ભરઉનાળે ગુજરાતમાં આંધી-વંટોળ સાથે ભારે વરસાદ તૂટી પડશે: હવામાન નિષ્ણાત અંબાલાલ પટેલની મોટી આગાહી
Ambalal Patel forecast: આગાહી અનુસાર આગામી ૪ થી ૮ મે સુધી રાજ્યના અનેક વિસ્તારોમાં પડશે વરસાદ.
Gujarat unseasonal rain: ભરઉનાળે અસહ્ય ગરમી અને બફારાથી ત્રાહિમામ પોકારી ઉઠેલા ગુજરાતના હવામાનમાં આગામી દિવસોમાં મોટો પલટો આવવાની શક્યતા છે. હવામાન નિષ્ણાત અંબાલાલ પટેલે રાજ્યના અનેક વિસ્તારોમાં ભારે આંધી-વંટોળ સાથે કમોસમી વરસાદની આગાહી કરી છે, જે ખેડૂતો સહિત નાગરિકો માટે ચિંતાનો વિષય બની શકે છે.
હવામાન નિષ્ણાત અંબાલાલ પટેલના જણાવ્યા મુજબ, આગામી દિવસોમાં ગુજરાતના વાતાવરણમાં અચાનક બદલાવ આવશે અને ભરઉનાળે કમોસમી વરસાદ અને તોફાની પવનનો અનુભવ થઈ શકે છે. તેમની આગાહી મુજબ, ૩ મે, ૨૦૨૫ થી રાજ્યના વાતાવરણમાં પલટો આવવાની શરૂઆત થશે.
૪ થી ૮ મે સુધી કમોસમી વરસાદ અને આંધી:
અંબાલાલ પટેલની આગાહી મુજબ, ૪ મે થી લઈને ૮ મે, ૨૦૨૫ સુધી ગુજરાતના વિવિધ ભાગોમાં કમોસમી વરસાદ પડશે. આ વરસાદ માત્ર ઝાપટા સ્વરૂપે નહિ, પરંતુ વીજળીના કડાકા ભડાકા અને ભારે આંધી-વંટોળ સાથે તોફાની બની શકે છે.
૫૦ થી ૬૦ કિમી/કલાકની ઝડપે પવન અને વૃક્ષો ઉખડવાની શક્યતા:
આ કમોસમી વરસાદ સાથે પવનની ગતિ પણ ખૂબ જ તેજ રહેવાની શક્યતા છે. અંબાલાલ પટેલના મતે, ૫૦ થી ૬૦ કિલોમીટર પ્રતિ કલાકની ઝડપે પવન ફૂંકાઈ શકે છે. આંધી-વંટોળ એટલા તીવ્ર હોઈ શકે છે કે વૃક્ષો મૂળિયા સાથે ઉખડી જાય તે મુજબની સ્થિતિ ઊભી થઈ શકે છે.
આ વિસ્તારોમાં પડશે કમોસમી વરસાદ:
અંબાલાલ પટેલના અંદાજ મુજબ, કમોસમી વરસાદ અને આંધી-વંટોળનો પ્રભાવ મુખ્યત્વે ઉત્તર ગુજરાત, સૌરાષ્ટ્ર, કચ્છ અને મધ્ય ગુજરાતના વિસ્તારોમાં જોવા મળી શકે છે. આ વિસ્તારોના ખેડૂતો માટે ઉભા પાકને નુકસાન થવાનો ભય સેવાઈ રહ્યો છે.
હવામાન વિભાગની આગાહી
અસહ્ય ગરમી અને બફારાનો અનુભવ કરી રહેલા ગુજરાતના હવામાનમાં આગામી દિવસોમાં મોટો પલટો આવવાની શક્યતા છે. હવામાન વિભાગ દ્વારા રાજ્યના અનેક વિસ્તારોમાં કમોસમી વરસાદની આગાહી કરવામાં આવી છે, જ્યારે અમદાવાદ શહેરમાં પણ ગરમીનો પ્રકોપ યથાવત રહેશે.
હવામાન વિભાગ દ્વારા જાહેર કરવામાં આવેલી આગાહી મુજબ, અમદાવાદ શહેરમાં આજે તાપમાન ૪૪ ડિગ્રી સેલ્સિયસ આસપાસ રહેવાની શક્યતા છે, જે ગરમીના વર્તમાન પ્રકોપને યથાવત રાખશે. જોકે, આગામી ૨૪ કલાક બાદ રાજ્યના હવામાનમાં ફેરફાર થવાની અને કમોસમી વરસાદની શરૂઆત થવાની આગાહી કરવામાં આવી છે.
રાજસ્થાનમાં સક્રિય થઈ રહેલા સાઇકલોનના કારણે વરસાદ:
હવામાન વિભાગના જણાવ્યા અનુસાર, રાજસ્થાનમાં સક્રિય થઈ રહેલા એક સાઇકલોનના કારણે ગુજરાતના વાતાવરણમાં બદલાવ આવશે અને કમોસમી વરસાદનું આગમન થશે. આ કમોસમી વરસાદ ૩ મે થી લઈને ૮ મે, ૨૦૨૫ સુધી રાજ્યના વિવિધ વિસ્તારોમાં પડશે તેવી શક્યતા વ્યક્ત કરવામાં આવી છે.
આ વિસ્તારોમાં પડશે કમોસમી વરસાદ:
આગાહી મુજબ, ૩ થી ૮ મે દરમિયાન સૌરાષ્ટ્ર અને કચ્છના વિસ્તારોમાં કમોસમી વરસાદ જોવા મળી શકે છે. આ ઉપરાંત, રાજ્યના અન્ય કેટલાક જિલ્લાઓમાં પણ વરસાદની શક્યતા છે, જેમાં મુખ્યત્વે બનાસકાંઠા, મહેસાણા (ઉત્તર ગુજરાત), ભાવનગર, અમરેલી (સૌરાષ્ટ્ર), સુરત, વડોદરા, વલસાડ અને નવસારી (દક્ષિણ અને મધ્ય ગુજરાત) વિસ્તારોનો સમાવેશ થાય છે.
પવનની ગતિ અને અસર:
કમોસમી વરસાદની સાથે પવનની ગતિમાં પણ વધારો થવાની શક્યતા છે. શરૂઆતના ૨ દિવસમાં પવનની ગતિ ૨૦ થી ૪૦ કિલોમીટર પ્રતિ કલાકની આસપાસ રહી શકે છે. જોકે, આગામી ૫ દિવસ બાદ પવનની ગતિ ૫૦ કિલોમીટર પ્રતિ કલાક સુધી પહોંચવાની શક્યતા છે. ખાસ કરીને સૌરાષ્ટ્ર અને કચ્છના વિસ્તારોમાં ભારે પવન ફૂંકાઈ શકે છે.
ભરઉનાળે ગરમી અને બફારા વચ્ચે કમોસમી વરસાદ અને ભારે પવનની આગાહી નાગરિકો અને ખેડૂતો માટે ચિંતા અને સાવચેતીનો વિષય બન્યા છે. ખેડૂતોને ઉભા પાકને નુકસાનથી બચાવવા માટે જરૂરી પગલાં લેવા અને નાગરિકોને વાતાવરણમાં થતા બદલાવ માટે તૈયાર રહેવા અપીલ કરવામાં આવી છે.
ટોપ સ્ટોરી
ટ્રેન્ડિંગ સમાચાર
