Arvalli Rain : અરવલ્લીમાં મેઘરાજાની તોફાની બેટિંગ, અનેક સોસાયટીઓમાં ભરાયા પાણી

સાબરકાંઠા અને અરવલ્લી જિલ્લામાં મેઘરાજાએ તોફાની બેટિંગ શરૂ કરી છે. મોડાસા, ધનસુરા અને હિંમતનગર સહિતના શહેરી અને ગ્રામ્ય વિસ્તારોમાં વરસેલા ધોધમાર વરસાદના કારણે ઠેર-ઠેર જળબંબાકારની સ્થિતિ સર્જાઈ છે.

ધોધમાર વરસાદના કારણે ઠેર-ઠેર જળબંબાકારની સ્થિતિ સર્જાઈ છે.

સાબરકાંઠા અને અરવલ્લી જિલ્લામાં મેઘરાજાએ તોફાની બેટિંગ શરૂ કરી છે. મોડાસા, ધનસુરા અને હિંમતનગર સહિતના શહેરી અને ગ્રામ્ય વિસ્તારોમાં વરસેલા ધોધમાર વરસાદના કારણે ઠેર-ઠેર જળબંબાકારની સ્થિતિ સર્જાઈ છે. માત્ર એક કલાકમાં જ દોઢ ઈંચ જેટલો વરસાદ ખાબકતાં સોસાયટીઓ અને મુખ્ય બજારો પાણીમાં ગરકાવ થઈ ગયા છે, જેને પગલે સ્થાનિક રહીશો અને વાહનચાલકો ભારે મુશ્કેલીમાં મુકાયા છે.

મોડાસામાં માત્ર એક જ કલાકમાં દોઢ ઈંચ જેટલો મુશળધાર વરસાદ તૂટી પડ્યો છે. આ આકાશી આફતને કારણે મોડાસા શહેરની પંચજ્યોત, આરાધના, કલ્યાણ-2 અને કેદારનાથ સોસાયટી સહિતના રહેણાંક વિસ્તારોમાં ઘૂંટણસમા પાણી ભરાઈ ગયા છે. આ તરફ ધનસુરામાં પણ દોઢ ઈંચ વરસાદથી જળબંબાકારની સ્થિતિ સર્જાઈ છે, જ્યાં મુખ્ય બજાર વિસ્તાર અને ચાર રસ્તા પર પાણી ફરી વળ્યા છે.

મોડાસાના ગ્રામ્ય પંથકમાં વરસાદની સ્થિતિ વધુ વિકટ બની છે. મોડાસાના સરડોઈ ગામે ઉપરવાસના ડુંગરોમાંથી વરસાદી પાણીનો પ્રવાહ સીધો ગામની અંદર ધસી આવ્યો હતો. ગામમાં ડુંગરના પાણીની ભારે આવક થતાં રસ્તાઓ પર નદી વહેતી હોય તેવા દ્રશ્યો સર્જાયા હતા. પાણીના વહેણ એટલા તીવ્ર હતા કે રસ્તા પર પાર્ક કરેલા અડધોઅડધ વાહનો પાણીમાં ડૂબી ગયા હતા.

અરવલ્લીના પ્રસિદ્ધ યાત્રાધામ શામળાજીમાં પણ ભારે વરસાદ ખાબક્યો છે. ભારે વરસાદના કારણે શામળાજી મંદિર તરફ જવાના મુખ્ય માર્ગ પર પાણી ભરાઈ ગયા છે. આ ઉપરાંત શામળાજીના સ્થાનિક બજારોમાં પણ પાણી ફરી વળતાં દર્શનાર્થે આવેલા યાત્રિકો અને સ્થાનિક વેપારીઓને ભારે હાલાકી ભોગવવી પડી રહી છે.

બીજી તરફ, સાબરકાંઠાના મુખ્ય મથક હિંમતનગર શહેરમાં પણ ધોધમાર વરસાદ નોંધાયો છે. શહેરના મોતીપુરા, સહકારીજીન, પોસ્ટ ઓફિસ અને ન્યાય મંદિર સહિતના વિસ્તારોમાં વરસાદી માહોલ જામ્યો છે. આ ઉપરાંત હિંમતનગર ગ્રામ્યના ગાંભોઈ, આગીયોલ, ગઢોડા, હડિયોલ, નિકોડા તેમજ આકોદરા, હાથરોલ, ભાવપુર અને સુરજપુર ગામોમાં પણ વહેલી સવારથી જ સાર્વત્રિક વરસાદ વરસી રહ્યો છે.