જસપ્રીત બુમરાહે કપિલ દેવનો મહાન રેકોર્ડ તોડ્યો: તમામ ભારતીય બોલર્સને પછાડીને વિદેશી ધરતી પર....
ઈંગ્લેન્ડ સામેની ત્રીજી ટેસ્ટમાં શાનદાર પ્રદર્શન, ભારતીય બોલરોમાં નંબર-1 સ્થાન હાંસલ કર્યું.
Jasprit Bumrah Record: ભારતીય ક્રિકેટ ટીમના ફાસ્ટ બોલર જસપ્રીત બુમરાહે ઈંગ્લેન્ડ સામેની ત્રીજી ટેસ્ટ મેચમાં શાનદાર પ્રદર્શન કરીને ઈતિહાસ રચ્યો છે. લોર્ડ્સમાં રમાઈ રહેલી આ મેચમાં બુમરાહે બોલિંગનું ઉત્તમ ઉદાહરણ પૂરું પાડ્યું છે અને 5 વિકેટ ઝડપીને દિગ્ગજ કપિલ દેવનો એક મહાન રેકોર્ડ તોડી નાખ્યો છે. આ પ્રદર્શન સાથે તે વિદેશી ધરતી પર ટેસ્ટ ક્રિકેટમાં સૌથી વધુ વખત 5 વિકેટ લેનાર ભારતીય બોલર બની ગયો છે.
કપિલ દેવનો રેકોર્ડ તૂટ્યો: બુમરાહ નંબર-1
ઈંગ્લેન્ડ સામેની ત્રીજી ટેસ્ટની પહેલી ઇનિંગમાં જસપ્રીત બુમરાહે 27 ઓવર ફેંકી, 74 રન આપીને 5 મહત્વપૂર્ણ વિકેટ લીધી. આ 5 વિકેટ સાથે જ તેણે ઇતિહાસના પાનામાં પોતાનું નામ સુવર્ણાક્ષરે અંકિત કરી દીધું છે. હવે તે વિદેશી ધરતી પર ટેસ્ટ ક્રિકેટમાં સૌથી વધુ 5 વિકેટ લેનાર ભારતીય બોલર બની ગયો છે, જે પહેલા દિગ્ગજ કપિલ દેવના નામે હતો. બુમરાહે અત્યાર સુધીમાં વિદેશી ધરતી પર ટેસ્ટમાં 13 વખત 5 વિકેટ ઝડપી છે, જ્યારે કપિલ દેવે આ કારનામું 12 વખત કર્યું હતું. આ સાથે, બુમરાહે તમામ ભારતીય બોલરોને પાછળ છોડીને આ યાદીમાં નંબર-1 સ્થાન પ્રાપ્ત કર્યું છે.
ટેસ્ટ ક્રિકેટમાં બુમરાહનું પ્રદર્શન અને કારકિર્દી
જસપ્રીત બુમરાહે વર્ષ 2018માં ભારતીય ટેસ્ટ ટીમ માટે ડેબ્યૂ કર્યું હતું. ત્યારથી, તે ભારતીય ટીમની એક અભિન્ન કડી બની ગયો છે, ખાસ કરીને વિદેશી ધરતી પર તેનું પ્રદર્શન વધુ પ્રભાવશાળી રહ્યું છે. તેણે ટીમ ઈન્ડિયા માટે અત્યાર સુધીમાં 47 ટેસ્ટ મેચમાં કુલ 215 વિકેટ લીધી છે. આ દરમિયાન, તેણે 15 વખત 5 વિકેટ લેવાનું પરાક્રમ કર્યું છે. ટેસ્ટ ઉપરાંત, બુમરાહે વનડેમાં 149 વિકેટ અને T20 ક્રિકેટમાં 89 વિકેટ પણ લીધી છે, જે તેની ઓલ-ફોર્મેટ બોલિંગ ક્ષમતા દર્શાવે છે.
ઈંગ્લેન્ડની પ્રથમ ઇનિંગ અને ભારતીય બોલરોનું યોગદાન
ત્રીજી ટેસ્ટ મેચમાં, ઇંગ્લેન્ડની ટીમે પ્રથમ બેટિંગ કરતા 387 રન બનાવ્યા હતા. ઇંગ્લેન્ડ તરફથી જો રૂટે શાનદાર બેટિંગ કરતા 104 રનની સદી ફટકારી હતી. તેમના સિવાય નીચલા ક્રમના બેટ્સમેનોએ પણ સારું પ્રદર્શન કર્યું, જેમાં જેમી સ્મિથે 51 રન અને ક્રિસ વોક્સે 56 રનનું યોગદાન આપ્યું. આ ખેલાડીઓના કારણે જ ઇંગ્લેન્ડ 350 રનનો આંકડો પાર કરવામાં સફળ રહ્યું હતું. ભારત તરફથી જસપ્રીત બુમરાહે સૌથી વધુ 5 વિકેટ લીધી હતી, જ્યારે મોહમ્મદ સિરાજ અને નીતિશ રેડ્ડીએ 2-2 વિકેટ મેળવી હતી. રવિન્દ્ર જાડેજાને 1 વિકેટ મળી હતી. બુમરાહનું આ પ્રદર્શન ભારતીય ટીમને મેચમાં મજબૂત સ્થિતિમાં લાવવામાં મદદરૂપ થશે.
ટોપ સ્ટોરી
ટ્રેન્ડિંગ સમાચાર
