ગુજરાતમાં ડ્રગ્સ મોકલવાનું કાવતરૂ પાકિસ્તાની માફિયાએ UAEમાં ઘડ્યું હોવાનો પર્દાફાશ

ગુજરાતમાં ડ્રગ્સ મોકલવાનું કાવતરૂ પાકિસ્તાની માફિયાએ UAEમાં ઘડ્યું હોવાનો પર્દાફાશ પણ થયો છે. મોરબીના ઝીંઝુડા ગામથી ગુજરાત એટીએસની ટીમ દ્વારા દરોડા પાડી મકાનમાંથી ડ્રગ્સ ઝડપી પડાયું છે. 

તસવીરઃ મોરબી ડ્રગ્સ કેસમાં ઝડપાયેલા આરોપીઓ.

અમદાવાદઃ ગુજરાતમાં પાકિસ્તાનથી મોટી માત્રામાં ડ્રગ્સ ઘૂસાડવાના ષડયંત્રનો પર્દાફાશ થયું છે. ગુજરાત પોલીસ મોટું ઓપરેશન પાર પાડીને 120 કિલો હેરોઇન ઝડપી લીધું છે. આ ડ્રગ્સની કિંમત 600 કરોડ રૂપિયા થાય છે. ગુજરાતમાં ડ્રગ્સ મોકલવાનું કાવતરૂ પાકિસ્તાની માફિયાએ UAEમાં ઘડ્યું હોવાનો પર્દાફાશ પણ થયો છે. મોરબીના ઝીંઝુડા ગામથી ગુજરાત એટીએસની ટીમ દ્વારા દરોડા પાડી મકાનમાંથી ડ્રગ્સ ઝડપી પડાયું છે. 

પાકિસ્તાનથી દરિયાઈ માર્ગે આ ડ્રગ્સ ઓક્ટોબર મહિનાના છેલ્લા અઠવાડિયામાં દ્વારકામાં છુપાવ્યું હતું. આ પછી ત્યાંથી મોરબીના ઝીંઝુડા ગામના મકાનમાં છુપાવ્યું હતું. રાજ્યના પોલીસવડા આશિષ ભાટિયાએ પત્રકાર પરિષદને સંબોધતાં જણાવ્યું હતું કે, ગુજરાત પોલીસનું મોટું ઓપરેશન છે. 120 કિલો હેરોઇન પકડાયું છે, જેની આંતરરાષ્ટ્રીય કિંમત રૂ. 600 કરોડની કિંમત થાય છે.

ડ્રગ્સ ભારતની આંતરરાષ્ટ્રીય દરિયાઇ સીમામાંથી લાવ્યા હતા. આ ડ્રગ્સ કેસમાં સમસુદ્દીન સૈયદ, જબ્બાર મુખ્તાર હુસૈન અને ગુલામ હુસૈનની અટકાયત કરાઈ છે. આ અંગે કેન્દ્રીય એજન્સીઓને પણ જાણ કરાઈ છે. પાકિસ્તાનના સ્મગલરો ડ્રગ્સ લઈને આંતરરાષ્ટ્રીય સરહદ સુધી આવે છે. ત્યાર બાદ આરોપીઓ પોતાની બોટ લઈ સરહદ સુધી જાય છે અને માલની ડિલિવરી લઈ લે છે.

ભાટિયાએ ઉમેર્યું હતું કે, ત્રણ આરોપીઓમાંથી ગુલાબ ભાગડ અને જબ્બાર બંને ગુનાહિત ઈતિહાસ ધરાવે છે. દરિયાઈ માર્ગે આવેલું તમામ ડ્રગ્સ જપ્ત કરાયું છે. આ ડ્રગ્સ પહેલાં આફ્રિકા મોકલવાનું હતું. જોકે, બાદમાં ગુજરાતમાં મોકલાયું છે. આ ડ્રગ્સ સલાયા લવાયા બાદ મોરબી લવાયું હતું. મોટાભાગનું ડ્રગ્સ ભારતમાં લાવીને વિદેશ મોકલાય છે. ડ્રગ્સ ગુજરાતમાં પહોંચાડવા માટેનું કાવતરૂ UAEમાં ઘડાયું હતું. રાજ્યની તમામ એજન્સીઓ સક્રિય છે અને તમામ જથ્થો ઝડપાઇ ચુક્યો છે અને બહાર કોઈ જથ્થો ગયો નથી.

પાકિસ્તાનના ડ્રગ્સ સપ્લાયર ઝાહિદ બશિર બ્લોચ પાસે પાકિસ્તાન દરિયાઈ માર્ગે માલ મંગાવ્યો હતો. ઓક્ટોબરના છેલ્લા અઠવાડિયામાં જથ્થાની ડિલિવરી મધદરિયેથી લીધી હતી. દ્વારકાના સલાયામાં આ જથ્થાને સંતાડી દેવાયો હતો. બાદમાં મોરબીના ઝીંઝુડા ગામમાં આરોપી સમસુદીન સૈયદના નવા બની રહેલા ઘરમાં જથ્થો સંતાડયો હતો. આરોપી ગુલામ હુસૈન અને જબ્બાર અવાર નવાર દુબઇ જતા હતા. જેથી પાકિસ્તાની ડ્રગ માફિયા ગેંગ સાથે સંપર્કમાં આવ્યો હોવાની આશંકા છે.

પાકિસ્તાની ડ્રગ માફિયા ઝાહિદ બલોચ ડિપાર્ટમેન્ટ ઓફ રેવન્યુ ઇન્ટેલિજન્સના 2019 ના 227 કિલો હેરોઇન ગુનામાં વોન્ટેડ છે. ફરાર આરોપી ઈસા રાવ અને મુખ્તાર હુસેન કાકા ભત્રીજા આરોપી મુખ્યત્યાર પાકિસ્તાન મરીન સિક્યોરિટીના હાથે અગાઉ ઝડપાઇ ચૂક્યો હતો પરંતુ બોટ ખરાબ થવાનું બહાનું કરી અને છૂટી ગયો હતો. આ ડ્રગ્સનો જથ્થો આફ્રિકામાં મોકલવાનો હતો. પરંતુ કોઈ કારણોસર ડિલિવરી ગુજરાતમાં કરી હતી.