દેવદૂત બન્યા બોપલ PI બી. ટી. ગોહિલ,  3 જીંદગી બચાવી માનવતાનું ઉત્તમ ઉદાહરણ પૂરું પાડ્યું

દેવદર્શન એપાર્ટમેન્ટ નજીક પેટ્રોલિંગ દરમિયાન બોપલ પોલીસને રસ્તા પર કંઈક અજીબ લાગ્યું હતું.  રસ્તા પર એક સ્ત્રી બેસીને આક્રંદ કરી રહી હતી.

બોપલ પોલીસની તત્પરતાથી બચ્યાં ત્રણ જીવ

Source : તસવીર- ABP અસ્મિતા

અમદાવાદ:  પોલીસ એ પ્રજાના સાચા સેવક છે આ વાક્યને સાર્થક કર્યું છે બોપલ પોલીસ ઈન્સપેક્ટર બી.ટી.  ગોહિલે.   અમદાવાદ ગ્રામ્યના બોપલ પોલીસ સ્ટેશન વિસ્તારમાં રાત્રે લગભગ 2 વાગ્યે  એક ચોંકાવનારી ઘટના બની હતી.  દેવદર્શન એપાર્ટમેન્ટ નજીક પેટ્રોલિંગ દરમિયાન બોપલ પોલીસને રસ્તા પર કંઈક અજીબ લાગ્યું હતું.  રસ્તા પર એક સ્ત્રી બેસીને આક્રંદ કરી રહી હતી. તેની બાજુમાં અંદાજે 11 વર્ષનો દીકરો પણ રડી રહ્યો હતો. પત્નીના ખોળામાં પતિ બેભાન હાલતમાં પડ્યા હતા. આ દ્રશ્ય અત્યંત કરુણ લાગતું હતું. આ કરુણ દ્રશ્ય પોલીસ અધિકારીના હૃદયને સ્પર્શી ગયું હતું.  

તાત્કાલિક સારવાર આપી પોલીસે સરાહનીય કામગીરી કરી

રસ્તા પર બેસી આક્રંદ કરતા સ્ત્રીની પાસે જવાથી જાણવા મળ્યું કે,   ઘરમાં ઝગડો થતા પતિ-પત્નીએ ઝેર પીધું હતું. બાળક નાનપણને કારણે કંઈ સમજતો નહોતો ફક્ત મદદ માટે વિનંતી કરી રહ્યો હતો. એક ક્ષણ પણ ન ગુમાવતાં  આ બાહોશ પોલીસ અધિકારીએ તાત્કાલિક કામગીરીમાં લાગી ગયા.  પોલીસ ઈન્સપેક્ટર બી.ટી.  ગોહિલે બેભાન પતિના મોંઢામાં આંગળી નાખી તેમને ઉલ્ટી કરાવી. વારંવાર પ્રયત્નો કર્યા કે ઝેર બહાર કાઢવામાં આવે ત્યાં સુધી. આ જ જીવ બચાવવાની પ્રક્રિયા પત્ની માટે પણ તેમણે કરી હતી. પત્ની બેભાન થવાની કગાર પર હતી તે પહેલા જ મોંઢામાં આંગળીઓ નાખી તેને પણ ઝેર બહાર કાઢવાના પ્રયત્નો કર્યા હતા. 

હોસ્પિટલમાં વધુ સારવાર માટે લાવવામાં આવ્યા

બાદમાં બોપલ પોલીસ ઈન્સપેક્ટર બી.ટી.  ગોહિલ આ દંપતિને લઈ તાત્કાલિક વકીલ સાહેબ બ્રિજ નજીકની સરસ્વતી હોસ્પિટલમાં વધુ સારવાર માટે લાવ્યા હતા. આ દરમિયાન તેમના નાનકડા દીકરાને પણ સાથે લઈ જવામાં આવ્યો અને તેને ધીરજ અપાઈ, ખાવા-પીવાનું આપ્યું અને વિશ્વાસ અપાયો કે તેના માતા-પિતા સલામત રહેશે.

હોસ્પિટલના ડૉક્ટરો દ્વારા બાદમાં ખાતરી આપવામાં આવી કે દંપતી હવે સુરક્ષિત છે. પરિવારજનોએ આ બાહોશ પોલીસ અધિકારીનો આભાર માન્યો હતો.  પોલીસ ઈન્સપેક્ટર બી.ટી.  ગોહિલ  દ્વારા લેવામાં આવેલા આ ઝડપી નિર્ણય અને માનવતાભર્યા વર્તનથી ત્રણ કિંમતી જીંદગીઓ બચી ગઈ હતી.

બોપલ પોલીસે 3 જીંદગી બચાવતા જિલ્લા પોલીસવડાએ કામગીરી બિરદાવી  

આ રાત્રિએ બોપલ પોલીસે ન  માત્ર ફરજ બજાવી,  પરંતુ માનવ જીવન બચાવવાનો હૃદયથી પ્રયત્ન કરીને માનવતાનું ઉત્તમ ઉદાહરણ પૂરું પાડ્યું છે. અમદાવાદ ગ્રામ્ય જિલ્લા પોલીસવડા ઓમપ્રકાશ જાટ દ્વારા બોપલ પોલીસની આ સરાહનીય કામગીરીને પણ બિરદાવવામાં આવી છે.  

પોલીસનો પ્રજા સાથે વ્યવહાર મૈત્રીપૂર્ણ રહે તથા પોલીસ અને પ્રજા વચ્ચે સતત સંવાદ સધાય તો જ પોલીસ પ્રજાની મિત્ર છે તે સૂત્ર સાર્થક બને. કાયદો અને વ્યવસ્થાની પરિસ્થિતિ હોય, ગુનાખોરીની ઘટનાઓ હોય કે કુદરતી આફતો અથવા મહામારીના સમયમાં પણ  પોલીસ હંમેશાં પ્રજાજનોની પડખે સતત ઊભી રહી તેમની મદદે તત્પર રહે છે. પોલીસના આ માનવીય ચહેરાના કારણે નાગરિકો પોલીસને આદર અને સન્માનની નજરે જુએ  છે.