'મોહમ્મદ શમી સંપૂર્ણ રીતે ફીટ, તે ટીમમાં હોવો જોઈએ', ગાંગુલીએ સિલેક્શન પર ઉઠાવ્યા સવાલ
ભૂતપૂર્વ ભારતીય કેપ્ટન સૌરવ ગાંગુલીએ કહ્યું હતું કે તેઓ મોહમ્મદ શમીને ફરીથી ભારતીય ટીમના તમામ ફોર્મેટમાં રમતા જોવા માંગે છે.
ભૂતપૂર્વ ભારતીય કેપ્ટન સૌરવ ગાંગુલીએ કહ્યું હતું કે તેઓ મોહમ્મદ શમીને ફરીથી ભારતીય ટીમના તમામ ફોર્મેટમાં રમતા જોવા માંગે છે. ગાંગુલીનું માનવું છે કે શમી સંપૂર્ણપણે ફિટ છે અને સારી બોલિંગ કરી રહ્યો છે. જોકે, મુખ્ય પસંદગીકાર અજિત અગરકરના નેતૃત્વ હેઠળની પસંદગી સમિતિ હાલમાં 35 વર્ષીય ફાસ્ટ બોલરથી આગળ વધી રહી હોય તેવું લાગે છે. દક્ષિણ આફ્રિકા સામેની બે ટેસ્ટ શ્રેણી માટે શમીનો ટીમમાં સમાવેશ કરવામાં આવ્યો ન હતો. તે છેલ્લે માર્ચમાં ચેમ્પિયન્સ ટ્રોફીમાં રમ્યો હતો.
સૌરવ ગાંગુલીએ શું કહ્યું
ગાંગુલીએ કહ્યું હતું કે, "શમી શાનદાર બોલિંગ કરી રહ્યો છે. તે ફિટ છે અને અમે તેને બંગાળ માટે એકલા હાથે ત્રણ રણજી ટ્રોફી મેચ જીતતા જોયો છે." શમીએ આ સીઝનમાં ત્રણ મેચમાં 91 ઓવરમાં 15 વિકેટ લીધી છે. જોકે, તે ત્રિપુરા સામે વિકેટ મળી નહોતી. 2023 વર્લ્ડ કપ પછી શમીએ પગની ઘૂંટીની સર્જરી કરાવી હતી પરંતુ પાછા ફર્યા પછી તેણે પોતાનું ફોર્મ પાછું મેળવ્યું છે.
ગાંગુલીએ કહ્યું હતું કે, "મને ખાતરી છે કે પસંદગીકારો તેના પર નજર રાખી રહ્યા છે અને તેમની વચ્ચે વાતચીત ચાલુ છે. ફિટનેસ અને કૌશલ્યની વાત આવે ત્યારે શમી એ જ જૂનો શમી છે. મને નથી લાગતું કે તેણે ત્રણેય ફોર્મેટ - ટેસ્ટ, વનડે અને ટી20 માં ભારત માટે ન રમવું જોઈએ તેનું કોઈ કારણ છે." હાલમાં ભારત પાસે પ્રસિદ્ધ કૃષ્ણા અને આકાશ દીપ જેવા યુવા ફાસ્ટ બોલર છે. પરંતુ ગાંગુલી માને છે કે શમી જેવા અનુભવી બોલરનો અનુભવ કોઈપણ ફોર્મેટમાં અમૂલ્ય રહેશે.
ગાંગુલીએ ધ્રુવ જુરેલ વિશે શું કહ્યું
ઈડન ગાર્ડન્સ ખાતે શુક્રવારથી શરૂ થઈ રહેલી દક્ષિણ આફ્રિકા સામેની બે ટેસ્ટ શ્રેણી પર બોલતા ગાંગુલીએ કહ્યું હતું કે ધ્રુવ જુરેલને તેના બેટિંગ પ્રદર્શનના આધારે પ્લેઇંગ ઇલેવનમાં સામેલ કરવો જોઈએ. ગાંગુલીએ કહ્યું હતું કે નંબર 3નું સ્થાન એક વિકલ્પ હોઈ શકે છે, જ્યાં હાલમાં સાઈ સુદર્શન રમે છે.
ટોપ સ્ટોરી
ટ્રેન્ડિંગ સમાચાર
