Amazon, Flipkartને ટક્કર આપવા મુકેશ અંબાણીએ બનાવ્યો આ પ્લાન

નવી દિલ્હીઃ એમેઝોન, ફ્લિપકાર્ટ જેવી મોટી ઈ-કોમર્સ કંપનીઓને મુકેશ અંબાણીની રિલાયન્સ ઇન્ડસ્ટ્રીઝે ટક્કર આપવા માટે તૈયારી કરી લીધી છે જેમ જિઓના લોન્ચિંગ બાદ ટેલીકોમની કંપનીની હાલત કરી હતી. કંપની હવે ઈ-કોમર્સ બિઝનેસમાં પણ ઉતરવાની તૈયારી કરી રહી છે.

જેના માટે કંપની એક નવી વેબસાઈટ અને એપ લોન્ચ કરશે. આ ઉપરાંત એપને જિયોના તમામ ફીચર અને સ્માર્ટફોનમાં પણ ડાઉનલોડ કરવામાં આવશે. દેશભરમાં જિયોના સિમ વેચનારા સેન્ટરોને પણ ડિલીવરી પોઈન્ટ બનાવવામાં આવશે. હાલમાં રિલાયન્સ રિટેલ મુંબઈ, પુણે અને બેંગલુરુમાં ટ્રાયલ તરીકે ઈ-કોમર્સ દ્વારા ગ્રોસરી વેચી રહી છે.

રિલાયન્સ રિટેઈલનો પ્લાન છે કે તેઓ દેશના નાના શહેરોમાં પણ સામાનનો ઓર્ડર મળ્યાં બાદ તે જ દિવસે અથવા 24 કલાકની અંદર ડિલીવરી કરશે. આવું કરવાથી લોકો વધુ સામાનની ખરીદી કરશે. લોકો રિલાયન્સ દ્વાર મોબાઈલ ફોન અને ઈલેક્ટ્રોનિક્સ સામાન પર એક્સક્લૂસિવ ડીલ આપવામાં આવશે.

કંપનીના સૂત્રો અનુસાર રિલાયન્સ રિટેલ લોન્ચ થવાના ત્રણ વર્ષ બાદ એટલે કે 2022 સુધીમાં ઈ-કોમર્સ માર્કેટમાં લીડર બની જશે રિલાયન્સ. હાલમાં અમેઝોન, ફ્લિપકાર્ટ, સ્નેપડીલ, પેટીએમ મોલ જેવી કંપનીઓ ઈ-કોમર્સ સેગમેન્ટમાં ટોપ પર છે.

અંગ્રેજી અખબાર ઈકોનોમિક્સ ટાઈમ્સના અહેવાલ મુજબ રિલાયન્સ રિટેલ 2019 સુધીમાં પોતાનું ઈ-કોમર્સ વેન્ચર શરૂ કરી શકે છે. પ્લાન મુજબ રિલાયન્સ તેવા શહેરમાં પોતાની ઈ કોમર્સ સુવિધા આપશે, જેની જનસંખ્યા 50 હજારથી વધુ છે. ઈ કોમર્સ વેન્ચર દ્વારા રિલાયન્સ મોબાઈલ ફોન, કંઝ્યૂમર ઈલેક્ટ્રોનિક્સ, એફએમસીજી ગુડ્સ, ફળ-શાકભાજી સહિતની ખાવાપીવાની વસ્તુઓનું વેચાણ કરશે.