6, 6, 6, 6: ગુરનુર બ્રારે ટેસ્ટમાં T20 જેવો તરખાટ મચાવ્યો, ગૌતમ ગંભીરનું રિએક્શન વાયરલ

શ્રીલંકા XI સામેની વોર્મ-અપ મેચમાં ગુરનુર બ્રારે માત્ર 18 બોલમાં 36 રન ફટકારીને ટેસ્ટને T20 બનાવી દીધી હતી. તેની આ વિસ્ફોટક બેટિંગ જોઈને હેડ કોચ ગૌતમ ગંભીર પણ ખુશખુશાલ થઈ ગયા હતા.

gurnoor brar explosive batting ind vs sl warm up match gautam gambhir

Source : X

Show Quick Read

Key points generated by AI, verified by newsroom

• દેવદત્ત પડિક્કલે 142 રન કર્યા, ગુરનૂર બ્રારે ઝડપી 36 રન.
• ગુરનૂર બ્રારે છેલ્લી ઓવરમાં ચાર તોફાની સિક્સર ફટકારી.
• ગંભીર-જાડેજાએ તાળીઓ પાડી, ભારતીય ઇનિંગ સ્થિતિ સુધારી.

Gurnoor Brar Batting Highlights: કોલંબોમાં રમાઈ રહેલી ભારત અને શ્રીલંકા XI વચ્ચેની વોર્મ-અપ મેચમાં ભારતીય બેટ્સમેનોએ કમાલ કરી દીધી છે. બીજા દિવસની રમતના અંતે એક તરફ દેવદત્ત પડિક્કલે 142 રનની શાનદાર અણનમ સદી ફટકારીને સૌના દિલ જીતી લીધા છે, તો બીજી તરફ ગુરનુર બ્રારે છેલ્લી ઓવરમાં તોફાની બેટિંગ કરીને મેદાનમાં T20 જેવો રોમાંચક માહોલ ઊભો કરી દીધો હતો. ગુરનુરે માત્ર 18 બોલમાં 36 રન ઝૂડી કાઢ્યા હતા. તેની આ વિસ્ફોટક ઇનિંગ અને ચોગ્ગા-છગ્ગાનો વરસાદ જોઈને ભારતીય ટીમના નવા હેડ કોચ ગૌતમ ગંભીર પણ પોતાની ખુશી રોકી શક્યા ન હતા અને તેમનું રિએક્શન હાલ સોશિયલ મીડિયા પર વાયરલ થઈ ગયું છે.

છેલ્લી ઓવરનો તે અદભુત રોમાંચ

શ્રીલંકાના SLC ગ્રાઉન્ડ પર રમાઈ રહેલી આ વોર્મ-અપ મેચનો બીજો દિવસ ભલે દેવદત્ત પડિક્કલના નામે રહ્યો હોય, પરંતુ દિવસની છેલ્લી ઓવરમાં અસલી એક્શન જોવા મળ્યું હતું. આ ઓવર દિલમ સુદિરા તિલકરત્ને ફેંકી રહ્યો હતો અને સ્ટ્રાઈક પર ગુરનુર બ્રાર હતો. ગુરનુરે તિલકરત્નેના બીજા બોલ પર ડીપ મિડ-વિકેટ ઉપરથી એક શાનદાર સિક્સર ફટકારી. આ પછી તરત જ આગલા બોલ પર તે ક્રીઝની બહાર નીકળ્યો અને બોલરની બરાબર ઉપરથી સીધો છગ્ગો ફટકારી દીધો, જે છેક સાઈડ સ્ક્રીન પાસે જઈને પડ્યો. ઓવરનો ચોથો બોલ ભલે ખાલી (ડોટ) ગયો, પરંતુ ગુરનુરે છેલ્લા બે બોલમાં વધુ બે આસમાની છગ્ગા ફટકારીને બોલરના હોશ ઉડાવી દીધા હતા.

