હવે WhatsApp પર બનશે આયુષ્માન કાર્ડ; જાણો સરકારી ઓફિસના ધક્કા વગરની સરળ પ્રોસેસ

સરકારી કચેરીઓના ધક્કા ખાવાની ઝંઝટ ખતમ, હવે માત્ર એક મેસેજથી 24 કલાક મળશે અનેક આરોગ્ય સેવાઓનો લાભ.

સામાન્ય નાગરિકોને આયુષ્માન કાર્ડ કઢાવવા માટે હવે સરકારી કચેરીઓના ધક્કા ખાવાની કે હેલ્પલાઇન નંબર પર કલાકો સુધી રાહ જોવાની કોઈ જ જરૂર નથી. કેન્દ્ર સરકારે નાગરિકોની સુવિધામાં મોટો વધારો કરતા એક મહત્વપૂર્ણ ડિજિટલ કદમ ઉઠાવ્યું છે.

સરકાર દ્વારા "આયુષ્માન સારથી" નામનો એક ખાસ WhatsApp ચેટબોટ શરૂ કરવામાં આવ્યો છે. આ નવી ડિજિટલ પહેલના કારણે તમે ઘરે બેઠા તમારા સ્માર્ટફોનથી જ આયુષ્માન ભારત પ્રધાનમંત્રી જન આરોગ્ય યોજના (AB PM-JAY) ની તમામ મુખ્ય સેવાઓનો 24 કલાક સીધો લાભ લઈ શકશો.

નેશનલ હેલ્થ ઓથોરિટી (NHA) દ્વારા તૈયાર કરવામાં આવેલો આ અત્યાધુનિક ચેટબોટ યોજનાની સત્તાવાર ડિજિટલ સિસ્ટમ સાથે સીધો જોડાયેલો છે. જેના કારણે લોકોને WhatsApp મારફતે એકદમ સુરક્ષિત અને રિયલ-ટાઇમમાં તમામ સુવિધાઓ મળી રહેશે.

આરોગ્ય મંત્રાલયના જણાવ્યા અનુસાર, આ ચેટબોટ માત્ર નવું કાર્ડ બનાવવા પૂરતો સીમિત નથી. લાભાર્થીઓ PM-JAY હેઠળ પોતાની યોગ્યતા ચકાસી શકશે, નવું કાર્ડ ડાઉનલોડ કરી શકશે, eKYC પૂર્ણ કરી શકશે અને પોતાનું આધાર કાર્ડ પણ લિંક કરી શકશે.

આ પ્લેટફોર્મ પર તાજેતરમાં 70 વર્ષ કે તેથી વધુ ઉંમરના વૃદ્ધો માટે શરૂ કરાયેલી 'આયુષ્માન વાયો વંદના કાર્ડ' યોજનાની સેવાઓ પણ ઉપલબ્ધ કરાવાઈ છે. આ ઉપરાંત, વપરાશકર્તાઓ તેમના વોલેટનું બેલેન્સ અને અત્યાર સુધીની સારવારનો ઇતિહાસ (ટ્રીટમેન્ટ હિસ્ટ્રી) પણ ચેક કરી શકશે.

તમારા ઘરની નજીક કઈ પેનલવાળી હોસ્પિટલો આવેલી છે તે શોધવું, કોઈ ફરિયાદ નોંધાવવી કે તેને ટ્રેક કરવી, અને સારવાર લઈ ડિસ્ચાર્જ થયા પછી તમારો અભિપ્રાય (ફીડબેક) આપવા જેવી તમામ સુવિધાઓ અહીં મળશે. મંત્રાલયનો મુખ્ય હેતુ લોકોનો સમય બચાવવાનો અને પ્રક્રિયામાં વધુ પારદર્શિતા લાવવાનો છે.

જો તમે તમારું કે પરિવારનું કાર્ડ બનાવવા માંગતા હોવ તો સૌથી પહેલા તમારા મોબાઈલમાં સરકારનો સત્તાવાર નંબર +91 72908 23838 સેવ કરો. ત્યારબાદ WhatsApp ઓપન કરીને આ નંબર પર "Hi" લખીને મેસેજ મોકલો. મેસેજ મોકલતા જ ચેટબોટ તરફથી મળેલા વિકલ્પોમાંથી "Create Ayushman Card" પર ક્લિક કરો. ત્યારબાદ તમારો મોબાઈલ નંબર અને આધાર વિગતો દાખલ કરી, મોબાઈલ પર આવતા OTP દ્વારા વેરિફિકેશન કરી eKYC પ્રક્રિયા પૂરી કરતા જ તમારું આયુષ્માન કાર્ડ ઓનલાઈન તૈયાર થઈ જશે.