નીતિશ કુમાર ફરી સરકારમાં આવતા જ લાલુ પરિવારને આપ્યો મોટો ઝટકો! રાબડી દેવીને ફટકારી નોટિસ, જાણો શું છે મામલો
પટણાના 10 સર્ક્યુલર રોડનો બંગલો ખાલી કરવા આદેશ, 39 હાર્ડિંગ રોડ પર નવું ઘર ફાળવાયું; ભાજપે કહ્યું- 'નળ ચોરી ન થાય તેનું ધ્યાન રાખીશું'.
Rabri Devi vacate notice 10 Circular Road: બિહારના રાજકારણમાં ફરી એકવાર ગરમાવો આવ્યો છે. રાજ્યના ભૂતપૂર્વ મુખ્યમંત્રી રાબડી દેવીને મકાન નિર્માણ વિભાગે મોટો આંચકો આપ્યો છે. લાલુ પ્રસાદ યાદવનો પરિવાર છેલ્લા 28 વર્ષથી જે બંગલામાં રહેતો હતો, તે 10, સર્ક્યુલર રોડ સ્થિત સરકારી નિવાસસ્થાન ખાલી કરવાની નોટિસ ફટકારવામાં આવી છે. આ સાથે જ તંત્ર દ્વારા રાબડી દેવીને પટણામાં જ 39, હાર્ડિંગ રોડ ખાતે નવો બંગલો ફાળવવામાં આવ્યો છે. આ વહીવટી નિર્ણય બાદ બિહારમાં શાસક પક્ષ ભાજપ અને વિપક્ષ આરજેડી વચ્ચે આરોપ-પ્રત્યારોપનો દોર શરૂ થઈ ગયો છે.
નવું સરનામું: 10 સર્ક્યુલર રોડથી 39 હાર્ડિંગ રોડ
બિહાર સરકારના મકાન બાંધકામ વિભાગ દ્વારા જારી કરાયેલા સત્તાવાર આદેશ મુજબ, રાબડી દેવીએ તેમનું વર્તમાન હાઈ-પ્રોફાઈલ નિવાસસ્થાન ખાલી કરવું પડશે. વિભાગે તેમને હવે 39, હાર્ડિંગ રોડ, પટણા ખાતે આવેલા નવા સરકારી આવાસમાં સ્થળાંતર કરવા જણાવ્યું છે. ઉલ્લેખનીય છે કે, લાલુ યાદવ અને રાબડી દેવી વર્ષ 2005 થી 10, સર્ક્યુલર રોડ પરના બંગલામાં રહેતા હતા. આ બંગલો બિહારના રાજકારણનું કેન્દ્રબિંદુ ગણાતો હતો.
શા માટે ખાલી કરાવવામાં આવી રહ્યો છે બંગલો?
આ ફેરફાર પાછળના તકનીકી કારણો એવા છે કે 10, સર્ક્યુલર રોડનો બંગલો 'ભૂતપૂર્વ મુખ્યમંત્રીઓ' ના ક્વોટા હેઠળ ફાળવવામાં આવ્યો હતો. વર્તમાન સમયમાં રાબડી દેવી બિહાર વિધાન પરિષદમાં વિરોધ પક્ષના નેતા (Leader of Opposition) છે અને તેઓ MLC (મેમ્બર ઓફ લેજિસ્લેટિવ કાઉન્સિલ) પણ છે. નિયમોનુસાર, તેમને હવે MLC અથવા વિપક્ષી નેતાને મળવાપાત્ર શ્રેણીમાં આવતું નિવાસસ્થાન ફાળવવામાં આવ્યું છે, જેના કારણે જૂનું ઘર ખાલી કરવું અનિવાર્ય બન્યું છે.
ભાજપનો આકરો કટાક્ષ: "સરકારી સંપત્તિ પર નજર રાખીશું"
આ નોટિસ બાદ બિહાર ભાજપે લાલુ પરિવાર પર નિશાન સાધવાની તક ઝડપી લીધી છે. ભાજપના પ્રવક્તા નીરજ કુમારે ટોણો મારતા કહ્યું કે, "જો ખાલી કરવાનો આદેશ છે તો તેમણે તેનું પાલન કરવું જોઈએ." તેમણે વધુમાં વિવાદાસ્પદ ટિપ્પણી કરતા કહ્યું કે, "અમને આશા છે કે આ વખતે તેમના પરિવારના જૂના ટ્રેક રેકોર્ડથી વિપરીત, તેઓ બંગલો ખાલી કરતી વખતે કોઈ સરકારી સંપત્તિની ચોરી નહીં કરે કે નુકસાન નહીં પહોંચાડે. તેઓ બાથરૂમના નળ પણ ન ખોલી જાય, તેના પર અમે બારીકાઈથી નજર રાખીશું."
RJD નો પલટવાર: "આ બદલાની રાજનીતિ છે"
બીજી તરફ, રાષ્ટ્રીય જનતા દળ (RJD) એ આ કાર્યવાહીને રાજકીય દ્વેષ ગણાવી છે. RJD નેતા સંદીપ યાદવે સોશિયલ મીડિયા પ્લેટફોર્મ 'X' પર આક્રોશ વ્યક્ત કરતા લખ્યું કે, "ભૂતપૂર્વ મહિલા મુખ્યમંત્રીને ઘર ખાલી કરવાનો આદેશ આપવો એ દુઃખદ છે અને તે સત્તાધારી પક્ષની વિકૃત માનસિકતા દર્શાવે છે. રાજકારણમાં આટલા નીચા સ્તરે ન જવું જોઈએ. આ સ્પષ્ટપણે બદલાની ભાવના છે અને સરકારે તમામ મર્યાદાઓ વટાવી દીધી છે."
રાબડી દેવી: બિહારના પ્રથમ મહિલા મુખ્યમંત્રી
ઉલ્લેખનીય છે કે રાબડી દેવી બિહારના ઇતિહાસમાં પ્રથમ અને એકમાત્ર મહિલા મુખ્યમંત્રી રહ્યા છે. તેમણે 25 જુલાઈ, 1997 ના રોજ મુખ્યમંત્રી પદના શપથ લીધા હતા. હાલમાં તેઓ RJD ના રાષ્ટ્રીય ઉપાધ્યક્ષ તરીકે પણ જવાબદારી સંભાળી રહ્યા છે.
Before You Go
Gujarat Government: રાજ્યના ખેડૂતો માટે સરકારનો મહત્વનો નિર્ણય
ટોપ સ્ટોરી
ટ્રેન્ડિંગ સમાચાર
