મેઘરાજા બગાડશે દિવાળી! ગુજરાતમાં ફરી વરસાદ ભુક્કા બોલાવશે, આ તારીખથી માવઠાની હવામાન વિભાગની આગાહી

Gujarat Weather Update: ગુજરાતનું હવામાન ફરી એકવાર પરિવર્તનના આરે છે. હાલમાં સૂકું રહેલું વાતાવરણ આગામી દિવસોમાં બદલાશે, જેની સીધી અસર તહેવારોના માહોલ પર પડી શકે છે.

ગુજરાતમાં માવઠાની આગાહી

Source : PTI

Gujarat Rain Alert: નવરાત્રિમાં વરસ્યા બાદ હવે મેઘરાજા દિવાળીના તહેવાર પહેલાં ફરી એકવાર ગુજરાતના વાતાવરણમાં પલટો લાવવાની સંભાવના છે. હવામાન વિભાગના ડાયરેક્ટર એ.કે.દાસ ની આગાહી મુજબ, રાજ્યમાં ઑક્ટોબર 16 થી 19 વચ્ચે સામાન્ય વરસાદ (માવઠું) થવાની શક્યતા છે, જે થન્ડર સ્ટોર્મ એક્ટિવિટી સાથે વરસી શકે છે. આવતીકાલ (ઑક્ટોબર 15) સુધી હવામાન સૂકું રહેશે, પરંતુ ત્યારબાદ બે દિવસ પછી લઘુતમ તાપમાનમાં 2 થી 3 ડિગ્રીનો વધારો થતાં રાત્રિની ગરમી પણ વધશે. વરસાદની વાત કરીએ તો, ઑક્ટોબર 16 ના રોજ દક્ષિણ ગુજરાત ના જિલ્લાઓમાં અને ઑક્ટોબર 17 ના રોજ સૌરાષ્ટ્રના કેટલાક ભાગોમાં હળવા વરસાદ ની શક્યતા વ્યક્ત કરવામાં આવી છે.

બદલાતું વાતાવરણ: તાપમાનમાં વધારો અને માવઠાના સંકેતો

ગુજરાતનું હવામાન ફરી એકવાર પરિવર્તનના આરે છે. હાલમાં સૂકું રહેલું વાતાવરણ આગામી દિવસોમાં બદલાશે, જેની સીધી અસર તહેવારોના માહોલ પર પડી શકે છે. હવામાન વિભાગના નિદેશક એ.કે.દાસે જણાવ્યું છે કે ઑક્ટોબર 16 થી રાજ્યનું વાતાવરણ ફરી પલટો લેશે.

તાપમાનમાં ફેરફાર: આવતીકાલ (ઑક્ટોબર 15) બાદ બે દિવસ પછી રાજ્યના લઘુતમ તાપમાનમાં 2 થી 3 ડિગ્રી જેટલો વધારો જોવા મળશે. આના કારણે દિવસ અને રાત્રિના તાપમાન વચ્ચેનો તફાવત ઘટશે અને લોકોને રાત્રિના સમયે પણ ગરમીનો વધુ અહેસાસ થશે.

વરસાદની સંભાવના: મુખ્ય આગાહી ઑક્ટોબર 16 થી 19 વચ્ચેના સમયગાળા માટે છે. આ દરમિયાન થન્ડર સ્ટોર્મ એક્ટિવિટી સાથે સામાન્ય વરસાદ પડવાની શક્યતા છે, જેને સામાન્ય રીતે માવઠું ગણવામાં આવે છે. આ હળવો વરસાદ નીચેના વિસ્તારોમાં વરસી શકે છે:

તારીખ	આગાહી કરેલ જિલ્લાઓ (સામાન્ય વરસાદ/હળવા ઝાપટા)
ઑક્ટોબર 16	દક્ષિણ ગુજરાત: નવસારી, તાપી, ડાંગ, વલસાડ. કેન્દ્રશાસિત પ્રદેશ: દમણ અને દાદરાનગર હવેલી.
ઑક્ટોબર 17	સૌરાષ્ટ્ર: ગીર સોમનાથ, અમરેલી, ભાવનગર. દક્ષિણ ગુજરાત: નવસારી, તાપી, ડાંગ, વલસાડ. કેન્દ્રશાસિત પ્રદેશ: દમણ અને દાદરાનગર હવેલી.

ખેડૂતો અને સામાન્ય જનતાને આ આગાહીને ધ્યાનમાં રાખીને તકેદારી રાખવા અને જરૂરી વ્યવસ્થાપન કરવા માટે સૂચન કરવામાં આવે છે, જોકે વરસાદની તીવ્રતા હળવી રહેવાની સંભાવના છે.

અંબાલાલ પટેલની આગાહી

રાજ્યમાં હવામાનની સ્થિતિ અને આગાહીઓ માટે જાણીતા નિષ્ણાંત અંબાલાલ પટેલે અરબ સાગરમાં આગામી સમયમાં વધુ એક વાવાઝોડું સર્જાવા અંગે મોટું અનુમાન વ્યક્ત કર્યું છે, જેના કારણે ગુજરાતના વાતાવરણમાં નોંધપાત્ર પલટો આવવાની સંભાવના છે.

અંબાલાલ પટેલના અનુમાન મુજબ, આગામી 26 ઓક્ટોબરથી લઈને નવેમ્બરની શરૂઆતમાં અરબ સાગરમાં વધુ એક શક્તિશાળી વાવાઝોડું (પ્રબળ વાવાઝોડું) બનવાની શક્યતા છે. તેમણે જણાવ્યું છે કે અરબ સાગરમાં 18થી 21 ઓક્ટોબર સુધીમાં દરિયાઈ હલચલ શરૂ થઈ જશે, જે હલચલ અંતે વાવાઝોડાનું સ્વરૂપ ધારણ કરી શકે છે.

આ સંભવિત વાવાઝોડાની અસરને કારણે ગુજરાતના વાતાવરણમાં મોટો પલટો જોવા મળી શકે છે. એટલું જ નહીં, આ વાવાઝોડું દક્ષિણ ભારતના રાજ્યોમાં પણ ભારે વરસાદ લાવવાની ક્ષમતા ધરાવે છે, તેવી આગાહી પણ અંબાલાલ પટેલે વ્યક્ત કરી છે.

વરસાદી માહોલ બાદ ગુજરાતમાં ઠંડીની શરૂઆત ક્યારે થશે તે અંગે પણ અંબાલાલ પટેલે પોતાનું અનુમાન જાહેર કર્યું છે. તેમના મતે, ડિસેમ્બર મહિનાની શરૂઆતથી જ રાજ્યમાં ઠંડા પવનો ફૂંકાવાની શરૂઆત થઈ શકે છે, જેના કારણે લોકોને ઠંડકનો અનુભવ થશે.

આ પણ વાંચો

ગુજરાતમાં ફરી ચોમાસા જેવો માહોલ! આવતીકાલે રાજ્યના 9 જિલ્લામાં વરસાદની આગાહી, જુઓ લેટેસ્ટ વેધર અપડેટ