અમદાવાદમાં વધુ એક સ્કૂલ વિવાદમાં: ધોરણ 12 ના વિદ્યાર્થીને ઈન્સ્ટાગ્રામ પર મારી નાખવાની ધમકી, પરિવારે નોંધાવી ફરિયાદ
અમદાવાદમાં વિદ્યાર્થીઓ વચ્ચેના ઝઘડા અને સુરક્ષાનો મુદ્દો ફરી એકવાર ચર્ચામાં આવ્યો છે. ખોખરાની સેવન્થ ડે સ્કૂલની ઘટના બાદ હવે રાયખડની આઈ.પી.મિશન સ્કૂલમાં બનેલી ઘટનાએ વાલીઓની ચિંતા વધારી છે.
Ahmedabad school controversy 2025: અમદાવાદની ખોખરા વિસ્તારમાં આવેલી સેવન્થ ડે સ્કૂલમાં બનેલી દુર્ઘટનાનો મામલો હજી શાંત થયો નથી, ત્યાં શહેરના રાયખડ વિસ્તારમાં આવેલી આઈ.પી.મિશન સ્કૂલમાં એક ચોંકાવનારી ઘટના સામે આવી છે. અહીં ધોરણ 12 માં અભ્યાસ કરતા એક વિદ્યાર્થીને તેના પૂર્વ વિદ્યાર્થીએ ઈન્સ્ટાગ્રામ પર ગાળો આપીને માર મારવાની ધમકી આપી છે. આ મામલે વિદ્યાર્થીના પરિવારે તાત્કાલિક ગાયકવાડ હવેલી પોલીસ સ્ટેશનમાં ફરિયાદ નોંધાવી છે, જેના પગલે પોલીસ દ્વારા તપાસ હાથ ધરવામાં આવી છે.
રાયખડની આઈ.પી.મિશન સ્કૂલના ધોરણ 12 ના બે વિદ્યાર્થીઓ વચ્ચે ક્લાસરૂમમાં બારી ખોલવાને લઈને સામાન્ય ઝઘડો થયો હતો. સ્કૂલ પ્રિન્સિપાલે બંને વચ્ચે સમાધાન કરાવી મામલો શાંત પાડ્યો હતો, પરંતુ ઝઘડાની અદાવત રાખીને એક પૂર્વ વિદ્યાર્થીએ ઈન્સ્ટાગ્રામ પર બીજા વિદ્યાર્થીને બિભત્સ ગાળો બોલી અને માર મારવાની ધમકી આપી હતી. આ ઘટનાની જાણ થતાં વિદ્યાર્થીના પરિવારે પોલીસનો સંપર્ક કર્યો અને ગાયકવાડ હવેલી પોલીસ સ્ટેશનમાં ફરિયાદ નોંધાવી છે. પોલીસે આ મામલે ગંભીરતાથી લઈ તપાસ શરૂ કરી છે.
ઝઘડાનું મૂળ કારણ
આ સમગ્ર મામલો ધોરણ 12 ના બે વિદ્યાર્થીઓ વચ્ચેના સામાન્ય ઝઘડાથી શરૂ થયો હતો. ક્લાસરૂમમાં બારી ખોલવા જતાં હાથ અડી જવા જેવી નાની વાતને લઈને બંને વચ્ચે બોલાચાલી થઈ. ઘટનાની જાણ થતાં સ્કૂલના પ્રિન્સિપાલે દરમિયાનગીરી કરી અને બંનેને સમજાવીને સમાધાન કરાવ્યું હતું.
ઈન્સ્ટાગ્રામ પર ધમકી
સમાધાન બાદ પણ આ ઝઘડાની અદાવત રાખીને એક વિદ્યાર્થીના પૂર્વ વિદ્યાર્થી મિત્રએ બીજા વિદ્યાર્થીને ઈન્સ્ટાગ્રામ પર ધમકી આપી હતી. પૂર્વ વિદ્યાર્થીએ બિભત્સ ગાળો બોલીને વિદ્યાર્થીને માર મારવાની ધમકી આપી હતી. ઉલ્લેખનીય છે કે, આ પૂર્વ વિદ્યાર્થીને તેના ગેરવર્તનને કારણે સ્કૂલમાંથી કાઢી મૂકવામાં આવ્યો હતો.
પરિવાર દ્વારા પોલીસ કાર્યવાહી
સોશિયલ મીડિયા પર મળેલી આ ધમકીને વિદ્યાર્થીના પરિવારે ગંભીરતાથી લીધી. તેમણે તાત્કાલિક ગાયકવાડ હવેલી પોલીસ સ્ટેશન પહોંચીને લેખિત અરજી આપી. પોલીસે પણ આ મામલે સંવેદનશીલતા દાખવી અને આરોપી વિદ્યાર્થી સામે ગુનો નોંધીને તપાસ હાથ ધરી છે. આ મામલે બંને વિદ્યાર્થીઓની ઈન્સ્ટાગ્રામ ચેટ પણ સામે આવી છે.
આ ઘટના અંગે સ્કૂલ સત્તાધીશોએ કંઈ પણ કહેવાનો ઇનકાર કર્યો છે. જ્યારે પોલીસ તંત્ર કાયદાકીય મર્યાદામાં રહીને, બંને વિદ્યાર્થીઓ જુવેનાઈલ હોવાથી, તમામ પાસાઓને આવરી લઈ ઊંડાણપૂર્વક તપાસ કરી રહ્યું છે. આ ઘટના ફરી એકવાર શાળાઓમાં વિદ્યાર્થીઓની સુરક્ષા અને સોશિયલ મીડિયાના દુરુપયોગ જેવા મુદ્દાઓ પર પ્રકાશ પાડે છે.
ટોપ સ્ટોરી
ટ્રેન્ડિંગ સમાચાર
