Mehsana Rain: ભારે વરસાદના કારણે બહુચરાજી BRC ભવનની કચેરી પાણીમાં ગરકાવ

હવામાન વિભાગની આગાહી વચ્ચે મહેસાણા જિલ્લામાં પણ વરસાદી માહોલ જામ્યો છે.  મહેસાણામાં પડેલા ભારે વરસાદને પગલે અનેક દુકાનો મકાનોમાં વરસાદી પાણી ભરાયા છે.

બહુચરાજી બીઆરસી ભવનમાં પાણી

Source : તસવીર- ABP અસ્મિતા

મહેસાણા: હવામાન વિભાગની આગાહી વચ્ચે મહેસાણા જિલ્લામાં પણ વરસાદી માહોલ જામ્યો છે.  મહેસાણામાં પડેલા ભારે વરસાદને પગલે અનેક દુકાનો મકાનોમાં વરસાદી પાણી ભરાયા છે.  બહુચરાજીની પ્રાથમિક શાળા અને બીઆરસી ભવનની કચેરી પાણીમાં ગરકાવ થઈ છે.  અધિકારીની ચેમ્બરમાં પણ બે ફૂટ જેટલા વરસાદી પાણી ફરી વળ્યા છે. 

મહેસાણામાં પડેલા ભારે વરસાદના કારણે અનેક વિસ્તારમાં પાણી ભરાયા છે.  જેના કારણે લોકો પરેશાન છે.  બહુચરાજી ખાતે આવેલ બહુચર પ્રાથમિક શાળા અને બીઆરસી ભવનની અંદર પાણી ભરાઈ જતા લોકો હાલાકી ભોગવી રહ્યા છે.  બીઆરસી ભવનની અંદર બે ફૂટ પાણી ભરાયેલું જોવા મળે છે. 

બીજી તરફ બીઆરસી ભવનના અધિકારીના ઓફિસની અંદર પાણી ભરાઈ જતા અધિકારી પાણીમાં બેસેલા જોવા મળી રહ્યા છે.  વરસાદી પાણીનો નિકાલ ન થતાં ખુદ તાલુકાના અઘિકારીઓ પરેશાન છે. સરકારી ઓફિસમાં પાણી ફરી વળતા અધિકારીઓ પણ મુશ્કેલીમાં મૂકાયા છે.   

ભરૂચ જિલ્લાના વાલિયામાં આભ ફાટ્યું

ભરૂચ જિલ્લાનું વાલિયા જ્યાં આભ ફાટ્યું હતું. મોડી રાત્રે વરસાદ વરસવાનું શરૂ થયું અને આજે સવાર સુધી વરસાદ વરસતો રહ્યો.  18 ઈંચ વરસાદ વરસતા વાલિયા જળબંબાકાર થયું હતું. જમીન ત્યાં જળના દ્રશ્યો સર્જાયા હતા. વાલિયા તાલુકાના ગામો બેટમાં ફેરવાયા હતા.  ગામને જોડતા માર્ગો જ પાણીમાં ડૂબી જતાં ગામ સંપર્કવિહોણા બન્યા હતા. ભરૂચ શહેર સહિત નેત્રંગ, અંકલેશ્વર સહિતના તાલુકા જળબંબાકાર થયા હતા. 

વાલિયા તાલુકાના ડહેલી ગામમાં ચારે તરફ કીમ નદીના પાણી ફરી વળ્યા હતા.  ડહેલી ગામના કાછોટા ફળિયામાં પાણી ભરાતા 87 લોકો મુશ્કેલીમાં મુકાયા હતા. ડહેલી ગામમાં આવેલા મહાદેવના મંદિરમાં પણ વરસાદી પાણી ફરી વળ્યા હતા. વાલિયામાં ભારે વરસાદથી રસ્તાઓ પાણીમાં ડૂબી ગયા હતા. પાણીના ધસમસતા પ્રવાહમાંથી કાર લઈ જવાનો પ્રયાસ કરનાર 2 ઈકો કારના ચાલક ફસાયા હતા. ટ્રેક્ટરની મદદથી બંને કારને બહાર કાઢવામાં આવી હતા. 

વાલિયા-માંગરોળને જોડતા માર્ગ પર ટોકરી નદીના પાણી ફરી વળ્યા હતા.  મેરા ગામ નજીક પાણીના ધસમસતા પ્રવાહમાં એક ટ્રક પલટી ગઈ હતા.  સદનસીબે ટ્રકચાલક અને ક્લીનરનો આબાદ બચાવ થયો હતો. વાલિયાના સોડ ગામના આદિવાસી ફળિયામાં પાણી ભરાયા હતા.  કીમ નદીના ધસમસતા પાણી ગામમાં ફરી વળ્યા છે.  

રાજ્યમાં ભારે વરસાદની કરાઈ છે આગાહી 

રાજ્યમાં છેલ્લા બે દિવસથી ફરી એક વખત વરસાદી સિસ્ટમ એક્ટિવ થઈ છે. જેના ભાગરુપે રાજ્યના અનેક જિલ્લાઓમાં વરસાદ વરસી રહ્યો છે.  દક્ષિણ ગુજરાતમાં મેઘરાજા તાંડવ મચાવશે. જ્યારે સૌરાષ્ટ, ઉત્તર ગુજરાત અને મધ્ય ગુજરાત પણ પાણી-પાણી થશે. આ આગાહી હવામાન વિભાગ દ્વારા કરવામાં આવી છે. રાજ્યના  હવામાન વિભાગના જણાવ્યા અનુસાર, એક સાથે ચાર વરસાદી સિસ્ટમ સક્રિય થઈ છે. જેને લઈ ગુજરાતમાં મન મૂકીને મેઘરાજા વરસશે. 

આજે ભરૂચ, સુરત, તાપી, નવસારી અને વલસાડ જિલ્લામાં અતિભારે વરસાદની આગાહી કરવામાં આવી છે. બનાસકાંઠા, પાટણ, મહેસાણા, સાબરકાંઠા, આણંદ, વડોદરા, પંચમહાલ, છોટાઉદેપુર, નર્મદા, ડાંગ, રાજકોટ, ગીર સોમનાથ, અમરેલી અને ભાવનગર જિલ્લામાં ભારે વરસાદની આગાહી હવામાન વિભાગે કરી છે.