RCB vs MI, Match Highlights: બેંગ્લુરુએ મુંબઈને 8 વિકેટે હરાવ્યું, કોહલી-ડુપ્લેસિસિની શાનદાર ઈનિંગ

ઈન્ડિયન પ્રીમિયર લીગ (IPL) 2023 સીઝનની 5મી મેચ રોયલ ચેલેન્જર્સ બેંગ્લોર (RCB) અને મુંબઈ ઈન્ડિયન્સ (MI) વચ્ચે બેંગલુરુના એમ. ચિન્નાસ્વામી સ્ટેડિયમ ખાતે રમાઈ હતી.

વિરાટ કોહલી- તસવીર ટ્વિટર

MI vs RCB: ઈન્ડિયન પ્રીમિયર લીગ (IPL) 2023 સીઝનની 5મી મેચ રોયલ ચેલેન્જર્સ બેંગ્લોર (RCB) અને મુંબઈ ઈન્ડિયન્સ (MI) વચ્ચે બેંગલુરુના એમ. ચિન્નાસ્વામી સ્ટેડિયમ ખાતે રમાઈ હતી. આ મેચમાં RCBની ટીમને 172 રનનો ટાર્ગેટ મળ્યો હતો. બેંગ્લુરુના કેપ્ટન ફાફ ડુ પ્લેસિસ અને વિરાટ કોહલીની ઓપનિંગ જોડીએ પ્રથમ વિકેટ માટે 148 રનની ભાગીદારી કરીને મેચને સંપૂર્ણપણે એકતરફી કરી નાખી.  આરસીબીની ટીમે આ લક્ષ્યાંક 16.2 ઓવરમાં 2 વિકેટના નુકસાન પર હાંસિલ કર્યો.  જેમાં કોહલીએ અણનમ 82 રનની શાનદાર ઇનિંગ રમી હતી.

વિરાટ કોહલી અને ડુ પ્લેસિસ સામે મુંબઈના બોલર્સ લાચાર દેખાતા હતા

172 રનના સ્કોરનો પીછો કરવા ઉતરેલી રોયલ ચેલેન્જર્સ બેંગ્લોરની ટીમની ઇનિંગ્સ શરૂ કરવાની જવાબદારી કેપ્ટન ફાફ ડુ પ્લેસિસ અને વિરાટ કોહલીએ સંભાળી હતી. બંનેએ સાથે મળીને પ્રથમ 6 ઓવરમાં ટીમનો સ્કોર 53 રન સુધી પહોંચાડ્યો હતો. આ પછી ડુ પ્લેસિસ અને કોહલીએ પોતાની આક્રમક શૈલી ચાલુ રાખતા ઝડપી ગતિએ રન બનાવવાનું ચાલુ રાખ્યું હતું.

કોહલી અને ડુ પ્લેસિસની જોડીએ 11મી ઓવરમાં જ ટીમના સ્કોરને 100 રનની પાર પહોંચાડી દીધો હતો. ડુ પ્લેસિસે આ મેચમાં માત્ર 30 બોલમાં પોતાની અડધી સદી પૂરી કરી હતી, જ્યારે કોહલીએ પણ અડધી સદીની ઇનિંગ સાથે સિઝનની શરૂઆત કરી હતી અને 38 બોલમાં 50 રનનો આંકડો પૂરો કર્યો હતો. આ મેચમાં RCBની ટીમને 148 રનના સ્કોર પર પહેલો ફટકો ડુ પ્લેસિસના રૂપમાં લાગ્યો હતો, જે 43 બોલમાં 73 રનની ઇનિંગ રમીને પેવેલિયન પરત ફર્યો હતો.

આ મેચમાં આરસીબીની ટીમે 2 વિકેટના નુકસાને 16.2 ઓવરમાં લક્ષ્યાંક હાંસલ કરી લીધો હતો. વિરાટ કોહલીએ આ મેચમાં વાપસી કરીને 49 બોલમાં 82 રનની શાનદાર અણનમ ઇનિંગ રમીને ટીમને જીત અપાવી હતી. મુંબઈ તરફથી બોલિંગમાં અરશદ ખાન અને કેમરન ગ્રીને 1-1 વિકેટ લીધી હતી.

મુંબઈની ઈનિંગમાં તિલક વર્માએ બેટથી પાવર બતાવ્યો 

આ મેચમાં RCBની ટીમે ટોસ જીતીને પહેલા બોલિંગ કરવાનો નિર્ણય કર્યો હતો. જે બાદ મુંબઈ ઈન્ડિયન્સની ટીમે માત્ર 20ના સ્કોર સુધી પોતાની 3 મહત્વની વિકેટ ગુમાવી દીધી હતી. આ પછી યુવા ડાબોડી બેટ્સમેન તિલક વર્માએ એક છેડેથી ઇનિંગ્સને સંભાળીને રનની ગતિ જાળવી રાખીને ટીમને ફાઇટીંગ સ્કોર સુધી લઇ જવાનું કામ કર્યું. તિલક વર્માના બેટમાં 46 બોલમાં 84 રનની શાનદાર અણનમ ઇનિંગ જોવા મળી હતી, જેના કારણે મુંબઈની ટીમ 20 ઓવરમાં 7 વિકેટ ગુમાવીને 171 રન સુધી પહોંચાડવામાં સફળ રહી હતી. આરસીબી તરફથી બોલિંગમાં કર્ણ શર્માએ 4 ઓવરમાં 32 રન આપીને 2 વિકેટ ઝડપી હતી.