Gujarat Rain: ધનસુરામાં ૪ કલાકમાં ૪ ઇંચ વરસાદ,નખત્રાણામાં 7 ઇંચ વરસાદ પડતા શાળા બાદ કોલેજ બંધ
Gujarat Rain Update: અરવલ્લી જિલ્લામાં મેઘો અનરાધાર વરસી રહ્યો છે. ધનસુરામાં ૪ કલાકમાં ૪ ઇંચ વરસાદ પડતા જળબંબારની સ્થિતિ બની છે. ભિલોડા તાલુકામાં ગાજવીજ સાથે ધોધમાર વરસાદ પડ્યો છે.
Gujarat Rain Update: અરવલ્લી જિલ્લામાં મેઘો અનરાધાર વરસી રહ્યો છે. ધનસુરામાં ૪ કલાકમાં ૪ ઇંચ વરસાદ પડતા જળબંબારની સ્થિતિ બની છે. ભિલોડા તાલુકામાં ગાજવીજ સાથે ધોધમાર વરસાદ પડ્યો છે. યાત્રાધામ શામળાજીમાં પણ ભારે પવન સાથે વરસાદ પડ્યો છે. ભિલોડા નગરના નીચાણવાળા વિસ્તારમાં પાણી ભરાયા છે. ખાડિયા વિસ્તારમાં દુકાનોમાં પાણી ઘુસી જતા વેપારીઓને મોટી નુકસાની વેઠવી પડી છે. આ ઉપરાંત શામળાજી-ઇડર રોડ પર પાણી ફરી વળ્યાં છે. શામળાજી બજારમાં પણ પાણી ભરાયા છે.
નખત્રાણાના ઉખેડામાં 7 ઇંચ જેટલો વરસાદ
કચ્છ વિસ્તારમાં પણ ભારે વરસાદ પડ્યો છે. નખત્રાણાના ઉખેડામાં 7 ઇંચ જેટલો વરસાદ પડ્યો છે. વહેલી સવારથી સાંજ સુધીમાં વરસાદ વરસ્યો છે. ભારે વરસાદના કારણે ગામના નદી-નાળા છલકાયા છે. ગામની નદીઓ બે કાંઠે વહેતી જોવા મળી છે. ભારે વરસાદને પગલે કચ્છમાં કોલોજો પણ બે દિવસ બંધ રાખવાનો નિર્ણય લેવામાં આવ્યો છે. શાળાઓ બાદ કોલોજે બંધ રાખવાનો નિર્ણય લેવામાં આવ્યો છે. 13 અને 14 જુલાઈના બે દિવસ શૈક્ષણિક કાર્ય બંધ રહેશે. ભારે વરસાદની આગાહીના પગલે કચ્છ યુનિવર્સિટી દ્વારા આ નિર્ણય લેવામાં આવ્યો છે.
સૌરાષ્ટ્રનો આ ડેમ 100 ટકા ભરાતા 2 દરવાજા ખોલવામાં આવ્યા
રાજ્યમાં પડી રહેલા ભારે વરસાદને પગલે અનેક જળાશયોમાં નવા નીર આવ્યા છે તો કેટલાક ડેમ ઓવરફ્લો પણ થયા છે. મોરબીનો મચ્છુ-૩ ડેમ ૧૦૦ % ભરાય ગયો છે. જેના પગલે ડેમના ૨ દરવાજા ૧ ફૂટ ખોલવામાં આવ્યા છે. આગમચેતીના ભાગ રૂપે નીચાણવાળા વિસ્તારોને એલર્ટ રહેવા સૂચના આપવામાં આવી છે. ડેમમાં પાણીની આવક ૧૫૪૫ કયુસેક થઈ છે.
ડેમમાંથી ૧૬૭૬ કયુસેક પાણી છોડવામાં આવશે. મોરબી અને માળિયા તાલુકાના ૨૦ ગામોને એલર્ટ રહેવા સૂચના આપવામાં આવી છે. મોરબીના ગોર ખીજડીયા, વનાળીયા, સાદુલકા, માનસર, રવાપર નદી,અમરનગર, નારણકા, ગુંગણ, નાગડાવાસ, બહાદુર ગઢ અને સોખડા ગામોને એલર્ટ રહેવા સૂચના આપવામાં આવી છે. જ્યારે માળીયા તાલુકાના દેરાળા, મહેન્દ્રગઢ, મેઘપર, નવાગામ, રાસંગપર, વીર વિદરકા, ફતેપર, માળિયા મિયાણા અને હરીપરને એલર્ટ રહેવા સૂચના આપવામાં આવી છે. આ ઉપરાંત લોકોને નદીના પટમાં અવર જવર ન કરવા તંત્રએ અપીલ કરી છે.
મોરબી શહેરમાં વહેલી સવારથી વરસાદ વરસી રહ્યો છે. શહેરના અલગ અલગ વિસ્તારોમાં અને ગ્રામ્ય વિસ્તારોમાં વરસાદ પડ્યો છે. શહેરના સાવસર પ્લોટ, શનાળા રોડ, રવાપર રોડ, ઉમિયા સર્કલ, દલવાડી સર્કલ, સામાકાંઠા સહિતના વિસ્તારોમાં વરસાદ પડ્યો છે. રગપર, બેલા, જેતપર, અણિયારી, શાપર, પીપળી, રાજપર, શનાળા, મહેન્દ્રનગર સહિતના તમામ ગ્રામ્ય વિસ્તારોમાં વરસાદી માહોલ જોવા મળી રહ્યો છે.
ટોપ સ્ટોરી
ટ્રેન્ડિંગ સમાચાર
