ઈન્ડિયન શેન વોર્ન મનાતા ચહલની સ્ટોરી છે, દંગલ જેવીઃ પિતાએ ખેતરમાં પિચ બનાવી આપી ટ્રેઈનિંગ

યુઝવેન્દ્રે 11 વર્ષની વય સુધી ખેતરની પિચ પર પ્રેક્ટિસ કરીને બોલને ફેરવવામાં મહારત હાંસલ કરી લીધી હતી. તેણે સ્કૂલ ક્રિકેટમાં કમાલ દેખાડી તેથી રણજી ટ્રોફી માટે હરિયાણા ટીમમાં તેની પસંદગી થઈ. સચિન તેંડુલકરની તેના પર નજર પડી ને તેણે 2011માં મુંબઈ ઈન્ડિયન્સ ટીમ માટે પસંદ કર્યો.

બેંગલોરઃ ઈંગ્લેન્ડ સામેની છેલ્લી ટી-20 મેચમાં 25 રનમાં 6 વિકેટો ઝડપનારો યુઝવેન્દ્ર ચહલ રાતોરાત હીરો બની ગયો છે. જો કે એક ટી-20 મેચમાં સૌથી વધુ વિકેટો ઝડપવાના વર્લ્ડ રેકોર્ડની બરાબરી કરનારા ચહલની આ સફળતા રાતોરાત નથી આવી પણ તેની પછળ વરસોની મહેનત જવાબદાર છે.

યુઝવેન્દ્રના પિતા કે.કે. ચહલ એડવોકેટ છે. એ વહેલી સવારે પોતાના દીકરાને લઈને ખેતરમાં પ્રેક્ટિસ માટે જતા અને પછી કોર્ટમાં જતા રહેતા. સાંજે ઘરે આવીને એ પાછા યુઝવેન્દ્રને લઈને ખેતરમાં ઉપડી જતા ને પ્રેક્ટિસ કરતા. કલાકો લગી યુઝવેન્દ્ર સ્ટમ્પ્સને તાકીને બોલિંગ કર્યા કરતો.

જો કે યુઝવેન્દ્રે પ્રેક્ટિસ કરવા માટે જવું પડતું એ સ્ટેડિયમ બહુ દૂર હતું તેથી કે.કે. ચહલે તેનો ઉકેલ શોધી કાઢ્યો. મહાવીરસિંહ ફોગટે ખેતરમાં અખાડો બનાવ્યો હતો એ રીત કે.કે. ચહલે પોતાના ખેતરમાં જ ક્રિકેટની પિચ બનાવી કાઢી કે જેથી યુઝવેન્દ્રે પ્રેક્ટિસ કરવા દૂર ના જવું પડે.

કે.કે. ચહલ ઈચ્છતા હતા કે તેમનો દીકરો ક્રિકેટર બને અને ભારત વતી રમે. એટલા માટે તેમણે માત્ર છ વર્ષની ઉંમરથી જ પોતાના દીકરાને ક્રિકેટર બનાવવાની તાલીમ આપવાની શરૂઆત કરી. ચહલ પણ હરિયાણાનો જ છે અને જિન્દ શહેરમાં પેદા થયો ને મોટો થયો.

અત્યારે આમીર ખાનની ફિલ્મ દંગલ ધૂમ મચાવી રહી છે. કુશ્તીબાજ બહેનો ગીતા ફોગટ અને બબિતા ફોગટને સફળ બનાવવા માટે તેમના પિતા મહાવીરસિંહ ફોગટે કરેલી મહેનત પર બનેલી આ ફિલ્મ જોઈ સૌ દંગ થઈ ગયા છે. ચહલની સ્ટોરી પણ દંગલ જેવી જ છે અને ચહલની સફળતામાં તેના પિતાનું યોગદાન મોટું છે.

મહાવીરસિંહ પોતાની દીકરીઓ કુશ્તીબાજ બની દેશનું નામ રોશન કરે તેમ ઈચ્છતા હતા. આ સપનું સાકાર કરવા માટે મહાવીરસિંહ ફોગટે પોતાની દીકરીઓ કુશ્તી લડી શકે એટલા માટે પોતાના ખેતરમાં જ અખાડો બનાવ્યો હતો. ચહલના પિતા કે.કે. ચહલે પણ કંઈક આવું જ કર્યું હતું.