રિલાયન્સની કંપનીએ 9000 કરોડની લોન ન ભરતા વિજ્યા બેન્કે જાહેર કરી દેવાદાર

નવી દિલ્હીઃ પબ્લિક સેક્ટરની વિજ્યા બેન્કે અનિલ અંબાણીની ગ્રુપની કંપની રિલાયન્સ નેવલ એન્ડ એન્જિનિયરિંગને આપવામાં આવેલી લોનને જાન્યુઆરી-માર્ચ 2018માં ત્રિમાસિકથી નોન પરફોર્મિગ અસેટ (એનપીએ)જાહેર કરી દીધી છે. રિલાયન્સ નેવલના ઓડિટર્સે તાજેતરમાં જ આ કંપનીના અસ્તિત્વને ટકાવી રાખવાને લઇને આશંકાઓ જાહેર કરી હતી. અગાઉ આ કંપનીનું નામ પીપાવાવ ડિફેન્સ એન્ડ ઓફશોર એન્જિનિયરિંગ હતું. અનિલ અંબાણી ગ્રૂપે 2016માં એને ટેકઓવર કરી હતી અને તેને રિલાયન્સ ડિફેન્સ એન્ડ એન્જિનિયરિંગનું નામ આપ્યું હતું.

રિલાયન્સ નેવલ સહિત કેટલીક કંપનીઓને કેટલીક બેન્કોએ એસડીઆર અને એસ4એ જેવી રિસ્ટ્રક્ચરિંગ સ્ક્રીમમાં નાખી છે. વિજયા બેન્કના એક મોટા અધિકારીએ જણાવ્યું કે, રિલાયન્સ નેવલ પુનર્ગઠન(SDR) અંતર્ગત હતી પણ તેનું એક્ઝેક્યુશન ન થયું હોવાથી માર્ચ ત્રિમાસિકમાં તેને NPAમાં સમાવિષ્ટ કરવામાં આવી.