હિટ એન્ડ રનઃ બે વિદ્યાર્થિનીનાં ડમ્પરની ટક્કરે મોત, ડમ્પર ચાલકની ધરપકડ

અમદાવાદઃ શહેરના શાહઆલમ ચાર રસ્તા પાસે ડમ્પરની અડફેટે બે ભાવી તબીબ યુવતીઓના કરુણ મોત નિપજતાં અરેરાટી વ્યાપી ગઈ છે. બોપલની પારુલ યુનિવર્સીટી ખાતે બંન્ને વિધાર્થિનીઓ ફીઝીયોથેરાપીસ્ટનો અભ્યાસ કરતી હતી. શુક્રવારે બોપલથી નીકળી મણીનગર ખાતે આવેલા ઘરે જતી હતી, ત્યારે શાહઆલમ પાસે યમરાજરૂપી ડમ્પરે બંનેને અડફેટે લીધી અને બન્નેને ટક્કર મારી ડમ્પરચાલક ડમ્પર સાથે નાસી છૂટ્યો હતો. બંનેમાંથી એકનું ઘટના સ્થળે અને બીજી યુવતીનું એલ. જી. હોસ્પિટલ ખાતે મોત નિપજ્યું હતું. ત્યારે આ મામલે ટ્રાફિક પોલીસે મોડી રાત્રે ડમ્પર ચાલક મઝહર ખાનની ધરપકડ કરી હતી. અત્યારે સમાચાર મળી રહ્યા છે કે, એએમસીના આ ડમ્પર ચાલકનો જામીન પર છૂટકારો થયો છે.

શુક્રવારે સાંજે પાંચ વાગ્યે આશ્વી અને પ્રીત નામની બે 19 વર્ષીય યુવતીઓ એક્ટીવા લઈ અહીથી પસાર થઈ હતી. ત્યારે બન્ને યુવતીઓને એએમસીના ડમ્પરે અડફેટે લઈ લીધી અને ડમ્પર ચાલક ઝડપી ગતિએ ડમ્પર લઈ નાસી છુટ્યો હતો. 19 વર્ષીય યુવતી આશ્વીનું ઘટના સ્થળે જ અકસ્માતમાં મોત નિપજ્યું હતું. જ્યારે બીજી યુવતી પ્રીત વૈધને સારવાર માટે એલ.જી. હોસ્પિટલ ખસેડાઈ, પણ તેને સારવાર મળે તે પહેલાં જ તેના પ્રાણ ઉડી ગયા હતા.