટ્રમ્પની થાઈલેન્ડ-કંબોડિયાને ધમકીઃ ભારત-પાકિસ્તાન યુદ્ધનો ઉલ્લેખ કરતાં કહ્યું - "જો યુદ્ધ બંધ નહીં થાય, તો કોઈ ટ્રેડ ડીલ નહીં થાય"
ડોનાલ્ડ ટ્રમ્પ થાઈલેન્ડ અને કંબોડિયા વચ્ચે ચાલી રહેલા સરહદી વિવાદ અને લશ્કરી અથડામણમાં સક્રિયપણે સામેલ થયા છે. સોશિયલ પર એક પોસ્ટ શેર કરીને બંને દેશોને તાત્કાલિક યુદ્ધ બંધ કરવાની ધમકી આપી છે.
Donald Trump threatens Cambodia and Thailand: યુએસ પ્રમુખ ડોનાલ્ડ ટ્રમ્પ થાઈલેન્ડ અને કંબોડિયા વચ્ચે ચાલી રહેલા સરહદી વિવાદ અને લશ્કરી અથડામણમાં સક્રિયપણે સામેલ થયા છે. શનિવારે (જુલાઈ 26, 2025), ટ્રમ્પે ટ્રુથ સોશિયલ પર એક પોસ્ટ શેર કરીને બંને દેશોને તાત્કાલિક યુદ્ધ બંધ કરવાની ધમકી આપી છે. તેમણે થાઈલેન્ડના કાર્યકારી વડા પ્રધાન અને કંબોડિયાના વડા પ્રધાન બંને સાથે વાતચીત કરી છે અને સ્પષ્ટ કર્યું છે કે જો યુદ્ધવિરામ અને શાંતિ સ્થાપિત નહીં થાય, તો અમેરિકા તેમની સાથે કોઈપણ વેપાર કરાર નહીં કરે. આ સંઘર્ષ 118 વર્ષ જૂના પ્રીહ વિહાર (શિખેશ્વર) મંદિરના અધિકારોને લઈને ચાલી રહ્યો છે, જેણે હવે ભયાવહ સ્વરૂપ ધારણ કર્યું છે.
ટ્રમ્પનો હસ્તક્ષેપ અને ધમકી
ડોનાલ્ડ ટ્રમ્પે શનિવારે (જુલાઈ 26, 2025) પોતાના સોશિયલ મીડિયા પ્લેટફોર્મ ટ્રુથ સોશિયલ પર એક પોસ્ટ શેર કરતાંજણાવ્યું કે તેમણે થાઈલેન્ડના કાર્યકારી વડા પ્રધાન સાથે ખૂબ જ સકારાત્મક વાતચીત કરી છે અને થાઈલેન્ડ કંબોડિયાની જેમ તાત્કાલિક યુદ્ધવિરામ અને શાંતિ ઈચ્છે છે. આ પછી, તેમણે કંબોડિયાના વડા પ્રધાન સાથે પણ વાત કરી હતી.
ટ્રમ્પે પોતાની પોસ્ટમાં સ્પષ્ટપણે કહ્યું કે, "બંને પક્ષો સાથે વાત કર્યા પછી, એવું લાગે છે કે યુદ્ધવિરામ, શાંતિ અને સમૃદ્ધિ સ્વાભાવિક રીતે શક્ય છે. હવે આપણે ટૂંક સમયમાં જોઈશું કે આગળ શું થાય છે!" તેમણે વધુમાં ભારપૂર્વક જણાવ્યું કે, "બંને પક્ષો તાત્કાલિક યુદ્ધવિરામ અને શાંતિ ઈચ્છે છે. તેઓ અમેરિકા સાથે ફરીથી વેપાર વાટાઘાટો શરૂ કરવા પણ ઈચ્છે છે, પરંતુ મારું માનવું છે કે યુદ્ધ બંધ ન થાય ત્યાં સુધી વેપાર વિશે વાત કરવી યોગ્ય નથી." આ નિવેદન દ્વારા ટ્રમ્પે બંને દેશોને સ્પષ્ટ સંદેશ આપ્યો છે કે શાંતિ સ્થાપિત ન થાય ત્યાં સુધી અમેરિકા તરફથી કોઈ વેપાર સંબંધો આગળ વધશે નહીં.
યુદ્ધની ગંભીર પરિસ્થિતિ
થોડા વર્ષો પહેલા સુધી કટ્ટર મિત્રો રહેલા કંબોડિયા અને થાઈલેન્ડ હવે એકબીજાના અસ્તિત્વને ભૂંસી નાખવા માટે તૈયાર હોય તેવું લાગી રહ્યું છે. બંને દેશો વચ્ચેનું યુદ્ધ દિવસેને દિવસે વધુ ઉગ્ર બની રહ્યું છે. થાઈલેન્ડ તરફથી F-16 ફાઈટર પ્લેન અને તોપો દ્વારા હુમલાઓ કરવામાં આવી રહ્યા છે. બીજી તરફ, કંબોડિયાએ સરહદી વિસ્તારોમાં લેન્ડમાઈન્સનું એવું જાળું બિછાવી દીધું છે કે થાઈલેન્ડ ફક્ત હવાઈ હુમલા જ કરી શકે છે, પરંતુ જમીની માર્ગે સરહદમાં પ્રવેશ કરી શકતું નથી.
