T20 World Cup semi-final: T20 વર્લ્ડકપની ફાઇનલમાં પહોંચી ટીમ ઇન્ડિયા

T20 World Cup semi-final: કેપ્ટન રોહિત શર્માના નેતૃત્વ હેઠળ ભારતીય ટીમે T20 વર્લ્ડ કપ 2024ની ફાઇનલમાં ધમાકેદાર પ્રવેશ કરી લીધો છે. ગુરુવારે રાત્રે રોમાંચક સેમી ફાઇનલમાં ટીમ ઈન્ડિયાએ ઇંગ્લેન્ડને પરાજય આપીને ફાઇનલમાં પોતાનું સ્થાન નિશ્ચિત કર્યું હતું.

ઇંગ્લેન્ડના કેપ્ટન જોસ બટલરે ટોસ જીતીને ભારતને પ્રથમ બેટિંગ કરવાનું આમંત્રણ આપીને મોટી ભૂલ કરી હતી. ગુરુવારે રાત્રે રમાયેલી T20 વર્લ્ડ કપ 2024ની સેમીફાઇનલમાં ભારતીય ટીમે આ મુશ્કેલ પિચનો ઝડપથી ફાયદો ઉઠાવીને 20 ઓવરમાં 171 રનનો પડકારજનક ટાર્ગેટ મૂક્યો હતો. જવાબમાં ઇંગ્લેન્ડની બેટિંગ 16.4 ઓવરમાં 103 રનમાં ધરાશાયી થઈ ગઈ અને ભારતે 68 રનની જીત મેળવી ફાઇનલમાં પ્રવેશ કર્યો.

પ્રથમ બેટિંગ કરવા ઉતરેલી ટીમ ઈન્ડિયાને શરૂઆતમાં જ ઝટકો મળ્યો હતો જ્યારે વિરાટ કોહલી અને રિષભ પંત સસ્તામાં આઉટ થઈ ગયા. પરંતુ કેપ્ટન રોહિત શર્મા એક છેડે ટકી રહ્યા અને નવા બેટ્સમેન સૂર્યકુમાર યાદવ સાથે મળીને ટીમ ઈન્ડિયાનો સ્કોરબોર્ડ આગળ ધપાવ્યો. રોહિત શર્માએ 39 બોલમાં 57 રનની શાનદાર ઇનિંગ રમી, જેમાં છ ચોગ્ગા અને બે છગ્ગાનો સમાવેશ થાય છે. તેમની આક્રમક બેટિંગના કારણે ટીમ ઈન્ડિયાની રનરેટમાં વધારો થયો અને મજબૂત સ્થિતિમાં પહોંચી ગઈ.