રસોડામાં ગેસ સિલિન્ડર બોમ્બ ન બને! એક્સપાયરી ડેટ ક્યાં લખી હોય છે અને કેવી રીતે ઓળખવી? જાણો વિગતે

માહિતીના અભાવે જોખમી બની શકે છે સિલિન્ડરનો ઉપયોગ; કોડ સમજવાથી લીકેજ કે બ્લાસ્ટનો ખતરો ટાળી શકાય છે.

Gas Cylinder Expiry Date: આધુનિક સમયમાં ગેસ સિલિન્ડર આપણા રસોડાનો અભિન્ન અંગ બની ગયા છે, જે રસોઈને સરળ અને ઝડપી બનાવે છે. પરંતુ શું તમે જાણો છો કે ખાવા-પીવાની ચીજોની જેમ જ ગેસ સિલિન્ડરની પણ એક સમાપ્તિ તારીખ (એક્સપાયરી ડેટ) હોય છે?

ઘણા લોકો આ વિશે અજાણ હોય છે, અને માહિતીના અભાવે સમાપ્તિ તારીખ પછી પણ સિલિન્ડરનો ઉપયોગ કરતા રહે છે, જે ક્યારેક ગંભીર લીકેજ અથવા તો બ્લાસ્ટ જેવી ખતરનાક ઘટનાઓ નોતરી શકે છે.

તમારા સિલિન્ડરની સુરક્ષા અવધિ જાણવા માટે કોઈ રોકેટ સાયન્સની જરૂર નથી. આ અંગેની માહિતી સિલિન્ડર પર જ નોંધાયેલી હોય છે. દરેક સિલિન્ડરના ઉપરના ભાગે, જ્યાં રેગ્યુલેટર ફિટ થાય છે તે લોખંડની પટ્ટી પર, એક ખાસ કોડ (અક્ષર અને બે અંકો) અંકિત કરેલો હોય છે. આ કોડ જ સિલિન્ડરની સમાપ્તિ તારીખ દર્શાવે છે.