અહેવાલો અનુસાર, કંબોડિયા રશિયન BM-21 રોકેટ સિસ્ટમનો ઉપયોગ કરીને થાઈલેન્ડને ભારે નુકસાન પહોંચાડી રહ્યું છે. જુલાઈ 25 ના રોજ ઓડારમીચે પ્રાંતમાં કંબોડિયાના સૈનિકો BM-21 રોકેટ લોન્ચર ટ્રક લઈને જતા જોવા મળ્યા હોવાની ઘણી તસવીરો વાયરલ થઈ હતી. આ ઉપરાંત, RM-70 મલ્ટીપલ લોન્ચ રોકેટ સિસ્ટમથી પણ હુમલા કરવામાં આવ્યા છે.
યુદ્ધના પહેલા દિવસે થાઈલેન્ડે F-16 ફાઈટર પ્લેન ઉતાર્યા હતા, જેનાથી લાગતું હતું કે તે કંબોડિયાને પરાજિત કરી દેશે. પરંતુ 24 કલાકની અંદર, કંબોડિયાએ પોતાની યુદ્ધ નીતિથી થાઈલેન્ડને આશ્ચર્યચકિત કરી દીધું.
વ્યાપક યુદ્ધ અને વિસ્થાપન
એશિયામાં યુદ્ધનો વ્યાપ વધી રહ્યો હોય તેવું લાગી રહ્યું છે. રશિયા-યુક્રેન, ઇઝરાયલ-ગાઝા, ભારત-પાકિસ્તાન, ઇઝરાયલ-ઈરાન અને ઇઝરાયલ-યમન પછી, હવે કંબોડિયા-થાઈલેન્ડ યુદ્ધે પણ ભયાનક સ્વરૂપ ધારણ કર્યું છે. સરહદ પર દિવસ-રાત રોકેટ અને તોપમારા થઈ રહ્યા છે. થાઈ સૈન્યના મોરચાને રોકવાના કંબોડિયા તરફથી કોઈ સંકેતો નથી. થાઈલેન્ડે પોતાની સેના સરહદ તરફ મોકલી હતી, પરંતુ કંબોડિયાની લેન્ડમાઈનોએ થાઈલેન્ડના ટેન્ક અને સશસ્ત્ર વાહનોને રોકી દીધા. થાઈલેન્ડની વાયુસેનાએ નાગરિકોને સરહદથી 20-40 કિલોમીટર દૂર રહેવાની સલાહ આપી છે અને સોશિયલ મીડિયા પર લશ્કરી માહિતી શેર કરવાની મનાઈ ફરમાવી છે.
જ્યારે કંબોડિયાએ મેડ ઇન રશિયા રોકેટ છોડ્યા, ત્યારે થાઈલેન્ડે ડ્રોન હુમલો કરીને જવાબ આપ્યો. થાઈ સેનાએ દાવો કર્યો હતો કે તેઓએ પ્રીહ વિહાર મંદિર નજીક કંબોડિયાના શસ્ત્ર ડેપો પર હુમલો કર્યો હતો. રોયલ થાઈ આર્મી દ્વારા બહાર પાડવામાં આવેલા વીડિયોમાં ઓછામાં ઓછા પાંચ સ્થળોએ બોમ્બ ફેંકવામાં આવ્યા હોવાનું દેખાય છે. થાઈ સેનાએ દાવો કર્યો છે કે 1,30,000 લોકોને સરહદ પરથી દૂર કરવામાં આવ્યા છે. સરહદના 12 વિસ્તારોમાં ભારે તોપમારો થયો હતો. સુરીન, ઉબોન રત્ચાથની અને બુરીરામ જેવા વિસ્તારો ખાલી કરાવવામાં આવ્યા છે. થાઈલેન્ડનો આરોપ છે કે કંબોડિયા જાણી જોઈને નાગરિક વિસ્તારોને નિશાન બનાવી રહ્યું છે.
કંબોડિયાએ સરહદને અડીને આવેલા આઠ જિલ્લાઓમાં માર્શલ લો લાદી દીધો છે, જ્યારે થાઈલેન્ડે યુદ્ધવિરામ પર વિચાર કરવાનો ઇનકાર કર્યો છે. પરિણામે, યુદ્ધનો કોઈ અંત નથી લાગતો. અહેવાલો અનુસાર, થાઈ સેના કંબોડિયાની સરહદમાં 300 મીટર અંદર ઘૂસી ગઈ છે. થાઈ સેના મયૂન અને થોમ વિસ્તારોમાં હાજર છે. મોડી રાત્રે, થાઈ સેનાએ ઝડપી હુમલા કર્યા. આ સંઘર્ષ 817 કિલોમીટર લાંબી સરહદના ઘણા ભાગોમાં ફેલાઈ ગયો છે.
વિવાદનું મૂળ: પ્રીહ વિહાર મંદિર
થાઈલેન્ડ અને કંબોડિયા વચ્ચેના આ વિવાદનું કેન્દ્ર પ્રીહ વિહાર મંદિર છે. આ 118 વર્ષ જૂનો વિવાદ છે. 1907 માં થયેલા કરાર અને 1962 માં આંતરરાષ્ટ્રીય અદાલતના નિર્ણય છતાં, બંને દેશો આ પ્રાચીન મંદિર પર પોતાનો દાવો કરી રહ્યા છે. 2008 માં યુનેસ્કો દ્વારા તેને વર્લ્ડ હેરિટેજ સાઇટ જાહેર કર્યા પછી આ વિવાદ વધુ ઉગ્ર બન્યો છે, અને હવે તે આંતરરાષ્ટ્રીય દખલગીરી સુધી પહોંચી ગયો છે.
ટોપ સ્ટોરી
ટ્રેન્ડિંગ સમાચાર
