Wipro: IT ક્ષેત્રમાં મંદીના ભણકારા! આ દિગ્ગજ ટેક કંપનીએ ફ્રેશર્સને નક્કી કર્યો તેનાથી અડધો જ પગાર આપશે

કંપનીએ ઉમેદવારોને મોકલેલા ઈ-મેલમાં જણાવ્યું છે કે, અમારા ઉદ્યોગના અન્ય લોકોની જેમ અમે વૈશ્વિક આર્થિક અને ગ્રાહકોની જરૂરિયાતોનું મૂલ્યાંકન કરીએ છીએ, અમારી ભરતી આના પર નિર્ભર છે.

પ્રતિકાત્મક તસવીર

Wipro Offer Letter: વિશ્વભરની ઘણી મોટી કંપનીઓ મંદીના ભય વચ્ચે તેમના માર્જિનનું દબાણ અને ખર્ચ ઘટાડવાનો પ્રયાસ કરી રહી છે. આ મંદીની અસર ભારતમાં પણ જોવા મળી રહી છે. દેશની IT ક્ષેત્રની દિગ્ગજ કંપની વિપ્રો સાથે જોડાયેલા મોટા સમાચાર આવી રહ્યા છે. વિપ્રોએ નોકરી માટે અરજી કરતા તેના નવા ઉમેદવારોને ઓછો પગાર ચૂકવવાની ઓફર કરી છે. આ ઓફર બાદ તમામ ઉમેદવારો ખૂબ જ પરેશાન થઈ ગયા છે. જાણો કેમ થયું આવું અને શું છે આખો મામલો..

કંપનીએ ઉમેદવારોને મેલ મોકલ્યો

બિઝનેસ સ્ટાન્ડર્ડ અનુસાર, વિપ્રો કંપનીએ તેના નવા ઉમેદવારોને આ સંબંધમાં એક ઈમેલ મોકલ્યો છે. ઉદાહરણ તરીકે, કંપનીએ વાર્ષિક રૂ. 6.5 લાખ (LPA)ના પેકેજવાળા ઉમેદવારોને ઈમેલ મોકલ્યો છે, જેઓ ઓનબોર્ડિંગની રાહ જોઈ રહ્યા હતા. આ ઈમેલમાં ઉમેદવારોને પૂછવામાં આવ્યું છે કે શું તેઓ 3.5 એલપીએના વેતન પર નોકરીમાં જોડાશે. વિપ્રોને તેના 2022 બેચના સ્નાતકોના ઓનબોર્ડિંગમાં કેટલાક મહિનાના વિલંબનો સામનો કરવો પડ્યો છે. હવે કંપનીએ એવા ઉમેદવારોને ઓછા પગારની ઓફર કરવાનો નિર્ણય કર્યો છે જેમને અગાઉ ઊંચા પગાર પર નોકરીની ઓફર કરવામાં આવી હતી. જેને લઈને નવા ઉમેદવારો ભારે નારાજ છે.

કંપનીએ ઈમેલમાં શું લખ્યું છે

કંપનીએ ઉમેદવારોને મોકલેલા ઈ-મેલમાં જણાવ્યું છે કે, અમારા ઉદ્યોગના અન્ય લોકોની જેમ અમે વૈશ્વિક આર્થિક અને ગ્રાહકોની જરૂરિયાતોનું મૂલ્યાંકન કરીએ છીએ, અમારી ભરતી આના પર નિર્ભર છે. અમે તમારા માટે યોગ્ય તકો ઓળખવા માટે અમારા શ્રેષ્ઠ પ્રયાસો કરીએ છીએ. અમારી પાસે હાલમાં 3.5 LPA ના પેકેજ પર પ્રોજેક્ટ એન્જિનિયરની કેટલીક ભૂમિકાઓ માટે ખાલી જગ્યાઓ છે. અમે અમારા તમામ સ્નાતકોને FY23 બેચમાં આ નોકરીઓ પસંદ કરવાની તક આપવા માંગીએ છીએ. જો કોઈ ઉમેદવાર આ ઑફર પસંદ કરે છે, તો તે/તેણીને માર્ચ 2023થી ઑનબોર્ડ કરવામાં આવશે અને તે પહેલાંની બધી ઑફર્સ લેપ્સ થઈ ગઈ હોવાનું માનવામાં આવશે.

જોડાવાનું વચન નથી

કંપનીએ કહ્યું કે, અમે તમને આ તકનો લાભ લેવા માટે પ્રોત્સાહિત કરીએ છીએ. જો ઉમેદવાર આ ઓફર સ્વીકારતો નથી, તો તે તેની મૂળ ઓફર ચાલુ રાખી શકે છે. કંપનીએ કહ્યું કે, અમે જોડાવાની તારીખ અંગે કોઈ વચન આપી શકતા નથી, કારણ કે અમારી ભરતી યોજના વર્તમાન આર્થિક વાતાવરણના આધારે નક્કી કરવામાં આવે છે.

ઉમેદવાર ગુસ્સે થઈ રહ્યા છે

આ ઈમેલ બાદ તમામ ઉમેદવારો લગભગ નારાજ થઈ રહ્યા છે. કંપનીના આ નિર્ણયથી ઉમેદવાર દુખી છે. નવા ઉમેદવાર લાંબા સમયથી 6.5 LPA પર ઓફરની રાહ જોઈ રહ્યા છે. હવે કંપની તેને 3.5 લાખ રૂપિયાની ઓફર કરી રહી છે, તો શા માટે તેને રાહ જોવડાવવામાં આવી. અન્ય કોઈ કંપની તેમને આ ઓફર આપી શકી હોત. પણ રાહ જોઈને અડધી ઓફર આપવાનો શો અર્થ છે. 6.5 LPA ના પેકેજ ધરાવતા ઉમેદવારો, જેઓ ઓનબોર્ડ થવાની રાહ જોઈ રહ્યા હતા, તેમને 16 ફેબ્રુઆરી 2023 ના રોજ અચાનક વિપ્રો તરફથી એક ઈમેલ મળ્યો. આ ઈમેલમાં તેને ઓછા પગારવાળી નોકરી પસંદ કરવાનો વિકલ્પ આપવામાં આવ્યો છે.