ટ્રમ્પ હવે એકલા પડશે? ઈરાન સામે ગ્રાઉન્ડ વોર લડવા ઇઝરાયલે હાથ ઊંચા કરી દીધા!

અમેરિકા અને ઈરાન વચ્ચેના તણાવમાં ઈઝરાયલે હાથ અધ્ધર કર્યા; જો ગ્રાઉન્ડ ઓપરેશન થશે તો અમેરિકાએ હવે એકલા હાથે જ લડવું પડશે.

Israel Military Ground Operations Iran Netanyahu Trump US Iran War

Source : White House

Show Quick Read

Key points generated by AI, verified by newsroom

• ઇઝરાયલ ઈરાનમાં જમીની કાર્યવાહી કરશે નહીં.
• ઇઝરાયલ હિઝબુલ્લાહ પર ધ્યાન કેન્દ્રિત કરશે.
• અમેરિકા ઈરાન સામે એકલું લડશે.
• પેન્ટાગોન ઈરાન માટે સૈનિકો મોકલી રહ્યું છે.

મિડલ ઈસ્ટમાં ઈરાન અને અમેરિકા વચ્ચે યુદ્ધના વાદળો ઘેરાઈ રહ્યા છે, ત્યારે ઈઝરાયલના વડાપ્રધાન બેન્જામિન નેતન્યાહૂએ અમેરિકાના રાષ્ટ્રપતિ ડોનાલ્ડ ટ્રમ્પને મોટો ફટકો આપ્યો છે. ઈઝરાયલે એકદમ સ્પષ્ટ કરી દીધું છે કે, તેમની સેના ઈરાનમાં ઘૂસીને કોઈ જમીની કાર્યવાહી (ગ્રાઉન્ડ ઓપરેશન) નહીં કરે. ઈઝરાયલના આ ખુલ્લા એલાનથી હવે પરિસ્થિતિ એવી બની ગઈ છે કે, જો ઈરાન સામે જમીની યુદ્ધ છેડાય છે, તો તેનો સંપૂર્ણ ભાર માત્ર અમેરિકાના ખભા પર આવી જશે અને તેણે એકલા જ લડવું પડશે.

ઈઝરાયલે કેમ લીધો આવો નિર્ણય?

ઈઝરાયલી મીડિયાના અહેવાલો મુજબ, ઈઝરાયલે પોતાની સરહદોની સુરક્ષા જાળવી રાખવા અને દક્ષિણ લેબનોનમાં આતંકી સંગઠન હિઝબુલ્લાહ સામેના પોતાના સૈન્ય અભિયાન પર પૂરું ધ્યાન કેન્દ્રિત કરવા માટે આ નિર્ણય લીધો છે. ઈઝરાયલનું કહેવું છે કે તે ઈરાન પર પોતાની હવાઈ અને દરિયાઈ કાર્યવાહી તો ચાલુ જ રાખશે, પરંતુ પોતાની સેનાને ઈરાનની જમીન પર લડવા માટે બિલકુલ નહીં મોકલે.

અમેરિકા માટે આંચકાજનક સ્થિતિ

ઈઝરાયલના આ પગલાને અમેરિકા માટે બહુ મોટો ઝટકો માનવામાં આવી રહ્યો છે. ઈઝરાયલની 'ચેનલ 12' ના એક રિપોર્ટમાં કહેવાયું છે કે, જો હવે અમેરિકા ઈરાન વિરુદ્ધ ગ્રાઉન્ડ ઓપરેશન શરૂ કરે છે, તો તેણે આ મિશન એકલા હાથે જ પૂરું કરવું પડશે. જોકે, ઈઝરાયલ અમેરિકાને ટેકનિકલ સપોર્ટ આપશે કે સિક્રેટ ઇન્ટેલિજન્સ (ગુપ્ત માહિતી) પૂરી પાડશે કે કેમ, તે હજુ સુધી સ્પષ્ટ કરવામાં આવ્યું નથી.

પેન્ટાગોનની તૈયારીઓ અને વધતું લશ્કર

આ તરફ, વોશિંગ્ટન પોસ્ટના એક રિપોર્ટ અનુસાર, અમેરિકાનું રક્ષા મંત્રાલય (પેન્ટાગોન) ઈરાનમાં જમીની કાર્યવાહી માટેની જોરશોરથી તૈયારીઓ કરી રહ્યું છે. ડોનાલ્ડ ટ્રમ્પના તાજેતરના નિવેદનો અને મિડલ ઈસ્ટમાં સતત વધી રહેલી અમેરિકન સૈન્યની હાજરી આ શક્યતાઓને વધુ પાક્કી કરી રહી છે.

પીટીઆઈ (PTI) ના રિપોર્ટ મુજબ, પેન્ટાગોન મિડલ ઈસ્ટમાં વધુ 10,000 જેટલા સૈનિકોને તૈનાત કરી રહ્યું છે. યુએસ સેન્ટ્રલ કમાન્ડે શનિવારે જ જાહેરાત કરી દીધી છે કે 2,500 મરીન કમાન્ડો સહિત 3,500 થી વધુ સૈનિકો પહેલેથી જ મિડલ ઈસ્ટમાં પહોંચી ગયા છે.

હવે ટ્રમ્પ શું નિર્ણય લેશે?

અમેરિકન રાષ્ટ્રપતિ ખરેખર આ ગ્રાઉન્ડ ઓપરેશનનો આદેશ આપશે કે કેમ, તેના પર હજુ સસ્પેન્સ છે. સંરક્ષણ નિષ્ણાતોનું માનવું છે કે, જો અમેરિકા આ લશ્કરી પગલું ભરશે તો તે ખૂબ જ જોખમી સાબિત થઈ શકે છે. કારણ કે આ ઓપરેશન પાર પાડવા માટે અમેરિકન સૈનિકોને ઘણા દિવસો સુધી ઈરાનની ધરતી પર રોકાવું પડી શકે છે. વોલ સ્ટ્રીટ જર્નલના એક અહેવાલ મુજબ, અમેરિકી અધિકારીઓએ જણાવ્યું છે કે ટ્રમ્પ હાલમાં પોતાના સૈન્ય સામેના જોખમોનો કાળજીપૂર્વક વિચાર કરી રહ્યા છે, પરંતુ જો પરિસ્થિતિની માંગ હશે તો તેઓ આ નિર્ણય લેવા માટે સંપૂર્ણપણે તૈયાર છે.

આ પણ વાંચો

અમેરિકાની સેના ઈરાનમાં ઘૂસશે? ઈરાનની 'તાબૂત'વાળી ધમકી વચ્ચે ડોનાલ્ડ ટ્રમ્પે લીધો મોટો નિર્ણય?