Hockey Asia Cup 2025: ભારતે કઝાકિસ્તાનને 15-0 થી આપી હાર, સુપર-4 માં સ્થાન મેળવ્યું, હવે કોરિયા સાથે મુકાબલો
ભારતીય પુરુષ હોકી ટીમે એશિયા કપ હોકી 2025 માં પોતાના શાનદાર પ્રદર્શનથી બધાનું ધ્યાન ખેંચ્યું છે.
Men's Hockey Asia Cup 2025: ભારતીય પુરુષ હોકી ટીમે એશિયા કપ હોકી 2025 માં પોતાના શાનદાર પ્રદર્શનથી બધાનું ધ્યાન ખેંચ્યું છે. સોમવારે બિહારના રાજગીર હોકી સ્ટેડિયમ ખાતે રમાયેલી પૂલ-A ની છેલ્લી મેચમાં ભારતે કઝાકિસ્તાનને 15-0 થી હરાવ્યું. આ જીત સાથે ટીમ ઈન્ડિયા ગ્રુપ સ્ટેજ ટેબલમાં ટોચ પર રહીને પૂર્ણ કરી અને હવે બુધવારે સુપર-4 ની પહેલી મેચમાં તેનો સામનો દક્ષિણ કોરિયા સામે થશે.
ભારતે શરૂઆતની મિનિટોથી જ દબદબો બનાવ્યો
ભારતીય ટીમે મેચની શરૂઆતથી જ આક્રમક રમત રમી હતી. અભિષેકે 5મી મિનિટે પહેલો ગોલ કર્યો અને ટૂંક સમયમાં બીજો ગોલ કરીને સ્કોર 2-0 કર્યો. પ્રથમ ક્વાર્ટરના અંતે અભિષેકે સુખજીતને શાનદાર પાસ આપ્યો જેના પર તેણે ગોલ કર્યો અને ભારતને 3-0 ની લીડ અપાવી.
હાફ ટાઇમ સુધી 7-0 ની લીડ
બીજા ક્વાર્ટરમાં પણ ભારતીય ખેલાડીઓનું વર્ચસ્વ રહ્યું. 24મી અને 31 મી મિનિટમાં જગરાજ સિંહે શાનદાર ગોલ કર્યા, જ્યારે કેપ્ટન હરમનપ્રીત સિંહે પણ 26મી મિનિટે પેનલ્ટી કોર્નરને ગોલમાં રૂપાંતરિત કર્યો. થોડા સમય પછી અમિત રોહિદાસે પણ ટીમનો સ્કોર વધારવામાં મહત્વપૂર્ણ યોગદાન આપ્યું. હાફ ટાઇમ સુધી ભારતનો હાથ ઉપર હતો અને સ્કોર 7-0 થઈ ગયો.
હેટ્રિકનો વરસાદ
ત્રીજા ક્વાર્ટરમાં જગરાજે પેનલ્ટી સ્ટ્રોકથી પોતાનો ત્રીજો ગોલ કર્યો અને પોતાની હેટ્રિક પૂર્ણ કરી. સુખજીતે પણ પ્રહાર ચાલુ રાખ્યો અને હેટ્રિક પોતાના નામે કરી હતી.
ચોથા ક્વાર્ટરમાં ભારતનું વર્ચસ્વ વધુ વધ્યું. સંજયે 54મી મિનિટે, દિલપ્રીત સિંહે 55મી મિનિટે અને છેલ્લે અભિષેકે 59મી મિનિટે ગોલ કર્યા. આ રીતે, અભિષેકે આખી મેચમાં ચાર ગોલ કર્યા અને ભારતની જીતને વધુ યાદગાર બનાવી.
ગ્રૂપ સ્ટેજ શાનદાર રીતે સમાપ્ત થયો
ભારતે પહેલાથી જ સુપર-4 માં સ્થાન મેળવ્યું હતું, પરંતુ આ મોટી જીતથી ટીમનો આત્મવિશ્વાસ વધુ મજબૂત થયો છે. ત્રણ મેચમાં ત્રણ જીત સાથે, ભારતે પૂલ-એમાંથી નવ પોઈન્ટ મેળવ્યા અને ટોચના સ્થાને રહીને આગળના તબક્કામાં પ્રવેશ કર્યો.
હવે કોરિયા સાથે મુકાબલો
ભારતીય ટીમ હવે બુધવારે તેની પહેલી સુપર-4 મેચમાં દક્ષિણ કોરિયાનો સામનો કરશે. ઘરઆંગણાના દર્શકો સામે આવી શાનદાર જીતથી ટીમનું મનોબળ શિખર પર પહોંચી ગયું છે. આ મેચ ભારતના સુપર-4 અભિયાન માટે ખરી કસોટી હશે.
ટોપ સ્ટોરી
ટ્રેન્ડિંગ સમાચાર
