(Source: Poll of Polls)
Afghanistan News : તાલિબાનને સત્તાવાર માન્યતા આપનાર પ્રથમ દેશ બન્યો રશિયા
Afghanistan News : રશિયા તાલિબાન સરકારને ઔપચારિક રીતે માન્યતા આપનાર પ્રથમ દેશ બન્યો હતો.
Afghanistan News : રશિયા તાલિબાન સરકારને ઔપચારિક રીતે માન્યતા આપનાર પ્રથમ દેશ બન્યો હતો. રાષ્ટ્રપતિ વ્લાદિમીર પુતિનના આદેશ પર મોસ્કોએ તાલિબાનને પ્રતિબંધિત સંગઠનોની યાદીમાંથી દૂર કરી દીધું છે. આ સાથે એક નવા યુગની શરૂઆત થઈ છે. સોવિયેત યુનિયન દરમિયાન અફઘાનિસ્તાન એક વમળમાં ફસાઈ ગયું હતું. તે રશિયા અને અમેરિકા વચ્ચે શીત યુદ્ધનો અડ્ડો બની ગયું હતુ. પછી સોવિયેત યુનિયને ત્યાં પોતાની સેના મોકલી. આનો સામનો કરવા માટે અમેરિકાએ પાકિસ્તાનની મદદથી મુજાહિદ્દીન તૈયાર કર્યા. જ્યારે રશિયન સેના ત્યાંથી પાછી હટી ગઈ, ત્યારે અફઘાનિસ્તાનને તેના પરિણામોનો સામનો કરવો પડ્યો. વર્લ્ડ ટ્રેડ ટાવર પર આતંકવાદી હુમલા પછી અમેરિકા અફઘાનિસ્તાનમાં પાછું ફર્યું. તાલિબાન હારી ગયું પણ અમેરિકા જીતી શક્યું નહીં અને 2020માં તેણે સેના પરત બોલાવી અને તે જ દિવસે તાલિબાને કાબૂલ પર કબજો કરી લીધો હતો.
Russia says it formally recognises the Taliban government in Afghanistan, becoming the first country to do so since 2021, reports AP
— Press Trust of India (@PTI_News) July 3, 2025
હવે પુતિનના આ નિર્ણયને માસ્ટરસ્ટ્રોક માનવામાં આવી રહ્યો છે. રશિયા સાથે ભારતની મિત્રતા જાણીતી છે. ઓપરેશન સિંદૂર દરમિયાન તાલિબાને પણ પાકિસ્તાનના દાવાઓ પર ભારતને ટેકો આપ્યો હતો. વિક્રમ મિસરી તાલિબાનના વિદેશ મંત્રીને પણ મળ્યા છે. પુતિનના નિર્ણય પછી ભારત પણ તાલિબાનને માન્યતા આપી શકે છે.
રશિયાનો નિર્ણય
રશિયન વિદેશ મંત્રાલયે કહ્યું હતું કે તેમને અફઘાનિસ્તાનના નવા રાજદૂત ગુલ હસન તરફથી પ્રમાણપત્ર મળ્યું છે. મંત્રાલયે કહ્યું કે અફઘાન સરકારની સત્તાવાર માન્યતા દ્વિપક્ષીય સહયોગને પ્રોત્સાહન આપશે.
અફઘાનિસ્તાનના વિદેશ મંત્રાલયે તેને એક ઐતિહાસિક પગલું ગણાવ્યું અને તાલિબાનના વિદેશ મંત્રી અમીર ખાન મુત્તાકીએ આ નિર્ણયનું સ્વાગત કર્યું હતું. તેને "અન્ય દેશો માટે સારું ઉદાહરણ" ગણાવ્યું હતું. અમેરિકા અને નાટો દળો પરત ફર્યા બાદ ઓગસ્ટ 2021માં તાલિબાને અફઘાનિસ્તાન પર કબજો કર્યો હતો. ત્યારથી તેઓ તેમના કડક ઇસ્લામિક કાયદાને લાગુ કરીને આંતરરાષ્ટ્રીય માન્યતા મેળવવાનો પ્રયાસ કરી રહ્યા છે.
અત્યાર સુધી કોઈ પણ દેશે તાલિબાનને ઔપચારિક માન્યતા આપી નથી પરંતુ તાલિબાને ઘણા દેશો સાથે ઉચ્ચ સ્તરીય વાટાઘાટો કરી છે અને ચીન અને સંયુક્ત આરબ અમીરાત સહિત કેટલાક દેશો સાથે રાજદ્વારી સંબંધો સ્થાપિત કર્યા છે.
તેમ છતાં મહિલાઓ પરના પ્રતિબંધોને કારણે તાલિબાન સરકાર વૈશ્વિક મંચ પર અલગ પડી ગઈ છે. જોકે તાલિબાને 1996થી 2001 સુધીના તેમના પહેલા શાસન કરતાં વધુ ઉદાર શાસનનું વચન આપ્યું હતું, પરંતુ 2021માં સત્તા સંભાળ્યા પછી તરત જ તેમણે મહિલાઓ અને છોકરીઓ પર પ્રતિબંધો લાદવાનું શરૂ કર્યું હતું.
રશિયન અધિકારીઓએ તાજેતરમાં અફઘાનિસ્તાનને સ્થિર કરવામાં મદદ કરવા માટે તાલિબાન સાથે વાતચીત કરવાની જરૂરિયાત પર ભાર મૂક્યો છે અને એપ્રિલમાં તાલિબાન પરનો પ્રતિબંધ ઉઠાવી લીધો છે. અફઘાનિસ્તાનમાં રશિયાના રાજદૂત દિમિત્રી ઝિરનોવે સરકારી ચેનલ વન ટેલિવિઝનને જણાવ્યું હતું કે તાલિબાન સરકારને સત્તાવાર માન્યતા આપવાનો નિર્ણય રાષ્ટ્રપતિ વ્લાદિમીર પુતિને વિદેશ પ્રધાન સર્ગેઈ લાવરોવની સલાહ પર લીધો હતો.
ટોપ સ્ટોરી
ટ્રેન્ડિંગ સમાચાર
