તેલંગણા: ભાજપે જાહેર કર્યો ચૂંટણી ઢંઢેરો, દર વર્ષે એક લાખ લોકોને મફતમાં ગાય આપવાનો વાયદો

હૈદરાબાદ: ભાજપે તેલંગણા વિધાનસભા ચૂંટણી માટે ગુરૂવારે ચૂંટણી ઢંઢેરો જાહેર કરતા કહ્યું કે જો તેઓ સત્તામાં આવશે તો ખેડૂતોનું બે લાખ સુધીનું દેણુ માફ કરવામાં આવશે, સ્નાતકોને મફતમાં લેપટોપ, દારૂના વેચાણને નીયમિત કરવાની સાથે દર વર્ષે એક લાખ લોકોને મફતમાં ગાય આપવામાં આવશે. રાજ્યમાં સાત ડિસેમ્બરે મતદાન થશે.

આ ઘોષણાપત્ર ભાજપાના સ્થાનિક પ્રમુખ લક્ષ્મણે જાહેર કર્યું છે. આમાં કહેવામાં આવ્યું છે કે, પાર્ટી સત્તામાં આવશે તો, ધન અને બીજા પ્રલોભનો આપીને ધર્મ પરિવર્તનને રોકવા માટે કાયદો બનાવશે. આમાં એ પણ કહેવામાં આવ્યું છે કે, બાંગ્લાદેશથી ગેરકાયદે પ્રવેશ કરનારા લોકો તથા રોહિંગ્યા સમુદાયના લોકોને પાછા તેમના દેશ મોકલવામાં આવશે.