USA: અમેરિકાના ટેક્સાસમાં પૂરમાં અત્યાર સુધી 100થી વધુના મોત, અનેક લોકો ગુમ

અમેરિકાના ટેક્સાસમાં ભારે વરસાદને કારણે આવેલા પૂરમાં 100થી વધુ લોકો માર્યા ગયા છે

પ્રતિકાત્મક તસવીર

Source : Twitter

અમેરિકાના ટેક્સાસમાં ભારે વરસાદને કારણે આવેલા પૂરમાં 100થી વધુ લોકો માર્યા ગયા છે અને ઘણા લોકો હજુ પણ ગુમ છે, જેમાં કેમ્પમાં ગયેલી છોકરીઓનો પણ સમાવેશ થાય છે. વહીવટીતંત્ર લોકોને બચાવવા માટે મોટા પાયે બચાવ કામગીરી ચલાવી રહ્યું છે.  કેરોલિન લેવિટે જણાવ્યું હતું કે રાષ્ટ્રપતિ ટ્રમ્પ આ અઠવાડિયાના અંતમાં પૂરગ્રસ્ત વિસ્તારની મુલાકાત લઈ શકે છે. જોકે, ટ્રમ્પની મુલાકાત અંગે હજુ સુધી અંતિમ નિર્ણય લેવામાં આવ્યો નથી.

કેર કાઉન્ટીના અધિકારીઓના જણાવ્યા અનુસાર, ખરાબ રીતે પ્રભાવિત કેર કાઉન્ટીમાં જ્યાં કેમ્પ મિસ્ટિક અને અન્ય ઘણા સમર કેમ્પ આવેલા છે, શોધકર્તાઓને 28 બાળકો સહિત 84 લોકોના મૃતદેહ મળ્યા છે. મધ્ય ટેક્સાસમાં મૃત્યુઆંક અત્યાર સુધીમાં ઓછામાં ઓછો 104 થઈ ગયો છે.

સીબીએસ ન્યૂઝના અહેવાલ મુજબ, કટોકટી ટીમો ગુમ થયેલા લોકોને શોધવા અને અનેક કાઉન્ટીઓમાં નુકસાનનું મૂલ્યાંકન કરવા માટે 24 કલાક કામ કરી રહી છે. અધિકારીઓએ સોમવારે ચેતવણી આપી હતી કે જેમ જેમ વધુ વિસ્તારોમાં પહોંચવામાં આવશે અને શોધખોળ ચાલુ રહેશે, તેમ તેમ મૃત્યુઆંક વધવાની શક્યતા છે.

'ટ્રમ્પ પૂરગ્રસ્ત વિસ્તારની મુલાકાત લઈ શકે છે'

આ ઉપરાંત વ્હાઇટ હાઉસના પ્રેસ સેક્રેટરી કેરોલિન લેવિટે જણાવ્યું હતું કે સ્થાનિક અને ફેડરલ હવામાન સેવાઓએ પૂર પહેલા કેર કાઉન્ટી સમુદાયને પૂરતી ચેતવણી આપી હતી. તેમણે જણાવ્યું હતું કે રાષ્ટ્રપતિ ડોનાલ્ડ ટ્રમ્પ આ અઠવાડિયાના અંતમાં ટેક્સાસમાં પૂરગ્રસ્ત વિસ્તારની મુલાકાત લેશે. તેમણે કહ્યું હતું કે રાષ્ટ્રપતિ શુક્રવારે મુલાકાત લઇ જઈ શકે છે, પરંતુ આ સંદર્ભમાં હજુ સુધી અંતિમ નિર્ણય લેવામાં આવ્યો નથી.

તેમણે કહ્યું કે આ એક કુદરતી ઘટના છે. તે સમયે પૂર આવ્યું તે વહીવટીતંત્રનો દોષ નથી, પરંતુ સતત ચેતવણીઓ પહેલાથી જ આપવામાં આવી હતી અને ફરીથી રાષ્ટ્રીય હવામાન સેવાએ તેનું કામ કર્યું હતું.

તેમણે જણાવ્યું હતું કે 3 જૂલાઈના રોજ ઓસ્ટિન-સાન એન્ટોનિયોમાં NWS કાર્યાલયે સ્થાનિક અધિકારીઓ માટે એક બ્રીફિંગનું આયોજન કર્યું હતું અને બપોરે પૂરની ચેતવણી જાહેર કરી હતી. આ પછી 3 જૂલાઈની રાત્રે અને 4 જૂલાઈની સવારે ઘણી વખત પૂરની ચેતવણી આપવામાં આવી હતી, જે પૂરના ત્રણ કલાક પહેલા આપવામાં આવી હતી.

45 મિનિટમાં પાણીનું સ્તર 26 ફૂટ વધ્યું

શુક્રવારે વહેલી સવારે ભારે વરસાદને કારણે ગ્વાડાલૂપ નદીમાં જળસ્તર માત્ર 45 મિનિટમાં 26 ફૂટ (લગભગ 8મીટર) વધ્યું, જેના કારણે ટેક્સાસ હિલ કન્ટ્રી ક્ષેત્રમાં ભારે વિનાશ થયો.

સ્થાનિક અધિકારીઓના જણાવ્યા અનુસાર, કાર કાઉન્ટીમાં ઓછામાં ઓછા 68 લોકો માર્યા ગયા, જેમાં 28 બાળકોનો સમાવેશ થાય છે. ટ્રેવિસ, બર્નેટ, કેન્ડલ, વિલિયમસન અને ટોમ ગ્રીન જેવા અન્ય કાઉન્ટીઓમાં પણ મૃત્યુ નોંધાયા, જેના કારણે કુલ મૃત્યુઆંક 100થી વધુ થયો હતો.