મ્યાનમારમાં ફરી ભૂકંપનો આંચકો, રિક્ટર સ્કેલ પર 5.1ની તીવ્રતા, ગઈકાલથી ત્રીજી વખત ધરતી ધ્રૂજી
૫.૧ની તીવ્રતાના આંચકાથી લોકોમાં ફફડાટ, ગઈકાલના ૭.૭ના ભૂકંપમાં ૧૦૦૦થી વધુના મોત, ભારત દ્વારા સહાયનો હાથ લંબાવ્યો.
Myanmar earthquake today: મ્યાનમારમાં ભૂકંપના આંચકાઓનો સિલસિલો યથાવત છે. આજે ફરી એકવાર રિક્ટર સ્કેલ પર ૫.૧ની તીવ્રતાનો ભૂકંપ અનુભવાયો હતો, જેના કારણે અનેક વિસ્તારોમાં ગભરાટનો માહોલ ફેલાઈ ગયો છે. ગઈકાલથી અત્યાર સુધીમાં મ્યાનમારમાં ત્રણ વખત ધરતી ધ્રૂજી છે, જેમાં ગઈકાલે આવેલા બે મોટા ભૂકંપોએ દેશમાં ભારે તબાહી સર્જી છે. સતત આવી રહેલા આંચકાઓના કારણે લોકો ભયભીત છે અને ઘણા વિસ્તારોમાં અરાજકતા જેવી સ્થિતિ જોવા મળી રહી છે.
આજે સવારે અનુભવાયેલા ભૂકંપની તીવ્રતા રિક્ટર સ્કેલ પર ૫.૧ નોંધવામાં આવી છે અને તેનું કેન્દ્રબિંદુ રાજધાની નેપ્યિડો નજીક હોવાનું માનવામાં આવે છે. આ આંચકાએ ગઈકાલના વિનાશક ભૂકંપથી ત્રસ્ત લોકોને વધુ ડરાવી દીધા છે. લોકો પોતાના ઘરો અને આશ્રયસ્થાનો છોડીને ખુલ્લા મેદાનો તરફ દોડી ગયા હતા.
ઉલ્લેખનીય છે કે મ્યાનમારમાં શુક્રવારે ૭.૭ની તીવ્રતાનો એક અત્યંત વિનાશક ભૂકંપ આવ્યો હતો. નેશનલ સેન્ટર ફોર સિસ્મોલોજી (NCS) અનુસાર, આ ભૂકંપ રાત્રે ૧૧:૫૬ વાગ્યે (સ્થાનિક સમય) અનુભવાયો હતો. ત્યારબાદ થોડા સમય પછી ૪.૨ની તીવ્રતાનો બીજો આંચકો પણ આવ્યો હતો. NCSના જણાવ્યા અનુસાર, આજનો ૫.૧ની તીવ્રતાનો ભૂકંપ જમીનથી ૧૦ કિલોમીટરની ઊંડાઈએ આવ્યો હતો, જેના કારણે આફ્ટરશોક્સની શક્યતા વધી ગઈ છે. ગઈકાલના ભૂકંપને કારણે દેશમાં ભારે વિનાશ થયો છે. સ્થાનિક મીડિયાના અહેવાલ મુજબ, અત્યાર સુધીમાં ૧૦૦૨ લોકોના મોત થયા છે અને ૧૬૭૦ લોકો ઘાયલ થયા છે. હજુ પણ ઘણા લોકો કાટમાળ નીચે દટાયેલા હોવાની આશંકા છે, જેના કારણે મૃત્યુઆંક વધવાની શક્યતા છે.
દરમિયાન, શનિવારે સવારે ૫:૧૬ વાગ્યે અફઘાનિસ્તાનમાં પણ ભૂકંપના આંચકા અનુભવાયા હતા. જમીનથી ૧૮૦ કિલોમીટરની ઊંડાઈએ આવેલા આ ભૂકંપની તીવ્રતા રિક્ટર સ્કેલ પર ૪.૭ માપવામાં આવી હતી. જો કે, અફઘાનિસ્તાનમાંથી હજુ સુધી કોઈ જાનહાનિ કે સંપત્તિના નુકસાનના સમાચાર મળ્યા નથી. આ ભૂકંપ મ્યાનમાર અને થાઈલેન્ડમાં આવેલા શક્તિશાળી ભૂકંપના એક દિવસ પછી આવ્યો છે, જેમાં સેંકડો લોકોએ જીવ ગુમાવ્યા છે અને ઇમારતો, બૌદ્ધ સ્તૂપ, રસ્તાઓ અને પુલોને ભારે નુકસાન થયું છે.
આ કુદરતી આપત્તિમાં મ્યાનમારની મદદ માટે ભારત આગળ આવ્યું છે. વડાપ્રધાન નરેન્દ્ર મોદીએ મ્યાનમારના વરિષ્ઠ જનરલ એચ.ઈ. મીન આંગ હલાઈંગ સાથે વાત કરીને ઊંડી સંવેદના વ્યક્ત કરી હતી અને રાહત તેમજ બચાવ કામગીરી માટે #OperationBrahma હેઠળ તાત્કાલિક મદદ મોકલવાની માહિતી આપી હતી. ભારત દ્વારા મોકલવામાં આવેલી આપત્તિ રાહત સામગ્રી, માનવતાવાદી સહાય અને બચાવ ટીમો ટૂંક સમયમાં અસરગ્રસ્ત વિસ્તારોમાં પહોંચી જશે.
મ્યાનમારમાં સતત આવી રહેલા ભૂકંપોને કારણે સ્થિતિ અત્યંત ચિંતાજનક બની ગઈ છે. લોકો ભયના ઓથાર હેઠળ જીવી રહ્યા છે અને અનેક વિસ્તારોમાં રાહત અને બચાવ કાર્ય ચાલી રહ્યું છે. આ કુદરતી હોનારતમાં અસરગ્રસ્તોને તાત્કાલિક સહાયની જરૂર છે.
ટોપ સ્ટોરી
ટ્રેન્ડિંગ સમાચાર
