Cancer Cases In Delhi: ભારતમાં સતત વધી રહ્યા છે કેન્સરના નવા કેસ, દિલ્હી સૌથી વધુ પ્રભાવિત! ચોંકાવનારો રિપોર્ટ

ભારતમાં 2024માં 15.33  લાખથી વધુ નવા કેન્સરના કેસ સામે આવ્યા. 2023માં આ સંખ્યા 14.96  લાખ અને 2022 માં 14.61  લાખ હતી.

પ્રતિકાત્મક તસવીર

Source : pexels

Cancer Cases Are Rising In Delhi: ભારતમાં 2024માં 15.33  લાખથી વધુ નવા કેન્સરના કેસ સામે આવ્યા. 2023માં આ સંખ્યા 14.96  લાખ અને 2022 માં 14.61  લાખ હતી. આનો અર્થ એ થયો કે દર વર્ષે કેસ સતત વધી રહ્યા છે. દિલ્હીમાં પણ પરિસ્થિતિ અલગ નથી વર્ષ 2024 માં 28,387  દર્દીઓ મળ્યા, જ્યારે 2023માં માં 27561 અને 2022માં 26,735  હતા. આ તીવ્ર વધારો રાજધાનીની હોસ્પિટલો અને ઓન્કોલોજી સેવાઓ પર વધતા દબાણને પ્રતિબિંબિત કરે છે, જ્યારે સરકાર દ્વારા સ્ક્રીનીંગ અને સારવાર સુવિધાઓનો વિસ્તાર કરવાના દાવા કરવામાં આવે છે. 

દિલ્હી સૌથી વધુ અસરગ્રસ્ત રાજ્યોમાં સામેલ છે

ICMR નેશનલ કેન્સર રજિસ્ટ્રી પ્રોગ્રામના તાજેતરના ડેટા દર્શાવે છે કે ઉત્તર પ્રદેશ દેશમાં સૌથી વધુ 2.21  લાખ કેસ સાથે આગળ છે, ત્યારબાદ મહારાષ્ટ્ર (1.27 લાખ), પશ્ચિમ બંગાળ (1.18 લાખ), બિહાર (1.15 લાખ) અને તમિલનાડુ (98,386) આવે છે. દિલ્હીમાં એકંદરે કેસોની સંખ્યા ઓછી હોવા છતાં તેની વસ્તીની સરખામણીમાં તે સૌથી વધુ અસરગ્રસ્ત રાજ્યોમાં સ્થાન ધરાવે છે.

ઓન્કોલોજિસ્ટ્સ કહે છે કે જીવનશૈલી, પ્રદૂષણ અને મોડું નિદાન એ ત્રણ મુખ્ય પરિબળો છે જે દિલ્હીમાં કેન્સરના ઝડપી વધારામાં ફાળો આપે છે. નવી દિલ્હીની ફોર્ટિસ હોસ્પિટલના સિનિયર કન્સલ્ટન્ટ ડૉ. પ્રમોદ જૈન કહે છે કે હવે વધુ દર્દીઓ નાની ઉંમરે અને રોગના અંતિમ તબક્કામાં આવી રહ્યા છે. તેમનું કહેવું છે કે દિલ્હીની ઝેરી હવા, તણાવ, ખરાબ આહાર અને ઓછા સ્ક્રીનીંગ સ્તર કેન્સર માટે "પરફેક્ટ સ્ટૉર્મ" તૈયાર કરી રહ્યા  છે.

આ પરિબળો કેન્સરના કેસોમાં વધારો કરવામાં ફાળો આપી રહ્યા છે

નોઈડાની સંજીવની હોસ્પિટલના મેડિકલ ઓન્કોલોજિસ્ટ ડૉ. અમૃતા ગુપ્તા કહે છે કે લાંબા કામના કલાકો, ઓછી શારીરિક પ્રવૃત્તિ, પ્રોસેસ્ડ ફૂડનો વધતો વપરાશ અને તમાકુ અને દારૂના સેવનમાં વધારો જોખમને વધુ વધારી રહ્યા છે. વધુમાં, દિલ્હીની હવા ફેફસાના કેન્સરનું જોખમ વધારે છે. તેમનું માનવું છે કે શરૂઆતના લક્ષણોને અવગણવા અને ડૉક્ટરની મુલાકાતમાં વિલંબ કરવાથી પણ મોટાભાગના દર્દીઓનું નિદાન મોડા તબક્કામાં થાય છે. તેમણે કહ્યું, "જીવનશૈલીમાં નાના ફેરફારો અને સમયસર સ્ક્રીનીંગ મોટો ફરક લાવી શકે છે."

સરકારનું શું કહેવું છે?

સંસદમાં કેન્સરના વધતા ભારણ અંગે પ્રતિક્રિયા આપતા આરોગ્ય રાજ્યમંત્રી પ્રતાપરાવ જાધવે જણાવ્યું હતું કે સરકાર NP-NCD કાર્યક્રમ હેઠળ નિવારણ, સ્ક્રીનિંગ અને સારવાર પર કામ કરી રહી છે. સ્ક્રીનીંગ અને સારવાર સુવિધાઓનો વિસ્તાર કરવામાં આવી રહ્યો છે. હાલમાં, દેશભરમાં 770 જિલ્લા NCD ક્લિનિક્સ, 6,410 CHC ક્લિનિક્સ અને 364 જિલ્લા ડે-કેર કીમોથેરાપી કેન્દ્રો છે. વધુમાં, કેન્દ્રએ 19 રાજ્ય કેન્સર સંસ્થાઓ, 20 ટર્શિયરી  કેન્સર કેન્દ્રો અને નવા AIIMS માં ઓન્કોલોજી એકમોની સ્થાપના કરી છે. તેમણે કહ્યું કે સારવારનો ખર્ચ ઘટાડવા માટે, જન ઔષધિ કેન્દ્રો અને AMRIT ફાર્મસીઓમાં ઘણી કેન્સર દવાઓ 50 થી 80 ટકા ઓછી કિંમતે ઉપલબ્ધ કરાવવામાં આવી રહી છે. ઘણી દવાઓ પર કસ્ટમ ડ્યુટી અને GST પણ ઘટાડવામાં આવ્યો છે.

Disclaimer: આ માહિતી સંશોધન અભ્યાસો અને નિષ્ણાતના મંતવ્ય પર આધારિત છે. તબીબી સલાહનો ઉપયોગ કરશો નહીં. કોઈપણ નવી પ્રવૃત્તિ અથવા એક્સરસાઈઝ શરૂ કરતા પહેલા હંમેશા તમારા ડૉક્ટર અથવા સંબંધિત નિષ્ણાતની સલાહ લો.