વડોદરાઃ ભેદી સંજોગોમાં યુવતીનો બળેલી હાલતમાં મળ્યો મૃતદેહ, કથિત પ્રેમી ફરાર

મકરપુરાના તુસલીનગરમાં 20 વર્ષીય યુવતીની લાશ સળગેલી હાલતમાં મળતાં આસપાસના લોકોએ 108ને જાણ કરી હતી. આ પછી પોલીસને જાણ કરાતા મકરપુરા પોલીસ ઘટનાસ્થળે આવી પહોંચી હતી. પોલીસ તપાસમાં આ યુવક યુવતી બિહારના હોવાનું સામે આવ્યું છે. તેમજ ચાર દિવસ પહેલા ભાડેથી રહેવા આવ્યા હોવાનું જાણવા મળ્યું છે. સ્થાનિકોના જણાવ્યા પ્રમાણે આ યુગલ કામ સિવાય બહાર નીકળતું નહોતું.

પાડોશીએ 20 વર્ષીય યુવતી સાથે રહેતા યુવકને છેલ્લા મંગળવારે સાંજે ચાર વાગ્યે જોયો હતો. યુવકનું નામ અજીત કુમાર હોવાનું જાણવા મળ્યું છે. યુવતીએ આપઘાત કર્યો કે પછી યુવકે તેની હત્યા કરી તે દિશામાં પોલીસ તપાસ કરી રહી છે. તેમજ બંને કયા ઇરાદાથી વડોદરા આવ્યા હતા, તે દિશામાં પણ પોલીસ તપાસ કરી રહી છે.