Budget 2026: પ્રથમ વખત કેંદ્રીય બજેટ રવિવારે રજૂ થશે, લોકસભાના અધ્યક્ષે ઔપચારિક જાહેરાત કરી

લોકસભાના અધ્યક્ષ ઓમ બિરલાએ સોમવારે ઔપચારિક જાહેરાત કરતા જણાવ્યું હતું કે નાણામંત્રી નિર્મલા સીતારમણ 1 ફેબ્રુઆરી, રવિવારના રોજ સંસદમાં બજેટ રજૂ કરશે.

નાણામંત્રી નિર્મલા સીતારમણ

Source : ANI

સંસદીય ઇતિહાસમાં પહેલી વાર કેન્દ્રીય બજેટ રવિવારે રજૂ કરવામાં આવશે. નાણાકીય વર્ષ 2025-26 માટે સામાન્ય બજેટ રવિવારે રજૂ કરવામાં આવશે. લોકસભાના અધ્યક્ષ ઓમ બિરલાએ સોમવારે ઔપચારિક જાહેરાત કરતા જણાવ્યું હતું કે નાણામંત્રી નિર્મલા સીતારમણ 1 ફેબ્રુઆરી, રવિવારના રોજ સંસદમાં બજેટ રજૂ કરશે. સંસદ સામાન્ય રીતે સપ્તાહના અંતે બોલાવાતી નથી, જેના કારણે રવિવારે બજેટ રજૂ કરવું એ એક ઐતિહાસિક ક્ષણ બની જાય છે.

મોરારજી દેસાઈના ક્યાં રેકોર્ડની નજીક પહોંચ્યા સીતારમણ?

આ બજેટ નાણામંત્રી નિર્મલા સીતારમણ માટે પણ એક મોટી વ્યક્તિગત સિદ્ધિ હશે. આ તેમનું સતત નવમું બજેટ હશે. આ સાથે, તેઓ ભૂતપૂર્વ નાણામંત્રી મોરારજી દેસાઈ દ્વારા સૌથી વધુ બજેટ રજૂ કરવાના રેકોર્ડની ખૂબ નજીક પહોંચી જશે. ભૂતપૂર્વ વડા પ્રધાન મોરારજી દેસાઈએ નાણામંત્રી તરીકેના તેમના કાર્યકાળ દરમિયાન કુલ 10 બજેટ રજૂ કર્યા હતા અને નિર્મલા સીતારમણ હવે તે ઐતિહાસિક આંકડાથી માત્ર એક ડગલું દૂર છે.

28 જાન્યુઆરીથી શરૂ થનારા બજેટ સત્ર દરમિયાન શું થશે ?

સંસદના બજેટ સત્રનું સંપૂર્ણ સમયપત્રક પણ સ્પષ્ટ કરવામાં આવ્યું છે. આ સત્ર 28 જાન્યુઆરીથી શરૂ થશે.

રાષ્ટ્રપતિનું ભાષણ: આ સત્ર રાષ્ટ્રપતિ દ્રૌપદી મુર્મુના ભાષણથી શરૂ થશે. તેઓ લોકસભા ચેમ્બરમાં લોકસભા અને રાજ્યસભાના સભ્યોની સંયુક્ત બેઠકને સંબોધશે.

આર્થિક સર્વેક્ષણ: રાષ્ટ્રપતિના ભાષણ પછી, નાણામંત્રી સંસદના બંને ગૃહોમાં આર્થિક સર્વેક્ષણ રજૂ કરે તેવી અપેક્ષા છે.

13 ફેબ્રુઆરીથી 9 માર્ચ વચ્ચે શું થશે ?

સંસદીય બાબતોના મંત્રી કિરેન રિજિજુએ અગાઉ સ્પષ્ટતા કરી હતી કે બજેટ સત્ર 28 જાન્યુઆરીથી શરૂ થશે અને 2 એપ્રિલ સુધી ચાલુ રહેશે. સંસદીય પ્રક્રિયાઓ અને બજેટ દરખાસ્તોની સંપૂર્ણ તપાસ સુનિશ્ચિત કરવા માટે, સત્રને બે તબક્કામાં વહેંચવામાં આવ્યું છે:

• પ્રથમ તબક્કો: 28 જાન્યુઆરીથી શરૂ થઈને 13 ફેબ્રુઆરીએ સમાપ્ત થશે.
• વિરામ: 13 ફેબ્રુઆરી પછી સત્ર મુલતવી રાખવામાં આવશે અને 9 માર્ચે ફરી શરૂ થશે. આ વિરામનો ઉપયોગ સંસદીય સમિતિઓ દ્વારા વિવિધ મંત્રાલયોની ગ્રાન્ટ અને બજેટ દરખાસ્તોની માંગણીઓની તપાસ કરવા માટે કરવામાં આવશે.
• બીજો તબક્કો: 9 માર્ચથી શરૂ થવાની ધારણા છે અને 2 એપ્રિલ સુધી ચાલુ રહેશે.

સરકારે 1 ફેબ્રુઆરીને સત્તાવાર રીતે "બજેટ દિવસ" તરીકે નિયુક્ત કર્યો છે. રવિવારે બજેટ રજૂ કરવાનો નિર્ણય અને નિર્મલા સીતારમણનું નવમું બજેટ, આગામી સત્રને રાજકીય અને આર્થિક રીતે મહત્વપૂર્ણ બનાવે છે. બજારો અને ઉદ્યોગો હવે આ રવિવારનું બજેટ અર્થતંત્રમાં શું લાવે છે તેના પર ધ્યાન કેન્દ્રિત કરશે.