ગંભીર અને જાડેજાએ પાડી તાળીઓ

ઓવરના પાંચમા બોલ પર જ્યારે બોલરે મિડલ સ્ટમ્પ પર બોલિંગ કરી, ત્યારે બ્રારે ફ્રન્ટ ફૂટ કાઢીને પોતાની પૂરી તાકાત લગાવી ડીપ મિડ-વિકેટ તરફ લગભગ 90 મીટર લાંબી સિક્સ ફટકારી. આ જોઈને બોલરે ગભરાઈને છેલ્લો બોલ હિટિંગ આર્કથી દૂર ફેંકવાનો પ્રયાસ કર્યો, પરંતુ ફોર્મમાં ચાલી રહેલા ગુરનુરે આગળ વધીને એક્સ્ટ્રા કવર પર એવો કડક શૉટ માર્યો કે બોલ સીધો ડ્રેસિંગ રૂમ પાસે જઈને પડ્યો. આ લાંબી સિક્સર જોઈને ડ્રેસિંગ રૂમમાં બેઠેલા હેડ કોચ ગૌતમ ગંભીરના ચહેરા પર એક મોટું સ્મિત આવી ગયું. તેમની બાજુમાં જ રવિન્દ્ર જાડેજા ઉભા હતા અને બંનેએ સાથે મળીને તાળીઓ પાડીને આ શાનદાર શૉટની મજા માણી હતી.

આ પણ વાંચોઃ WTC 2025-27: ઓસ્ટ્રેલિયાના ભારત પ્રવાસનું ટાઇમટેબલ જાહેર, જુઓ 5 ટેસ્ટ મેચની યાદી

ભારતીય ઇનિંગની કેવી રહી શરૂઆત?

આ અગાઉ, મેચની વાત કરીએ તો શ્રીલંકા XI ની ટીમે 363/8 ના સ્કોર પર પોતાનો પહેલો દાવ ડિક્લેર કર્યો હતો. જવાબમાં ભારતીય ટીમની શરૂઆત કંઈ ખાસ રહી ન હતી. ઓપનર યશસ્વી જયસ્વાલ પોતાના બીજા જ બોલ પર ખાતું ખોલાવ્યા વિના (0 રન) આઉટ થઈ ગયો હતો. ત્યારપછી કેએલ રાહુલ અને દેવદત્ત પડિક્કલે બાજી સંભાળતા 95 રનની મજબૂત ભાગીદારી નોંધાવી હતી. કેએલ રાહુલ 40 રન બનાવીને પેવેલિયન પરત ફર્યો હતો. રવિન્દ્ર જાડેજાએ શાનદાર 63 રન બનાવ્યા હતા પરંતુ તે રિટાયર્ડ હર્ટ થઈને મેદાનની બહાર ગયો હતો. અન્ય બેટ્સમેનોમાં રિષભ પંત માત્ર 2 રન અને ધ્રુવ જુરેલ 1 રન બનાવીને સસ્તામાં આઉટ થયા હતા, જ્યારે માનવ સુથારે 41 રનનું ઉપયોગી યોગદાન આપ્યું હતું.

GURNOOR BRAR SMASHED 6,6,0,6,6 IN THE FINAL OVER...!!!!

- Gambhir & Jadeja enjoying the batting of Gurnoor ❤️😂 pic.twitter.com/eLTX2jaWYv

— Johns. (@CricCrazyJohns) August 8, 2026

પડિક્કલની શાનદાર સદી

જોકે, એક છેડો સાચવીને ઉભેલા દેવદત્ત પડિક્કલે શાનદાર બેટિંગ ચાલુ રાખી હતી અને તે 142 રનની ઇનિંગ રમીને બીજા દિવસના અંત સુધી અણનમ રહ્યો હતો. પોતાની આ શાનદાર ઇનિંગમાં તેણે 18 ચોગ્ગા ફટકાર્યા હતા. બીજી તરફ ગુરનુર બ્રાર 4 છગ્ગા અને 2 ચોગ્ગાની મદદથી માત્ર 18 બોલમાં 36 રન બનાવીને અણનમ રહ્યો હતો.

રવિવારના રોજ આ વોર્મ-અપ મેચનો ત્રીજો અને છેલ્લો દિવસ રમાશે. આ પ્રેક્ટિસ મેચ બાદ, વર્લ્ડ ટેસ્ટ ચેમ્પિયનશિપ હેઠળ ભારત અને શ્રીલંકા વચ્ચેની બે ટેસ્ટ મેચની સિરીઝની પ્રથમ ટેસ્ટ આગામી 15 ઓગસ્ટથી ગાલે સ્ટેડિયમ ખાતે રમાશે.