Kadi Visavadar bypolls: ગુજરાત પેટાચૂંટણી; કડી અને વિસાવદર બેઠક માટે ભાજપે પ્રભારી અને સંયોજકોની નિમણૂક કરી

BJP appoints incharge Gujarat polls: કડી માટે સુરેશ પટેલ અને દશરથજી ઠાકોર, જ્યારે વિસાવદર માટે કમલેશ મીરાણી અને જયેશ રાદડિયાને પ્રભારી બનાવાયા.

ભાજપે ગુજરાત ચૂંટણીના પ્રભારીની નિમણૂક કરી

Source : ANI

Gujarat by-elections 2025: ગુજરાતમાં આગામી સમયમાં યોજાનારી વિધાનસભાની બે બેઠકોની પેટાચૂંટણી માટે ભારતીય જનતા પાર્ટી (BJP) એ કમર કસી લીધી છે. ભાજપે આજે (૨૫.૦૫.૨૦૨૫) આ બંને બેઠકો, એટલે કે કડી અને વિસાવદર, માટે પ્રભારી, સંયોજક અને સહ સંયોજકની નિમણૂક કરી છે. પ્રદેશ મહામંત્રી રજની પટેલ દ્વારા આ અંગેની યાદી જાહેર કરવામાં આવી હતી.

ગુજરાત વિધાનસભાની કડી અને વિસાવદર બેઠકની આગામી પેટાચૂંટણીને લઈને ભારતીય જનતા પાર્ટી (BJP) એ સંગઠનાત્મક તૈયારીઓ શરૂ કરી દીધી છે. પ્રદેશ ભાજપે આજે (૨૫.૦૫.૨૦૨૫) આ બંને મહત્વપૂર્ણ બેઠકો માટે પ્રભારી, સંયોજક અને સહ સંયોજકની નિમણૂક કરી છે. પ્રદેશ મહામંત્રી રજની પટેલ દ્વારા જાહેર કરાયેલી યાદી મુજબ, આ નિમણૂકોથી ભાજપ પેટાચૂંટણી માટે પોતાની રણનીતિને આખરી ઓપ આપી રહ્યું છે.

કડી વિધાનસભા બેઠક માટે નિમણૂકો:

કડી વિધાનસભા બેઠક માટે ભાજપે નીચે મુજબના પદાધિકારીઓની નિમણૂક કરી છે:

• પ્રભારી: સુરેશભાઈ પટેલ (પૂર્વ પારસવલ્લી મણિનગર વિધાનસભા) અને દશરથજી ઠાકોર (પૂર્વ જિલ્લા પ્રમુખ , પાટણ જિલ્લા).
• સંયોજક: વિનોદભાઈ રણછોડભાઈ પટેલ (ચેરમેન, મહેસાણા જિલ્લા મધ્યસ્થ સહકારી બેંક).
• સહ સંયોજક: હિમાંશુભાઈ બંસીભાઈ ખમાર (વાઈસ ચેરમેન, એપીએમસી કડી).

વિસાવદર વિધાનસભા બેઠક માટે નિમણૂકો:

વિસાવદર વિધાનસભા બેઠક માટે ભાજપે નીચે મુજબના પદાધિકારીઓની નિમણૂક કરી છે:

• પ્રભારી: કમલેશભાઈ મીરાણી (પૂર્વ શહેર પ્રમુખ , રાજકોટ શહેર) અને જયેશભાઈ રાદડીયા (જેતપુર વિધાનસભા ધારાસભ્ય).
• સંયોજક: ભરતભાઈ વડાલીયા (પૂર્વ જિલ્લા ઉપપ્રમુખ , જૂનાગઢ જિલ્લો).
• સહ સંયોજક: નરેન્દ્રભાઈ કોટીલા (પૂર્વ જિલ્લા મંત્રી, જૂનાગઢ જિલ્લો).

વિસાવદર અને કડી વિધાનસભાની પેટાચૂંટણીની તારીખ જાહેર થઈ

ગુજરાત વિધાનસભાની બે ખાલી પડેલી બેઠકો, વિસાવદર અને કડી, માટે પેટાચૂંટણીની તારીખ જાહેર થઈ હતી. ચૂંટણી પંચે ૧૯ જૂને આ બંને બેઠકો પર મતદાન યોજાશે તેવી જાહેરાત કરી હતી. ફોર્મ ભરવાની પ્રક્રિયા ૨૬ મેથી શરૂ થઈ હતી, અને ઉમેદવારી ફોર્મ ભરવાનો છેલ્લો દિવસ ૨ જૂન હતો. આ પેટાચૂંટણીના પરિણામો ૨૩ જૂને જાહેર થયા હતા.

નોંધનીય છે કે, ભૂપત ભાયાણીએ આમ આદમી પાર્ટી (AAP) માંથી રાજીનામું આપી ભાજપમાં જોડાતા વિસાવદરની વિધાનસભા બેઠક ખાલી પડી હતી. જ્યારે કરશન સોલંકીના નિધનથી કડી વિધાનસભા બેઠક ખાલી પડી હતી.

આમ આદમી પાર્ટીએ વિસાવદર બેઠક પર ગોપાલ ઈટાલિયાને મેદાનમાં ઉતાર્યા હતા. કડીમાં ઉમેદવાર ઉતારવા કે નહીં તે અંગે AAP ની બેઠક યોજાઈ હતી. AAP નેતા ઇસુદાન ગઢવીએ જણાવ્યું હતું કે, કડીમાં ઉમેદવાર ઉતારવા કે નહીં તે અંગે બેઠક કરીને બે દિવસમાં નિર્ણય લેવાશે.

ઉલ્લેખનીય છે કે, હર્ષદ રિબડિયાએ અરજી કરતા વિસાવદરની પેટાચૂંટણી થોડા સમય માટે અટવાઈ હતી. વિસાવદરમાં ત્રિપાંખિયો જંગ નિશ્ચિત હતો, જેમાં AAP, કોંગ્રેસ અને ભાજપ વચ્ચે કાંટાની ટક્કર જોવા મળી હતી. કોંગ્રેસ અને AAP એ ગઠબંધન નહીં કરવાની જાહેરાત કરી હતી. આ બધાની વચ્ચે હર્ષદભાઈ રિબડિયાએ મોટું નિવેદન આપ્યું હતું, તેમણે જણાવ્યું હતું કે, જો પાર્ટી તેમને ટિકિટ આપે તો તેઓ સંપૂર્ણપણે તૈયાર છે અને તેમણે આ બેઠક પર ભાજપની જીતનો વિશ્વાસ પણ વ્યક્ત કર્યો હતો.