ભારતને ધમકી આપનાર અમેરિકા પોતે રશિયા પાસેથી શું-શું ખરીદે છે? લિસ્ટ જોઈને ટ્રમ્પની ખુલી જશે પોલ
અમેરિકા રશિયા પાસેથી યુરેનિયમ જેવી મહત્વની વસ્તુઓ આયાત કરે છે. યુરેનિયમ યુએસના પરમાણુ ઊર્જા પ્લાન્ટ્સ માટે ખૂબ જ જરૂરી છે. આ ઉપરાંત, નિકલ, પેલેડિયમ અને ટાઇટેનિયમ જેવી અન્ય ધાતુઓ પણ ખરીદવામાં આવે છે.
U.S. imports from Russia 2025: ભારતને ટેરિફ વધારવાની ધમકી આપનાર અમેરિકા પોતે રશિયા પાસેથી મોટા પાયે વેપાર કરી રહ્યું છે. યુક્રેન-રશિયા યુદ્ધ અને રશિયા પર આંતરરાષ્ટ્રીય પ્રતિબંધો હોવા છતાં, અમેરિકાનું રશિયા સાથેનું ટ્રેડિંગ ચાલુ છે. તાજેતરમાં યુએસ પ્રમુખ ડોનાલ્ડ ટ્રમ્પે રશિયા પાસેથી તેલ ખરીદવા બદલ ભારત પર ટેરિફ લાદવાની ધમકી આપી હતી, પરંતુ આ આંકડા જોયા બાદ સ્પષ્ટ થાય છે કે અમેરિકા પોતે જ રશિયા પાસેથી કરોડો રૂપિયાની વસ્તુઓ આયાત કરે છે.
અમેરિકા અને રશિયા વચ્ચેનો વેપાર: આંકડા શું કહે છે?
આંકડા દર્શાવે છે કે અમેરિકા રશિયા પાસેથી મોટી માત્રામાં ચીજવસ્તુઓ ખરીદી રહ્યું છે. યુનાઇટેડ સ્ટેટ્સ ટ્રેડ રિપ્રેઝન્ટેટિવ (USTR) ના ડેટા મુજબ, 2024માં અમેરિકા અને રશિયા વચ્ચે કુલ $3.6 બિલિયન (અંદાજે 30,000 કરોડ રૂપિયા) કરતાં વધુનો વેપાર થયો હતો. આમાંથી, અમેરિકાએ રશિયા પાસેથી લગભગ $3 બિલિયન (અંદાજે 25,000 કરોડ રૂપિયા)ની આયાત કરી હતી, જ્યારે $550 મિલિયન (અંદાજે 4,600 કરોડ રૂપિયા)ની નિકાસ કરી હતી.
વર્ષ 2023માં પણ અમેરિકાએ રશિયા પાસેથી $4.5 બિલિયનની વસ્તુઓની આયાત કરી હતી અને $600 મિલિયનની નિકાસ કરી હતી. 2025માં પણ આ વેપાર ચાલુ રહ્યો છે. જાન્યુઆરીમાં, અમેરિકાએ રશિયા પાસેથી $196 મિલિયનની વસ્તુઓ ખરીદી હતી, અને માર્ચમાં $523 મિલિયનની વસ્તુઓ ખરીદી હતી.
અમેરિકા રશિયા પાસેથી શું ખરીદે છે?
અમેરિકા રશિયા પાસેથી મુખ્યત્વે નીચેની ચીજવસ્તુઓ આયાત કરે છે:
- ખનિજો અને ધાતુઓ: અમેરિકા રશિયા પાસેથી યુરેનિયમ જેવી મહત્વની વસ્તુઓ આયાત કરે છે. આ યુરેનિયમ યુએસના પરમાણુ ઊર્જા પ્લાન્ટ્સ માટે ખૂબ જ જરૂરી છે. આ ઉપરાંત, નિકલ, પેલેડિયમ અને ટાઇટેનિયમ જેવી અન્ય ધાતુઓ પણ મોટી માત્રામાં ખરીદવામાં આવે છે.
- ખાતરો: રશિયા વિશ્વના સૌથી મોટા ખાતર ઉત્પાદકોમાંનું એક છે. અમેરિકા તેની કૃષિ જરૂરિયાતો માટે રશિયા પાસેથી નાઇટ્રોજન અને પોટાશ આધારિત ખાતરોની આયાત કરે છે.
- રાસાયણિક ઉત્પાદનો: કેટલાક મહત્વના રાસાયણિક અને ઔદ્યોગિક ઉત્પાદનો, જેમ કે એમોનિયા અને અન્ય સંયોજનો પણ રશિયાથી અમેરિકામાં નિકાસ થાય છે.
અમેરિકા ભારત અને રશિયાના વેપાર સામે શા માટે વાંધો ઉઠાવે છે?
અમેરિકા ઈચ્છે છે કે ભારત રશિયા પાસેથી તેલ ખરીદવાનું બંધ કરે. આ પાછળનું મુખ્ય કારણ રશિયાના યુદ્ધ અર્થતંત્રને નબળું પાડવાનું છે. અમેરિકા અને તેના સાથી દેશો રશિયાના તેલ અને ગેસના વેચાણ પર પ્રતિબંધો લાદીને રશિયા પર દબાણ વધારવાનો પ્રયાસ કરી રહ્યા છે.
આ સંજોગોમાં ભારત માટે રશિયા સાથેનો વેપાર મહત્વનો છે, કારણ કે:
- તેલ: રશિયા ભારતનો સૌથી મોટો તેલ સપ્લાયર છે. ભારતની કુલ આયાતના લગભગ 38-40% તેલ રશિયા સપ્લાય કરે છે.
- કોલસો: 2023માં ભારતે રશિયા પાસેથી 10.06 મિલિયન મેટ્રિક ટન થર્મલ કોલસો આયાત કર્યો હતો.
- શસ્ત્રો: છેલ્લા 20 વર્ષમાં ભારતે રશિયા પાસેથી લગભગ $40 બિલિયનના શસ્ત્રો ખરીદ્યા છે.
- ખાતરો: ભારતના કૃષિ ક્ષેત્ર માટે જરૂરી એવા યુરિયા અને અન્ય નાઇટ્રોજન આધારિત ખાતરો પણ રશિયા દ્વારા સપ્લાય થાય છે.
ટોપ સ્ટોરી
ટ્રેન્ડિંગ સમાચાર
