India vs Pakistan: જો તમે કાર લઇને ભારત-પાકિસ્તાનની મેચ જોવા જવાના છો તો આ સમાચાર તમારે વાંચવા જરૂરી
India vs Pakistan: ભારતીય ટીમ આજે અમદાવાદ પહોંચશે જ્યારે પાકિસ્તાનની ટીમ બુધવારે અમદાવાદ પહોંચી હતી
India vs Pakistan: ભારત અને પાકિસ્તાન વચ્ચે 14 ઓક્ટોબર, શનિવારના રોજ રમાનારી મેચને લઇને કાઉન્ટડાઉન શરૂ થઇ ગયું છે. ભારતીય ટીમ આજે અમદાવાદ પહોંચશે જ્યારે પાકિસ્તાનની ટીમ બુધવારે અમદાવાદ પહોંચી હતી. અગાઉ ભારતીય ઓપનર શુભમન ગિલ પણ અમદાવાદ પહોંચી ચૂક્યો છે. ભારતીય ટીમ ITC નર્મદા હોટેલમાં રોકાશે.
નરેન્દ્ર મોદી સ્ટેડિયમમાં મેચ જોવા પહોંચનારા દર્શકો માટે પાર્કિંગની પણ ખાસ વ્યવસ્થા કરવામાં આવી છે. મેચના દિવસે 25000 વાહનો પાર્ક થાય તેવી વ્યવસ્થા કરવામાં આવી છે. અલગ અલગ 15 સ્થળોએ ખુલ્લા પ્લોટમાં પાર્કિંગ તૈયાર કરવામાં આવ્યા છે. શો માય પાર્કિંગ એપ્લિકેશન દ્વારા વાહનચાલકો પાર્કિંગ મેળવી શકે તેવી વ્યવસ્થા કરાઇ છે. 15000 જેટલા ટુ વહીલર અને 7250 જેટલા ફોર વહીલર પાર્ક થઇ શકે તેવી વ્યવસ્થા કરાઇ હોવાનો અંદાજ છે.
પોલીસના અંદાજ અનુસાર, સવા લાખ લોકો સ્ટેડિયમની અંદર તો વીસ હજાર જેટલા લોકો સ્ટેડિયમ આસપાસ હશે. ટ્રાફિક પોલીસની 20 ક્રેઇન પણ સ્ટેડિયમની આસપાસ ફેરવવામાં આવશે. ગેટ નંબર 1 થી 6 માં બેરીકેટિંગની વાહનો પ્રવેશ કરી શકશે નહીં. સ્ટેડિયમથી બે થી અઢી કિલોમીટરમાં વાહનો પાર્ક કરવાની વ્યવસ્થા કરાઇ છે.
મેચ માટે અલગ અલગ રાજ્યમાંથી ક્રિકેટ ચાહકો આવવાની શરૂઆત થઇ ગઇ છે. જમ્મુ કશ્મીર,હૈદરાબાદ હરિયાણાથી યુવાનો પહોંચ્યા હતા. 12 થી 15 હજારનો ખર્ચ કરીને ત્રણ દિવસ ભારત પાકિસ્તાનની મેચ માટે યુવાનો અમદાવાદ આવ્યા છે. ભારત પાકિસ્તાનની મેચ પહેલા યુવાનોમાં જોરદાર ઉત્સાહ જોવા મળી રહ્યો છે.
નોંધનીય છે કે ભારત-પાકિસ્તાન મેચના દિવસે અમદાવાદમાં સચિન તેંડુલકર, રજનીકાંત અને અમિતાભ બચ્ચન જેવા દિગ્ગજો હાજર રહેશે. મેચ પહેલા બૉલિવૂડના સિંગર અરિજીત સિંહ પરફોર્મ કરશે. પાકિસ્તાનની ટીમ હયાત હોટલમાં રોકાઇ છે. અહીં પોલીસનો સઘન બંદોબસ્ત ગોઠવવામાં આવ્યો છે. હોટલમાં આવનાર દરેક મુલાકાતીઓની નોંધણી કરવામાં આવી રહી છે. બુધવારે રાતે પોલીસ કમિશનરે પણ હોટલની મુલાકાત લીધી હતી. મેચ દરમિયાન પોલીસનો લોખંડી બંદોબસ્ત ગોઠવવામાં આવશે. 21 DCP, 47 ACP, 131 PI, 369 PSI સહિત સાત હજાર પોલીસ કર્મચારીઓ ખડેપગે રહેશે. જ્યારે ચાર હજારથી વધુ હોમગાર્ડ પણ સુરક્ષામાં તૈનાત રહેશે. NSG, NDRF અને SDRF પણ સુરક્ષા વ્યવસ્થામાં જોડાશે.
ટોપ સ્ટોરી
ટ્રેન્ડિંગ સમાચાર
