આગામી ત્રણ કલાક 11 જિલ્લાઓ માટે ભારે, હવામાન વિભાગે ‘રેડ એલર્ટ’ સાથે ભારેથી અતિભારે વરસાદની આગાહી કરી
નાસકાંઠાથી દીવ સુધીના વિસ્તારોમાં મેઘરાજાનું રૌદ્ર સ્વરૂપ; દક્ષિણ ગુજરાત અને સૌરાષ્ટ્રમાં 20 જૂન સુધી અતિભારે વરસાદની શક્યતા.
Gujarat rain red alert today: ગુજરાતમાં ચોમાસું સંપૂર્ણપણે સક્રિય થઈ ગયું છે અને રાજ્યના અનેક વિસ્તારોમાં ભારે વરસાદ પડી રહ્યો છે. હવામાન વિભાગે આગામી 3 કલાક (સાંજે 4 થી 7 વાગ્યા સુધી) માટે રાજ્યના 11 જિલ્લા અને દીવમાં ભારે વરસાદને લઈને રેડ એલર્ટ જાહેર કર્યું છે, જે ચિંતાજનક સ્થિતિ સૂચવે છે.
કયા જિલ્લાઓમાં રેડ એલર્ટ?
હવામાન વિભાગની તાજેતરની આગાહી મુજબ, નીચેના જિલ્લાઓમાં ગાજવીજ સાથે ભારે વરસાદની શક્યતા છે, જેના પગલે રેડ એલર્ટ આપવામાં આવ્યું છે:
બનાસકાંઠા, મહેસાણા, સુરેન્દ્રનગર, રાજકોટ, પોરબંદર, જૂનાગઢ, અમરેલી, ભાવનગર, ગીર સોમનાથ, બોટાદ, દીવ
આ જિલ્લાઓ માટે ઓરેન્જ અને યલો એલર્ટ
હવામાન વિભાગની તાજેતરની આગાહી મુજબ, આજે સાંજે 4 થી 7 વાગ્યા સુધી ગાજવીજ સાથે વરસાદની શક્યતા છે. મધ્યમ વરસાદ માટે ઓરેન્જ એલર્ટ સાબરકાંઠા, પાટણ, અમદાવાદ, ખેડા, ગાંધીનગર, પંચમહાલ, દાહોદ, અરવલ્લી, મહિસાગર, વડોદરા, છોટા ઉદેપુર, ભરૂચ, આણંદ, મોરબી, દેવભૂમિ દ્વારકા, જામનગર અને કચ્છમાં આપવામાં આવ્યું છે. જ્યારે નર્મદા, સુરત, ડાંગ, નવસારી, વલસાડ, તાપી, દમણ અને દાદરા નગર હવેલીમાં હળવા વરસાદને લઈને યલો એલર્ટ આપવામાં આવ્યું છે.
તંત્ર સજ્જ, નાગરિકોને સાવચેતી રાખવા અપીલ
રાજ્ય સરકારે વરસાદની આ ગંભીર આગાહીને ધ્યાનમાં રાખીને તમામ સંબંધિત વિભાગોને એલર્ટ મોડ પર મૂક્યા છે. ડિઝાસ્ટર મેનેજમેન્ટ ટીમોને સજ્જ રાખવામાં આવી છે. નાગરિકોને અપીલ કરવામાં આવે છે કે તેઓ હવામાન વિભાગ દ્વારા જારી કરાયેલી સૂચનાઓનું પાલન કરે, વીજળીના કડાકા-ભડાકા સમયે સુરક્ષિત સ્થળે રહે અને પાણી ભરાયેલા વિસ્તારોમાં જવાનું ટાળે. માછીમારોને દરિયો ન ખેડવા પણ સૂચના આપવામાં આવી છે. વરસાદની વર્તમાન સ્થિતિ અને આગામી આગાહીને જોતા, ગુજરાતમાં આગામી કલાકોમાં વધુ વરસાદી માહોલ જોવા મળશે.
આગામી દિવસોની વરસાદની આગાહી
આજથી એટલે કે 16 જૂનથી લઈને 20 જૂન સુધી, દક્ષિણ ગુજરાત અને સૌરાષ્ટ્રમાં અતિભારે વરસાદની આગાહી કરવામાં આવી છે. આ વિસ્તારોમાં પૂર જેવી સ્થિતિ પણ સર્જાઈ શકે છે, તેથી તંત્રને એલર્ટ રહેવા સૂચના અપાઈ છે. જ્યારે મધ્ય અને ઉત્તર ગુજરાતમાં હળવાથી ભારે વરસાદની સંભાવના છે.
ગઈકાલે (15 જૂન)ના રોજ પણ ઉત્તર દક્ષિણ ગુજરાત અને સૌરાષ્ટ્રના કેટલાક જિલ્લાઓમાં મેઘરાજાએ ધબધબાટી બોલાવી હતી, જેના કારણે નીચાણવાળા વિસ્તારોમાં પાણી ભરાયા હતા.
ટોપ સ્ટોરી
ટ્રેન્ડિંગ સમાચાર
