ODI World Cup: ન્યૂઝીલેન્ડ વિરુદ્ધની મેચમાંથી બહાર થઇ શકે છે હાર્દિક પંડ્યા, જાણો સારવાર માટે ક્યાં લઇ જવાશે?
ભારતનો સ્ટાર ઓલરાઉન્ડર હાર્દિક પંડ્યા 22 ઓક્ટોબરે ધર્મશાલામાં રમાનારી ન્યૂઝીલેન્ડ સામેની ભારતની આગામી મેચમાંથી બહાર થઈ શકે છે
ભારતનો સ્ટાર ઓલરાઉન્ડર હાર્દિક પંડ્યા 22 ઓક્ટોબરે ધર્મશાલામાં રમાનારી ન્યૂઝીલેન્ડ સામેની ભારતની આગામી મેચમાંથી બહાર થઈ શકે છે. મીડિયા રિપોર્ટ્સ અનુસાર, હાર્દિકને બેંગ્લોરની નેશનલ ક્રિકેટ એકેડમીમાં લઈ જવામાં આવશે જ્યાં ઈંગ્લેન્ડના નિષ્ણાત ડોક્ટર તેની સારવાર કરશે. રિપોર્ટ્સ અનુસાર તેને ઈન્જેક્શન આપવામાં આવશે. 29 ઓક્ટોબરે ઇંગ્લેન્ડ સામેની મેચ પહેલા હાર્દિક લખનઉમાં ભારતીય ટીમ સાથે જોડાય તેવી શક્યતા છે. ભારતીય ટીમ મેનેજમેન્ટને આશા છે કે તે ઈંગ્લેન્ડ સામેની મેચ માટે ઉપલબ્ધ રહેશે.
મીડિયા રિપોર્ટ્સ અનુસાર, હાર્દિકને બેંગ્લોર લઈ જવામાં આવશે, કારણ કે તેને NCAમાં રિપોર્ટ કરવા માટે કહેવામાં આવ્યું છે. ઈજા બાદ હાર્દિકને સ્કેન માટે લઈ જવામાં આવ્યો હતો. બાદમાં તે ટીમમાં સામેલ થયો, પરંતુ તે આખી મેચમાં રમી શક્યો નહીં. મેડિકલ ટીમે સ્કેન રિપોર્ટના રિપોર્ટનો અભ્યાસ કર્યો હતો અને કહ્યું હતું કે ઈન્જેક્શન લીધા પછી તે ઠીક થઈ જશે. અહેવાલો અનુસાર, બીસીસીઆઈએ ઈંગ્લેન્ડમાં નિષ્ણાત ડૉક્ટરની સલાહ લીધી હતી અને તેમનો પણ આવો જ અભિપ્રાય હતો. આવી સ્થિતિમાં તેને એક મેચ માટે આરામ આપવામાં આવી શકે છે.
વાસ્તવમાં બાંગ્લાદેશ સામેની મેચ દરમિયાન હાર્દિકે જમણા પગે લિટન દાસનો બોલ રોકવાનો પ્રયાસ કર્યો હતો. દરમિયાન તેણે પોતાનું સંતુલન ગુમાવ્યું હતું અને તેના ડાબા પગ પર ઇજા પહોંચી હતી. હાર્દિકે ઉભો થઈને ફરી બોલિંગ કરવાનો પ્રયાસ કર્યો, પરંતુ તે કરી શક્યો નહીં. આ પછી મેદાનમાંથી તેને બહાર થવું પડ્યું હતું. ત્યાં સુધીમાં હાર્દિકે તેની પ્રથમ ઓવરના ત્રણ બોલ ફેંક્યા હતા. બાકીના ત્રણ બોલ વિરાટ કોહલીએ ફેંક્યા હતા. તેણે છ વર્ષ પછી વનડેમાં બોલિંગ કરી હતી.
ઈજાગ્રસ્ત હાર્દિકના સ્થાને વર્લ્ડ કપની ટીમમાં અન્ય કોઈને સામેલ કરવા અંગે કોઈ ચર્ચા થઈ નથી. કેપ્ટન રોહિતે બાંગ્લાદેશ સામેની જીત બાદ કહ્યું હતું કે ઈજા ચિંતાનો વિષય નથી. તેણે કહ્યું, હાર્દિકની ઈજાને લઈને ચિંતા કરવા જેવું કંઈ નથી. શુક્રવાર સવાર સુધી તેની હાલત કેવી છે તે જોઈશું અને પછી આગળની યોજના બનાવીશું.
આવી સ્થિતિમાં હવે ટીમ ઈન્ડિયા સામે એક નવી સમસ્યા ઉભી થઈ છે કે જો હાર્દિક પંડ્યા ઇજાના કારણે વર્લ્ડકપમાંથી બહાર થઇ જશે તો તેના સ્થાને ક્યા ખેલાડીને ટીમમાં સામેલ કરવામાં આવશે. નોંધનીય છે કે ટીમ ઈન્ડિયા પાસે અત્યારે હાર્દિક પંડ્યાની સમકક્ષ કોઈ અન્ય વિકલ્પ નથી, પરંતુ તેમ છતાં કેટલાક નામો છે જેના પર ટીમ મેનેજમેન્ટ ચર્ચા કરી શકે છે.
ટ્રેન્ડિંગ સમાચાર
ટોપ સ્ટોરી
