પોસ્ટની બચત યોજનાઓમાં રોકાણ કરી મહિલાઓ સારુ રિટર્ન મેળવી શકે, જાણો તેના વિશે

પોસ્ટની બચત યોજનાઓમાં રોકાણ કરી મહિલાઓ સારુ રિટર્ન મેળવી શકે, જાણો તેના વિશે

પ્રતિકાત્મક તસવીર

બેંકોની જેમ લોકો હવે પોસ્ટમાં પણ રોકાણ કરે છે. પોસ્ટમાં રોકાણ કરી તમે સારુ રિટર્ન મેળવી શકો છો. પોસ્ટમાં મહિલાઓ માટે પણ બચત યોજનાઓ ચાલે છે. જેમાં રોકાણ કરીને તમે સારુ ફંડ મેળવી શકો છો. આજે આપણે પોસ્ટ ઓફિસની તે 5 બચત યોજનાઓ વિશે જાણીશું જે મહિલાઓ માટે શ્રેષ્ઠ છે.

દીકરીઓના ભવિષ્યને સુરક્ષિત કરવા માટે સુકન્યા સમૃદ્ધિ બચત યોજના ખાસ કરીને બનાવવામાં આવી છે. આ યોજનામાં દીકરી 10 વર્ષની થાય તે પહેલાં રોકાણ કરી શકાય છે. આમાં રોકાણ કરવાથી વાર્ષિક 8.2% વ્યાજ દર મળે છે. ખાતું ખોલ્યા પછી તેને વધુમાં વધુ 15 વર્ષ સુધી ચલાવી શકાય છે. સુકન્યા સમૃદ્ધિ યોજનાના વ્યાજ દરની સમીક્ષા દર ત્રણ મહિને કરવામાં આવે છે. આ યોજના હેઠળ કરવામાં આવેલી થાપણો પણ કલમ 80C હેઠળ કર મુક્તિ માટે પાત્ર છે.

પોસ્ટ ઓફિસ માસિક આવક યોજના મહિલાઓ માટે બીજી સારી યોજના છે. આ યોજનામાં લઘુત્તમ રોકાણ રૂ. 1000 છે અને તે 7.4 % વ્યાજ દર આપે છે. આ યોજના આવકનો નિયમિત સ્ત્રોત બનાવવામાં મદદ કરે છે.

મહિલા સન્માન બચત પ્રમાણપત્ર એ મહિલા રોકાણકારો માટે એક અનોખી જોખમમુક્ત યોજના છે. બધી ઉંમરની મહિલાઓ તેમાં રોકાણ કરી શકે છે. આ યોજના હેઠળ એક ખાતામાં વધુમાં વધુ 2 લાખ રૂપિયા જમા કરાવી શકાય છે. અહીં તમને વાર્ષિક 7.5% વ્યાજ મળે છે અને એક વર્ષ પછી તમે તમારી જમા રકમના 40% ઉપાડી શકો છો.

રાષ્ટ્રીય બચત પ્રમાણપત્ર એક સલામત અને ઓછા જોખમવાળી યોજના છે, જે તમામ પ્રકારના રોકાણકારો માટે યોગ્ય છે. આમાં લઘુત્તમ રોકાણ 100 રૂપિયા છે અને તેની પાકતી મુદત 5 વર્ષ છે. અહીં 7.7 ટકા ચક્રવૃદ્ધિ વાર્ષિક વ્યાજ દર ઓફર કરવામાં આવી રહ્યો છે.

PPF યોજના એક ઉત્તમ લાંબા ગાળાની રોકાણ યોજના છે. આમાં ઓછામાં ઓછું 500 રૂપિયાનું રોકાણ કરવું પડશે અને તેના પર વાર્ષિક 7.1% વ્યાજ દર મળશે. આ યોજના લાંબા ગાળાના રોકાણકારો માટે સલામત અને ફાયદાકારક વિકલ્પ છે. આ બધી પોસ્ટ ઓફિસ યોજનાઓમાં રોકાણ કરીને, મહિલાઓ પોતાનું ભવિષ્ય સુરક્ષિત કરી શકે છે અને આર્થિક રીતે આત્મનિર્ભર બની શકે છે.