અમેરિકા-ઈરાન યુદ્ધમાં મોટી રાહત: ટ્રમ્પે હુમલાનો પ્લાન 5 દિવસ માટે ટાળ્યો, સમાધાનના મળ્યા સ્પષ્ટ સંકેત

48 કલાકના અલ્ટીમેટમ બાદ ડોનાલ્ડ ટ્રમ્પનો યુ-ટર્ન; કહ્યું- "છેલ્લા 2 દિવસથી ઈરાન સાથે સાર્થક વાતચીત ચાલી રહી છે, ડિફેન્સ વિભાગને પાવર પ્લાન્ટ પર હુમલો રોકવાનો આદેશ આપ્યો છે."

Trump Pauses Iran Power Plant Strikes, 5-Day De-escalation After Talks

Source : IANS

Show Quick Read

Key points generated by AI, verified by newsroom

• ઈરાન સાથે સકારાત્મક વાટાઘાટો બાદ ટ્રમ્પે હુમલાની યોજના મુલતવી રાખી.
• 48 કલાકનું અલ્ટીમેટમ આપ્યા બાદ ટ્રમ્પે યુ-ટર્ન લીધો.
• રાષ્ટ્રપતિ ટ્રમ્પે 'ટ્રુથ સોશિયલ' પર મુલતવીની જાહેરાત કરી.
• ઈરાને પણ અમેરિકન બેઝ ધરાવતા દેશો પર હુમલાની ધમકી આપી હતી.

મધ્ય પૂર્વમાં ચાલી રહેલા ભયંકર યુદ્ધ વચ્ચે આખી દુનિયા માટે એક મોટા અને રાહતના સમાચાર સામે આવ્યા છે. અમેરિકા અને ઈરાન વચ્ચે ચાલી રહેલો તણાવ હવે ધીમે ધીમે શાંત પડતો દેખાઈ રહ્યો છે. અમેરિકાના રાષ્ટ્રપતિ ડોનાલ્ડ ટ્રમ્પે જાહેરાત કરી છે કે તેમણે ઈરાનના પાવર પ્લાન્ટ અને ઉર્જા મથકો પર હુમલો કરવાની પોતાની યોજના હાલ પૂરતી 5 દિવસ માટે મુલતવી રાખી છે. ટ્રમ્પના જણાવ્યા અનુસાર, છેલ્લા 2 દિવસથી બંને દેશો વચ્ચે સમાધાન માટે ખૂબ જ સકારાત્મક અને સાર્થક વાતચીત ચાલી રહી છે. જો આ વાટાઘાટો અંતિમ તબક્કામાં સફળ રહેશે, તો અમેરિકા ઈરાન પર હુમલો નહીં કરે. ટ્રમ્પના આ નિર્ણયથી દુનિયાભરના દેશોએ મોટી રાહતનો શ્વાસ લીધો છે.

માત્ર એક દિવસમાં બદલાઈ ગઈ બાજી

તમને જણાવી દઈએ કે, આ નિર્ણય અચાનક લેવાયો નથી, પરંતુ તેમાં એક મોટો યુ-ટર્ન જોવા મળ્યો છે. માત્ર એક દિવસ પહેલા જ ડોનાલ્ડ ટ્રમ્પે ઈરાનને 48 કલાકનું આકરૂં અલ્ટીમેટમ આપ્યું હતું. તેમણે ખુલ્લી ચીમકી આપી હતી કે જો ઈરાન 'હોર્મુઝ સ્ટ્રેટ' (દરિયાઈ વેપારનો મુખ્ય માર્ગ) સંપૂર્ણપણે નહીં ખોલે, તો અમેરિકા તેમના પાવર પ્લાન્ટ્સ પર ભીષણ હુમલો કરીને તેને નષ્ટ કરી દેશે. પરંતુ હવે 48 કલાક પૂરા થાય તે પહેલા જ પરિસ્થિતિ બદલાઈ ગઈ છે અને યુદ્ધના કાળા વાદળો વિખેરાતા જોવા મળી રહ્યા છે.

ટ્રમ્પે સોશિયલ મીડિયા પર શું કહ્યું?

રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' (Truth Social) પર પોસ્ટ કરીને આ ઐતિહાસિક માહિતી આપી છે. તેમણે લખ્યું છે કે:

"છેલ્લા 2 દિવસમાં ઈરાન સાથે અત્યંત સકારાત્મક અને ઉત્પાદક ચર્ચાઓ થઈ છે. અમારો મુખ્ય ઉદ્દેશ્ય મધ્ય પૂર્વમાં ચાલી રહેલા સંઘર્ષનો કાયમી અને સંપૂર્ણ ઉકેલ શોધવાનો છે. બંને દેશો વચ્ચેની આ વાતચીત આખું અઠવાડિયું ચાલવાની છે, અને તેના સકારાત્મક માહોલને જોતા મેં યુએસ ડિપાર્ટમેન્ટ ઓફ ડિફેન્સ (પેન્ટાગોન) ને ઈરાનના પાવર પ્લાન્ટ્સ પરના તમામ લશ્કરી હુમલા 5 દિવસ માટે સ્થગિત કરી દેવાનો નિર્દેશ આપ્યો છે."

ટ્રમ્પે સ્પષ્ટ કર્યું છે કે હવે યુદ્ધ અંગેનો કોઈ પણ અંતિમ નિર્ણય આ વાતચીતના પરિણામ પર જ આધારિત રહેશે.

જ્યારે ઈરાને પણ આપી હતી જડબાતોડ ધમકી

અમેરિકા ભલે અત્યારે વાતચીતના ટેબલ પર આવી ગયું હોય, પરંતુ જ્યારે ટ્રમ્પે હુમલાની ધમકી આપી હતી ત્યારે ઈરાને પણ નમતું જોખ્યું નહોતું. ઈરાની સંસદના સ્પીકર મોહમ્મદ બાકર કાલિબાફ અને ઈસ્લામિક રિવોલ્યુશનરી ગાર્ડ કોર્પ્સ (IRGC) એ સ્પષ્ટ ચેતવણી આપી હતી કે જો અમેરિકા તેમના પર હુમલો કરશે, તો તેઓ પણ આખા પ્રદેશમાં અમેરિકન આર્મી બેઝ ધરાવતા દેશોના ઉર્જા મથકોને નિશાન બનાવશે. એટલું જ નહીં, ઈરાને એવી પણ જિદ પકડી હતી કે જ્યાં સુધી તેમના નુકસાન પામેલા પાવર પ્લાન્ટ ફરીથી બનાવવામાં નહીં આવે, ત્યાં સુધી તેઓ હોર્મુઝ સ્ટ્રેટ બંધ જ રાખશે.

આ પણ વાંચો

'ઈરાન દુનિયાના નકશા પરથી ભૂંસાઈ ગયું' થી લઈને 48 કલાકના અલ્ટીમેટમ સુધી: ડોનાલ્ડ ટ્રમ્પના બદલાતા નિવેદનોથી દુનિયા ગોટે ચડી!