Gujarat Rain Breaking News : ગુજરાતમાં આજે ક્યાં ક્યાં પડ્યો વરસાદ?

Gujarat Rain Breaking News : ગુજરાતમાં આજે ક્યાં ક્યાં પડ્યો વરસાદ?

Gujarat Rain: સૌરાષ્ટ્ર વિસ્તારમાં અસહ્ય ગરમી અને બફારા બાદ આજે સુરેન્દ્રનગર, અમરેલી અને બોટાદ જિલ્લાના વિવિધ ગ્રામ્ય વિસ્તારોમાં અચાનક વાતાવરણમાં પલટો આવતા ઝરમરથી લઈને હળવો વરસાદ વરસ્યો છે. આ અચાનક થયેલા વરસાદના કારણે વાતાવરણમાં ગુલાબી ઠંડક પ્રસરી ગઈ છે અને લાંબા સમયથી વરસાદની રાહ જોઈ રહેલા સ્થાનિક ખેડૂતોમાં ભારે આનંદ અને ખુશીનો માહોલ જોવા મળ્યો છે. આ ઉપરાંત ઉત્તર ગુજરાતમાં પણ અનેક જગ્યાએ આજે વરસાદ પડ્યો હતો. 

આજના વરસાદની વાત કરીએ તો, સુરેન્દ્રનગર જિલ્લાના વઢવાણ અને લીંબડી તાલુકામાં વરસાદી માહોલ જામ્યો હતો. લીંબડી તાલુકાના ચોરણીયા, પાણશીણા, રળોલ અને ટોકરાળા જેવા ગ્રામ્ય વિસ્તારોમાં વરસાદ વરસ્યો હતો. આ સાથે જ અમદાવાદ-રાજકોટ હાઈવે પર પણ વરસાદી ઝાપટાં પડતાં વાહનચાલકોને ગરમીથી રાહત મળી હતી. બીજી તરફ, અમરેલી જિલ્લાના બાબરા અને સાવરકુંડલા તાલુકામાં પણ મેઘમહેર યથાવત રહી હતી. બાબરાના ચમારડી, ઊંટવડ, કોટડાપીઠા, ચરખા તેમજ સાવરકુંડલાના ચરખડિયા અને ઓળિયા ગામોમાં ધીમી ધારે વરસાદ વરસ્યો હતો. તદુપરાંત, બોટાદ જિલ્લામાં પણ મેઘરાજાની શુભ શરૂઆત થઈ હતી. બોટાદના પાળીયાદ, તરઘરા, સેથલી તથા બરવાળા તાલુકાના સાળંગપુર, કુંડલ અને રોજિંદ સહિતના પંથકોમાં મેઘરાજાએ હાજરી પુરાવી હતી. પંથકમાં વરસાદ પડતાની સાથે જ ધૂળની ડમરીઓ શાંત થઈ હતી અને વાતાવરણ આહલાદક બની ગયું હતું.